അറസ്റ്റ് ചെയ്ത് അന്പത് ദിവസത്തോളം മൗനത്തിലായിരുന്ന സിനിമാക്കാര് കൂട്ടത്തോടെ ദിലീപിനെ കാണാന് ജയിലിലേക്ക്
നടിയെ ആക്രമിച്ച കേസിലെ ഗൂഢാലോചനക്കുറ്റത്തിന് അറസ്റ്റിലായ ദിലീപിന്റെ ജയില്വാസം രണ്ടുമാസം പിന്നിടുകയാണ്. അറസ്റ്റിലായതോടെ താരത്തെ കൈവിട്ട മലയാള സിനിമ ഇന്ന് മൗനം വെടിഞ്ഞ് ദിലീപിനൊപ്പമാണെന്ന് പറയാതെ പറയുകയാണ്. കഴിഞ്ഞ മൂന്ന് ദിവസമായി ദിലീപിനെ കാണാന് ആലുവ സബ് ജയിലിലേക്ക് സിനിമാക്കാരുടെ ഒഴുക്കാണ്.
അറസ്റ്റ് നടന്ന 50-ഓളം ദിവസം മൗനമായിരുന്ന സിനിമാക്കാര് കൂട്ടത്തോടെ ജയിലിലേക്ക് എത്തുന്നത് ദിലീപിനുള്ള പിന്തുണയായി തന്നെയാണ് കണക്കാക്കുന്നത്. വരുന്നവരാരും മാധ്യമങ്ങളോട് പ്രതികരിക്കാന് തയാറായിരുന്നില്ല. എന്നാല് അമ്മയുടെ ഭാരവാഹിയും ഇടതുപക്ഷ പിന്തുണയോടെ വിജയിച്ച എം.എല്.എയുമായ കെ.ബി.ഗണേഷ്കുമാര് ദിലീപിനെ ജയിലില് സന്ദര്ശിച്ച ശേഷം പരസ്യമായി പിന്തുണ പ്രഖ്യാപിക്കുകയും ചെയ്തു.
ദിലീപിന്റെ ആനുകൂല്യം പറ്റിയവര് ആപത്ത് കാലത്ത് അയാളെ കൈവിടരുതെന്നാണ് ഗണേഷ് ജയിലിന് പുറത്തു പറഞ്ഞത്. പോലീസുകാര് ചോദ്യം ചെയ്യുമെന്നോ ഫോണ് ചോര്ത്തുമെന്നോ ഭയന്ന് ദിലീപിനെ ആരും കാണാന് വരാതിരിക്കരുതെന്നും ദിലീപിനെ അധിക്ഷേപിക്കാന് നടക്കുന്നവരെ ഭയപ്പെടേണ്ടെന്നും ഗണേഷ് പരസ്യമായി പറഞ്ഞു. ഗണേഷിന്റെ വാക്കുകള് മലയാള സിനിമയുടെയും അമ്മയുടെയും പൂര്ണ പിന്തുണ ദിലീപിന് ഒപ്പമാണെന്ന സൂചനയാണ് നല്കുന്നത്.
അറസ്റ്റിന് പിറ്റേന്ന് തന്നെ അമ്മയില് നിന്നും മറ്റ് സിനിമ സംഘടനകളില് നിന്നും ദിലീപിനെ പുറത്താക്കിയിരുന്നു. പിന്നീട് കേസിന്റെ പേരില് ഒറ്റപ്പെട്ടുപോയ ദിലീപിന് അനുകൂലമായി മലയാള സിനിമയില് നിന്നും ശബ്ദം ഉയര്ന്നിരുന്നില്ല. കേസില് മൂന്ന് തവണ ജാമ്യം തേടി ദിലീപ് കോടതിയെ സമീപിച്ചു. മൂന്ന് തവണയും കോടതി ജാമ്യം നിഷേധിക്കുകയായിരുന്നു. ദിലീപിന്റെ ജാമ്യാപേക്ഷ മൂന്നാം തവണയും കോടതി തള്ളിയതിന് ശേഷമാണ് മലയാള സിനിമ പ്രവര്ത്തകര്ക്കിടയില് നിന്നും നടന് പിന്തുണ ഏറിയത്.
ജൂലൈ പത്തിനാണ് കേസില് ദിലീപ് അറസ്റ്റിലാകുന്നത്. ജനപ്രിയ നായകന്റെ ഓണം ജയിലിലാകുമെന്ന് ഉറപ്പായതോടെ കഴിഞ്ഞ ദിവസം ഭാര്യയും നടിയുമായ കാവ്യാമാധവനും മകള് മീനാക്ഷിയും ജയിലിലെത്തി ദിലീപിനെ കണ്ടിരുന്നു. കാവ്യയുടെ പിതാവ് മാധവനും ഇരുവര്ക്കും ഒപ്പം എത്തിയിരുന്നു. ഇവര് എത്തുന്നതിന് മുന്പ് സുഹൃത്തും സംവിധായകനുമായ നാദിര്ഷ ജയിലിലെത്തി ദിലീപിനെ കണ്ടു മടങ്ങുകയും ചെയ്തു.
ഇവരുടെ സന്ദര്ശനത്തിന് പിന്നാലെ ജയിലിലേക്ക് മലയാള സിനിമയിലെ പ്രമുഖരുടെ ഒഴുക്കായിരുന്നു. സംവിധായകന് രഞ്ജിത്തും സുരേഷ് കൃഷ്ണയും ദിലീപിനെ കാണാന് എത്തി. കലാഭവന് ഷാജോണ്, ഏലൂര് ജോര്ജ്, ഹരിശ്രീ അശോകന്, എന്നിവരും പിന്നാലെ എത്തി. തിരുവോണ ദിവസം നടന് ജയറാം ഓണക്കോടിയുമായി ജയിലിലെത്തി ദിലീപുമായി 20 മിനിറ്റോളം സംസാരിച്ചു.
എന്നാല് ഗണേഷ്കുമാര് എത്തിയതോടെയാണ് ദിലീപിനെ കൈവിടാന് മലയാള സിനിമ തയാറല്ലെന്ന് വ്യക്തമായത്. ഇക്കാര്യം ഗണേഷ്കുമാര് വ്യക്തമാക്കുകയും ചെയ്തു. കോടതി കുറ്റവാളിയാണെന്ന് കണ്ടെത്തുന്നത് വരെ ദിലീപ് കുറ്റക്കാരനാണെന്ന് ആര്ക്കും പറയാന് കഴിയില്ലെന്നാണ് ഗണേഷ് വ്യക്തമാക്കിയത്. ഗണേഷ് മടങ്ങിയതിന് പിന്നാലെ മോഹന്ലാലിന്റെ സന്തതസഹചാരിയും നിര്മാതാവുമായ ആന്റണി പെരുമ്പാവൂരും ജയിലിലെത്തി ദിലീപിനെ കണ്ടു. അറസ്റ്റിലാകുന്നതിന് തൊട്ടുമുന്പ് ദിലീപിന്റെ നേതൃത്വത്തില് തീയറ്റര് ഉടമകളുടെ പുതിയ സംഘടന ഫിയോക് നിലവില് വന്നിരുന്നു. ദിലീപായിരുന്നു സംഘടനയുടെ അമരത്ത്. എന്നാല് അറസ്റ്റോടെ ദിലീപിനെ പുറത്താക്കി ആന്റണി പെരുമ്പാവൂര് ഫിയോക് നേതൃത്വം ഏറ്റെടുക്കുകയായിരുന്നു.
https://www.facebook.com/Malayalivartha
