ഗതാഗത വകുപ്പ് മന്ത്രി തോമസ് ചാണ്ടിക്കെതിരെ നിരന്തരം മാസങ്ങളായി വാര്‍ത്തകള്‍ നല്‍കി രാത്രി ചാനല്‍ ചര്‍ച്ചയും സംഘടിപ്പിക്കുന്ന ഏഷ്യാനെറ്റ് ന്യൂസിനും വിനു വി ജോണിനെുമെതിരെ സിപിഎം നേതൃത്വം നല്‍കുന്ന സോഷ്യല്‍ മീഡിയയിലെ സൈബര്‍ പോരാളികള്‍ രംഗത്ത്. കേരളത്തിലെ ഏറ്റവും സമ്പന്നനായ മന്ത്രി തോമസ് ചാണ്ടിയുടെ സമ്പത്ത് ഉണ്ടായത് ഇന്ന് ഇന്നലേയോ അല്ല എന്നതാണ് വസ്തുത. ഇതിനൊക്കെ കുട പിടിച്ച ഇടത് വലത് നേതാക്കളും മാധ്യമങ്ങളും ഇപ്പോള്‍ രംഗത്തെത്തിയതിന്റെ രഹസ്യം തേടിപ്പോകുമ്പോഴാണ് ഞെട്ടിക്കുന്ന രഹസ്യങ്ങള്‍ പോരാളികള്‍ പുറത്താക്കുന്നത്. 

ഏഷ്യാനെറ്റ് ന്യൂസും റിപ്പോര്‍ട്ടര്‍ ടിവി പ്രസാദും വിനു വി ജോണും ഉയര്‍ത്തിക്കൊണ്ടു വന്ന അഴിമതി അതര്‍ഹിക്കുന്ന ഗൗരവത്തോടെ തന്നെ അഴിമതികഥയായി മറ്റ് മാധ്യമങ്ങള്‍ ഏറ്റെടുത്തു. എന്നാല്‍ ഏഷ്യാനെറ്റ് അത് വിട്ടില്ല. തുടര്‍ച്ചയായി തോമസ് ചാണ്ടിയെ തറപറ്റിക്കാനായി വാര്‍ത്ത നല്‍കി. അങ്ങനെയാണ് സൈബര്‍ പോരാളികള്‍ രംഗത്തെത്തിയത്. 

ചാണ്ടിയും സര്‍ക്കാറും കടുത്ത പ്രതിസന്ധിയില്‍ നില്‍ക്കുന്ന ഘട്ടത്തില്‍ സോഷ്യല്‍ മീഡിയയിലൂടെ പുറത്തുവരുന്നത് മറ്റൊരു കഥയാണ്. ഏഷ്യാനെറ്റ് ന്യൂസിലെ അവതാരകനായ വിനു വി ജോണ്‍ ചിറ്റപ്പന് വേണ്ടി ഏറ്റെടുത്ത ക്വട്ടേഷനാണ് ചാണ്ടി വിരുദ്ധ വാര്‍ത്തകള്‍ എന്നാണ് സൈബര്‍ സഖാക്കള്‍ നടത്തുന്ന പ്രചരണം. വിനു വി ജോണിന്റെ അച്ഛന്റെ സഹോദരനെ അഡ്വ. ജോണ്‍ മാത്യുവിനെ കെഎസ്ആര്‍ടിസിയുടെ കേസുകള്‍ വാദിക്കുന്നതില്‍ നിന്നും നീക്കിയതിന്റെ പ്രതികാരമെന്ന നിലയിലാണ് ഏഷ്യാനെറ്റ് വാര്‍ത്തകള്‍ എന്നാണ് സൈബര്‍ ലോകത്തെ പ്രചരണം. അതേസമയം ജോണ്‍ മാത്യു വിനുവിന്റെ ബന്ധുവാണോ എന്ന കാര്യത്തില്‍ സ്ഥിരീകരണമില്ല.

വിവിധ ഫേസ്ബുക്ക് ഗ്രൂപ്പുകളുടെ പേരിലാണ് ചാനലിനും അവതാരകനും എതിരായ ആരോപണങ്ങള്‍. ഗതാഗത വകുപ്പ് മന്ത്രി തോമസ് ചാണ്ടിയെ അസത്യം പറഞ്ഞ് നിരന്തരം വേട്ടയാടുന്ന ഏഷ്യാനെറ്റ് ന്യൂസ് ചാനലിന്റെ മുഖം മൂടി പുറത്ത് എന്നാണ് പറഞ്ഞാണ് പ്രചരണം നടക്കുന്നത്. ഏഷ്യാനെറ്റ് ന്യൂസിലെ അവതാരകനായ വിനു വി ജോണിന്റെ പിതൃ സഹോദരന്‍ അഡ്വ ജോണ്‍ മാത്യു കെഎസ്ആര്‍ടിസിയുടെ സ്റ്റാന്‍ഡിങ് കൗണ്‍സിലും ലീഗല്‍ അഡൈ്വസറും ആയിരുന്നു എന്നാണ് ഒരു നോട്ടീസില്‍ പറയുന്നത്. മറ്റൊന്നില്‍ പറയുന്നത് പിതൃസഹോദരന്റെ മകനാണ് അഡ്വ ജോണ്‍ മാത്യു എന്നാണ്. സത്യത്തില്‍ വിനുവും അഭിഭാഷകനും തമ്മിലുള്ള ബന്ധം എന്താണെന്നതില്‍ വ്യക്തതിയില്ല.

അഡ്വ ജോണ്‍ മാത്യുവിനെ ലീഗല്‍ അഡൈ്വസറായി നിയമിച്ചത് മുന്‍ ഗതാഗത വകുപ്പ് മന്ത്രി എകെ ശശീന്ദ്രന്‍ ആണ്. എന്നാല്‍ ജോണ്‍ മാത്യു ഹാജരായ കേസുകളില്‍ എല്ലാം കെഎസ്ആര്‍ടിസി തോല്‍ക്കുകയായിരുന്നു എന്നതാണ് ആരോപണം. 12 കേസുകളില്‍ ആയിരുന്നത്രെ ജോണ്‍ മാത്യു ഹാജരായത്. അതില്‍ 12 എണ്ണത്തിലും തോറ്റുകൊടുത്തു എന്നാണ് ആരോപണം. അതുകൊണ്ട് തന്നെ തോമസ് ചാണ്ടി മന്ത്രിയായപ്പോള്‍ ജോണ്‍ മാത്യുവിനെ മാറ്റി പകരം ആളെ നിയമിച്ചു. ജോണ്‍ മാത്യുവിനെ തോമസ് ചാണ്ടി സ്റ്റാന്‍ഡിങ് കൗണ്‍സില്‍ സ്ഥാനത്ത് നിന്ന് നീക്കം ചെയ്യാന്‍ ഉത്തരവിട്ടതാണ് വൈരാഗ്യത്തിന് പിന്നില്‍ എന്നാണ് ആരോപണം. അതേസമയം ഇത്തരം ന്യായീകരണ പോസ്റ്റുകളൊന്നും ചാണ്ടിക്കെതിരായ കലക്ടറുടെ റിപ്പോര്‍ട്ട് കണ്ടില്ലെന്ന് നടിക്കുകയാണ്.

ഈ ജോണ്‍ മാത്യുവിന്റെ കീഴില്‍ കെഎസ്ആര്‍ടിസി നിരന്തരമായി കേസുകള്‍ തോറ്റു തുടങ്ങിയതോടെയാണ് പിന്നീട് മന്ത്രിയായ തോമസ് ചാണ്ടി ഇടപെട്ട് മാറ്റിയത്. ഇക്കാര്യം ചൂണ്ടിക്കാട്ടിയാണ് ഏഷ്യാനെറ്റിനെതിരായ പ്രചരണങ്ങള്‍. കെഎസ്ആര്‍ടിസിക്ക് കോടികളുടെ ബാധ്യത ഉണ്ടാക്കുന്നതിനെ തുടര്‍ന്ന് സിഎംഡിയുടെ ആവശ്യപ്രകാരം സംസ്ഥാനത്തേയും പൊതുമേ സ്ഥാപനങ്ങളേയും കൊള്ളയടിക്കുന്നതിന് കൂട്ടുനില്‍ക്കാത്തതാണോ തോമസ് ചാണ്ടി ചെയ്ത കുറ്റം എന്നാണ് സൈബര്‍ ലോകത്തെ തോമസ് ചാണ്ടി ആരാധകരുടെ ചോദ്യം. 

അതേസമയം ഇത്തരം പ്രചരണങ്ങള്‍ക്ക് പിന്നില്‍ ആരാണെന്ന്‌വ്യക്തതയുമില്ല. തോമസ് ചാണ്ടി പോലും കൂടുതല്‍ കാര്യങ്ങള്‍ ഇതില്‍ തുറന്നു പറഞ്ഞിട്ടിമില്ല.