ബേപ്പൂരിന് സമീപം പുറംകടലില്‍ ബോട്ട് മുങ്ങിയത് കപ്പിലിടിച്ചിട്ടാതാണെന്ന് രക്ഷപ്പെട്ട തൊഴിലാളികള്‍. ബോട്ടിലുണ്ടായിരുന്ന ആറ് പേരില്‍ മൂന്ന് പേരെ രക്ഷിച്ചിരുന്നു. ഇവരാണ് അപകടത്തിന്റെ വിവരങ്ങള്‍ നല്‍കിയത്. കൊച്ചിയില്‍ നിന്നും മത്സ്യബന്ധനത്തിനു പോയ ഇമ്മാനുവന്‍ എന്ന മത്സ്യബന്ധന ബോട്ടാണ് ബേപ്പൂരില്‍ നിന്നും 50നോട്ടിക്കല്‍ മൈല്‍ അകലെ പുറംകടലില്‍ മുങ്ങിയത്. കാണാതായവര്‍ക്ക് വേണ്ടിയുളള തിരച്ചില്‍ കോസ്റ്റ് ഗാര്‍ഡും നേവിയും തുടരുകയാണ്. വ്യാഴാഴ്ച രാവിലെ പത്തരയോടെയാണ് ബോട്ട് മുങ്ങിയ വിവരം കോസ്റ്റ്ഗാര്‍ഡിന്റെ കൊച്ചിയിലെ കേന്ദ്രത്തില്‍ നിന്നും ബേപ്പൂര്‍ കോസ്റ്റ്ഗാര്‍ഡ് ആസ്ഥാനത്ത് ലഭിക്കുന്നത്.

കോസ്റ്റ് ഗാര്‍ഡിന്റെ കൊച്ചിയില്‍ നിന്നുളള ഡോണിയര്‍ എയര്‍ക്രാഫ്റ്റ് പതിവ് പരിശോധന പറക്കലിനിടെയാണ് ബോട്ട് മുങ്ങിയത് കണ്ടത്. ഇതിനിടെ സമീപത്ത് മത്സ്യബന്ധനത്തിലേര്‍പ്പെട്ടിരുന്ന ബോട്ടിലെ മീന്‍പിടുത്തക്കാര്‍ മുങ്ങിയ ബോട്ടിലെ മൂന്ന് പേരെ രക്ഷപ്പെടുത്തിയിരുന്നു. രാവിലെ വിവരമറിഞ്ഞയുടന്‍ ബോപ്പൂര്‍ കോസ്റ്റ് ഗാര്‍ഡ് ആസ്ഥാനത്ത് നിന്നും സി.404 രക്ഷാബോട്ട് ഡെപ്യൂട്ടി കമാന്‍ഡന്റ് വിനോദ്കുമാറിന്റെ നേതൃത്വത്തില്‍ പതിനഞ്ചോളം സേനാംഗങ്ങളുമായി സംഭവ സ്ഥലത്തെത്തി. ഇവരാണ് പിന്നീട് രാത്രി പത്തോടെ രക്ഷപ്പെട്ട തൊഴിലാളികളെ ബേപ്പൂര്‍ തുറമുഖത്തെത്തിച്ചത്. ഇവരെ ആശുപത്രിയിലേക്ക് മാറ്റി.

കാണാതായവര്‍ക്ക് വേണ്ടി കോസ്റ്റഗാര്‍ഡിനൊപ്പം നിരവധി മീന്‍പിടുത്ത ബോട്ടുകളിലെ തൊഴിലാളികളും രാത്രി വൈകിയും തിരച്ചിലിലേര്‍പ്പെട്ടിരിക്കുകയാണ്. കൊച്ചിയില്‍ നിന്നും നേവിയുടെ സഹായവും തേടിയിട്ടുണ്ട്. കടലിലെ കൂരിരുട്ടും പ്രതികൂല കാലവസ്ഥയും പ്രതിസന്ധി സൃഷ്ടിച്ചു. ബേപ്പൂര്‍ കോസ്റ്റ് ഗാര്‍്ഡ് ഡെപ്യൂട്ടി കമാന്‍ഡന്റ് മുഷ്ത്താഖ് അലിയുടെ മേല്‍നോട്ടത്തില്‍ അപകട വിവരമറിഞ്ഞതിനെ തുടര്‍ന്ന് ബേപ്പൂര്‍ തുറമുഖത്ത് നേരത്തെ തന്നെ രക്ഷപ്പെടുത്തി കൊണ്ടുവരുന്നവരെ ആശുപത്രിയിലെത്തിക്കുന്നതിന് ആംബുലന്‍സ് ഉള്‍പ്പെടെയുളള സൗകര്യങ്ങള്‍ ഒരുക്കിയിരുന്നു.