കാറില്‍ കടത്തുകയായിരുന്ന മുപ്പത്തിരണ്ട് കിലോ ചന്ദനവുമായി മൂന്ന് പേരെ കല്‍പ്പറ്റ എസ്‌ഐ എയു ജയപ്രകാശും സംഘവും പിടികൂടി. മലപ്പുറം വണ്ടൂര്‍ സ്വദേശികളായ നെല്ലിക്കുന്ന് പുളിയകുന്നന്‍വീട് റീഷാദ് റഹീം (21), കോഴിപ്പറമ്പ് മാഞ്ചേരി മുഹമ്മദ് ഷിതില്‍ (19), മാനഞ്ചേരി കളപ്പംതൊടിക ആഷിഖ് ഇര്‍ഫാന്‍ (21) എന്നിവരാണ് പിടിയിലായത്.

കല്‍പ്പറ്റ എഎസ്പിക്ക് ലഭിച്ച രഹസ്യവിവരത്തെതുടര്‍ന്ന് നടത്തിയ വാഹനപരിശോധനയിലാണ് മൂവര്‍സംഘം കുടുങ്ങിയത്. കാറിലൊളിപ്പിച്ചിരുന്ന 32 കിലോഗ്രാം ചന്ദനം പിടികൂടിയതൊടൊപ്പം തൊണ്ടി കടത്താനുപയോഗിച്ച ഇന്നോവ കാറും, മോട്ടാര്‍ സൈക്കിളും, മൊബൈല്‍ ഫോണുകളും കസ്റ്റഡിയിലെടുത്തിട്ടുണ്ട്. ചന്ദനമേഷണത്തിനായി ഇവര്‍ യുട്യൂബ് വീഡിയോകളെ ആശ്രയിച്ചിരുന്നതായി പൊലീസ് പറഞ്ഞു. യുട്യൂബില്‍ കാണുന്ന വീഡിയോയിലെ സംവിധാനങ്ങള്‍ ഉപയോഗിച്ച് ചന്ദനമരം എങ്ങനെ മുറിക്കാമെന്നും വില്‍ക്കാമെന്നും ഇവര്‍ മനസിലാക്കുകയായിരുന്നു.

ഇതുവരെ ഇവര്‍ മലപ്പുറം ഭാഗത്താണ് ചന്ദനമോഷണം നടത്തിയിരുന്നതെങ്കിലും കല്‍പ്പറ്റ ഭാഗത്തേക്ക് ആദ്യമായിട്ടാണ് സംഘം എത്തിയത്. ചന്ദനം മേഷ്ടിച്ച ശേഷം കാറില്‍ കടത്തുകയാണ് ഇവരുടെ പതിവ്. പൊലീസിന്റെ കയ്യില്‍പ്പെടാതിരിക്കനായി കാറിന് മുന്നിലായി സംഘത്തിലെ ഒരാള്‍ ബൈക്കില്‍ നിരീക്ഷണവും ഏര്‍പ്പെടുത്തിയാണ് മോഷണം നടത്തുന്നത്. ഇത്തരത്തില്‍ മോഷണം നടത്തുന്നതിനിടെയാണ് സംഘം കല്‍പ്പറ്റയില്‍ വെച്ച് പൊലീസിന്റെ വലയിലാകുന്നത്.