ദിലീപിനെ കാണാന് താരങ്ങള് എത്തി... വിമര്ശനവുമായി വിനയന്
നടി ആക്രമിക്കപ്പെട്ട ഗൂഢാലോചനക്കേസില് ജയിലില് കഴിയുന്ന ദിലീപിനെ കാണാന് സിനിമയിലെ ദിലീപിന്റെ സുഹൃത്തുക്കള് പലരും എത്തിയിരുന്നു. എന്നാല് ജയിലില് ദിലീപിനെ കാണാന് എത്തിയ താരങ്ങള്ക്കെതിരെ വിമര്ശനവുമായി സംവിധായകന് വിനയന് രംഗത്തെത്തിയിരിക്കുകയാണ്. സ്വന്തം സഹപ്രവര്ത്തകയെ അപമാനിച്ച സിനിമാ താരത്തിന് പിന്തുണയുമായിട്ടാണ് സിനിമാക്കാര് കൂട്ടത്തോടെ ജയിലില് പോകുന്നത്. തന്റെ മകനാണ് ഇതെ അവസ്ഥയിലെങ്കിലും പൊലീസും കോടതിയും പറഞ്ഞിട്ട് കാണാനുളള ധൈര്യമെ താന് കാണിക്കുവെന്നും വിനയന് പറഞ്ഞു. അച്ഛന്റെ ശ്രാദ്ധച്ചടങ്ങുകളില് പങ്കെടുക്കാന് അങ്കമാലി മജിസ്ട്രേറ്റ് കോടതി ദിലീപിന് അനുമതി നല്കിയതിന് പിന്നാലെയാണ് താരങ്ങള് ഓരോരുത്തരായി ജയിലിലേക്ക് എത്തുന്നതും.
ദിലീപിന്റെ ചിത്രീകരണം പൂര്ത്തിയായ രാമലീല എന്ന ചിത്രം റിലീസ് ചെയ്യണമെന്നും വിനയന് ആവശ്യപ്പെട്ടിരുന്നു. രാമലീല എന്ന പടം ഇറങ്ങിയാല് ജനം അത് കാണാന് പോകില്ല എന്ന് ആരാണ് തീരുമാനിച്ചതെന്നും ഇങ്ങനെയൊരു ഇഷ്യുവില്പ്പെട്ട ആ നടന്, ദിലീപ് നായകനാകുന്ന രാമലീല ഒന്ന് കാണാമായിരുന്നു എന്ന് വിചാരിച്ചാല് ഈ പടം സൂപ്പര്ഹിറ്റ് ആയാലോ എന്നും വിനയന് ചോദിച്ചിരുന്നു.
ഇടതുപക്ഷ എംഎല്എയായ ഗണേഷ് കുമാര്, നിര്മ്മാതാവ് ഹംസ, തിരക്കഥാകൃത്ത് ബെന്നി പി നായരമ്പലം, നടന് സുധീര് അടക്കം നിരവധി പേരാണ് ഇന്ന് ജയിലില് എത്തി ദിലീപിനെ കണ്ടത്. തിരുവോണ ദിവസമായ ഇന്നലെ നടന് ജയറാമും ജയിലിലെത്തി ദിലീപിനെ കണ്ട് ഓണക്കോടി നല്കിയിരുന്നു.
അമ്മയുടെ എക്സിക്യൂട്ടീവ് കമ്മിറ്റി അംഗം കൂടിയായ കലാഭവന് ഷാജോണ്, സംവിധായകന് രഞ്ജിത്ത്, കാവ്യ മാധവന്, മകള് മീനാക്ഷി, സംവിധായകന് നാദിര്ഷാ, നടന്മാരായ സുരേഷ് കൃഷ്ണ, കലാഭവന് ഷാജോണ്, ഹരിശ്രീ അശോകന്, ഏലൂര് ജോര്ജ് എന്നിവരും ഇക്കഴിഞ്ഞ ദിവസങ്ങളിലായി ജയിലില് എത്തി ദിലീപുമായി കൂടിക്കാഴ്ച നടത്തിയിരുന്നു.
സെപ്റ്റംബര് ആറിന് രാവിലെ ഏഴുമുതല് 11വരെ വീട്ടിലും ആലുവ മണപ്പുറത്തും നടക്കുന്ന അച്ഛന്റെ ബലിതര്പ്പണ ചടങ്ങുകളില് പങ്കെടുക്കാനാണ് ദിലീപിന് കോടതി അനുമതി നല്കിയത്.
https://www.facebook.com/Malayalivartha
