ജവഹര്ലാല് നെഹ്റു സര്വകലാശാലയില്നിന്ന് കാണാതായ നജീബ് അഹ്മദിന്റെ അമ്മ സി.ബി.ഐ ആസ്ഥാനത്തിനു മുന്നില് സമരം തുടങ്ങി
എ.ബി.വി.പി പ്രവര്ത്തകരുടെ മര്ദനത്തെത്തുടര്ന്ന് ജവഹര്ലാല് നെഹ്റു സര്വകലാശാലയില്നിന്ന് (ജെ.എന്.യു) കാണാതായ നജീബ് അഹ്മദിന്റെ കേസ് അട്ടിമറിക്കുന്നുവെന്നാരോപിച്ച് മാതാവ് ഫാത്വിമ നഫീസിന്റെ നേതൃത്വത്തില് സി.ബി.ഐ ആസ്ഥാനത്തിനു മുന്നില് കുത്തിയിരിപ്പ് സമരം തുടങ്ങി.
വെള്ളിയാഴ്ച ഉച്ചക്ക് തുടങ്ങിയ ഉപരോധമടക്കമുള്ള സമരത്തില് ഫാത്വിമ നഫീസിന് ഐക്യദാര്ഢ്യം പ്രഖ്യാപിച്ച് വിവിധ സര്വകലാശാലകളില് നിന്നടക്കം നൂറുകണക്കിന് ആളുകളാണ് പങ്കെടുക്കുന്നത്. േമയ് 16ന് സി.ബി.ഐ കേസ് ഏറ്റെടുത്തിട്ടും ഒന്നും ചെയ്യുന്നില്ലെന്ന് ഫാത്വിമ നഫീസ് ആരോപിച്ചു.
മൂന്ന് ഏജന്സികളാണ് മകന്റെ തിരോധാനം അന്വേഷിച്ചത്. എന്നാല്, മകനെ കണ്ടെത്താനോ മര്ദിച്ച എ.ബി.വി.പിക്കാരെ ചോദ്യംചെയ്യാനോ ഇതുവരെ ആരും തയറായിട്ടില്ല. മകന് നീതി ലഭിക്കും വരെ പോരാടും. മുതിര്ന്ന സി.ബി.ഐ ഉദ്യോഗസ്ഥര് വന്ന് കേസ് അന്വേഷണം ശരിയായ ദിശയിലാണെന്ന് ഉറപ്പുതന്നാലേ സമരം അവസാനിപ്പിക്കൂവെന്നും അവര് പറഞ്ഞു.
സമരത്തില് പങ്കെടുക്കണമെന്ന് ഡല്ഹിയിലെ വിദ്യാര്ഥികളോട് സമൂഹമാധ്യമങ്ങളിലൂടെ ഫാത്വിമ നഫീസ് ആവശ്യപ്പെട്ടു. നജീബിനെ കണ്ടെത്താന് സാധിക്കില്ലെങ്കില് കേസില്നിന്ന് പിന്മാറാന് സി.ബി.ഐ തയാറാവണമെന്ന് സമരക്കാര് ആവശ്യപ്പെട്ടു.
വരുംദിവസങ്ങളില് സി.ബി.ഐക്കെതിരെ വിവിധ സമരപരിപാടികള് സംഘടിപ്പിക്കുമെന്ന് ജെ.എന്.യു വിദ്യാര്ഥി നേതാവ് മോഹിത് പാണ്ഡെ, സാമൂഹിക പ്രവര്ത്തകന് നദീം ഖാന് എന്നിവര് പറഞ്ഞു.
നജീബിന്റെ സഹോദരന് മുജീബ്, സഹോദരി സദഫ്, ജെ.എന്.യു വിദ്യാര്ഥി നേതാക്കളായ മോഹിത് പാണ്ഡെ, കനയ്യകുമാര്, രാഹുല് സോന് പിമ്പിള്, ഉമര് ഖാലിദ്, ആര്.എസ്. വസിം, എസ്.ഐ.ഒ ദേശീയ പ്രസിഡന്റ് നഹാസ് മാള തുടങ്ങി നിരവധി പേര് സമരത്തില് പങ്കെടുക്കുന്നുണ്ട്. ഈ മാസം 16ന് നജീബിന്റെ കേസ് ഹൈക്കോടതി വീണ്ടും പരിഗണിക്കും.
https://www.facebook.com/Malayalivartha
