അപകടത്തില്പെടുന്നവര്ക്ക് അടിയന്തര ചികില്സ ലഭ്യമാക്കേണ്ടത് സ്വകാര്യ ആശുപത്രികളുടെ ഉത്തരവാദിത്തമാക്കി മാറ്റുന്ന ഉത്തരവ് കര്ശനമായി നടപ്പാക്കാന് സര്ക്കാര് തീരുമാനം
അപകടത്തില്പെടുന്നവര്ക്ക് അടിയന്തര ചികില്സ ലഭ്യമാക്കേണ്ടതു സ്വകാര്യ ആശുപത്രികളുടെ ഉത്തരവാദിത്തമാക്കി മാറ്റുന്ന ഉത്തരവ് കര്ശനമായി നടപ്പാക്കാന് സര്ക്കാര് തീരുമാനം. സുപ്രീംകോടതി വിധിയെത്തുടര്ന്ന് 2015ല് തന്നെ സര്ക്കാര് ഉത്തരവിറക്കിയിരുന്നെങ്കിലും ഇതു പ്രായോഗികതലത്തില് നടപ്പാക്കിയിരുന്നില്ല. തമിഴ്നാട് സ്വദേശിയായ മുരുകനു തക്കസമയത്തു ചികില്സ ലഭ്യമാക്കാതിരുന്നതിനെത്തുടര്ന്നു മരിച്ച സംഭവത്തെ തുടര്ന്നാണു നിയമം കര്ശനമാക്കാന് മന്ത്രി കെ.കെ.ശൈലജ നിര്ദേശം നല്കിയത്.
ചികില്സ നിഷേധിക്കുന്ന ആശുപത്രികള്ക്കെതിരെ സര്ക്കാര് നടപടിയെടുക്കും. ജീവന് രക്ഷിക്കുക എന്നതാണ് ഡോക്ടര്മാരുടെയും ആശുപത്രികളുടെയും പ്രാഥമിക കടമ. നിയമ, സാമ്പത്തിക പ്രശ്നങ്ങള് ജീവന്രക്ഷാ ചികില്സയ്ക്കു തടസ്സമാകരുത്.
അപകടത്തില്പെടുന്നവര്ക്കൊപ്പം എത്തുന്നവര്ക്കു ചികില്സയുടെ ഉത്തരവാദിത്തം അടിച്ചേല്പിക്കുന്ന രീതിയും അനുവദിക്കില്ല. വിദഗ്ധചികില്സ ആവശ്യമാണെങ്കില് അതിനുള്ള സൗകര്യമൊരുക്കേണ്ടതും ആശുപത്രികളുടെ ചുമതലയാണെന്ന് ആരോഗ്യവകുപ്പ് അറിയിച്ചു. സംസ്ഥാന സര്ക്കാര് നടപ്പാക്കുന്ന അടിയന്തര ചികില്സാശൃംഖല പദ്ധതിയിലും സ്വകാര്യ ആശുപത്രികളെ പങ്കാളികളാക്കും. ആശുപത്രികളിലെ സൗകര്യങ്ങളുടെ അടിസ്ഥാനത്തില് മൂന്നു വിഭാഗങ്ങളായി ആശുപത്രികളെ തരംതിരിക്കും. അപകടസ്ഥലത്തിനു തൊട്ടടുത്തുള്ള ആശുപത്രിയില് ജീവന്രക്ഷാചികില്സ ലഭ്യമാക്കുകയാണ് പദ്ധതിയിലൂടെ ലക്ഷ്യമിടുന്നത്.
സംസ്ഥാന സര്ക്കാരിന്റെ ക്ലിനിക്കല് എസ്റ്റാബ്ലിഷ്മെന്റ് ആക്ടിലും ജീവന്രക്ഷാചികില്സയുമായി ബന്ധപ്പെട്ട മാര്ഗനിര്ദേശങ്ങള് ഉള്പ്പെടുത്തിയിട്ടുണ്ട്. ഈ ബില് നിലവില് നിയമസഭാ സബ്ജക്ട് കമ്മിറ്റിയുടെ പരിഗണനയിലാണ്.
https://www.facebook.com/Malayalivartha
