ദേശീയപാതയില്‍ മുട്ടത്ത് നിയന്ത്രണം വിട്ട ടാങ്കര്‍ ഇടിച്ച് മൂന്ന് പേര്‍ മരിച്ച സംഭവത്തില്‍ അപകടം സൃഷ്ടിച്ച ലോറിയും ഡ്രൈവറും പോലീസ് കസ്റ്റഡിയിലായി. രാജസ്ഥാന്‍ നാഗൂര്‍ സ്വദേശി റാം ചന്ദര്‍ (27) ആണ് ആലുവ ട്രാഫിക്ക് പൊലീസിന്റെ പിടിയിലായത്. ചേര്‍ത്തല കുത്തിയതോട് ചരക്ക് ഇറക്കിയ ശേഷം തിരികെ വരുമ്പോള്‍ ഇന്നലെ അര്‍ദ്ധരാത്രി കുമ്പളം ടോള്‍ പ്‌ളാസ പരിസരത്ത് നിന്നാണ് പിടിയിലായതെന്ന് എസ്.ഐ മുഹമ്മദ് ബഷീര്‍ പറഞ്ഞു.

മെട്രോ നിര്‍മ്മാണ തൊഴിലാളികള്‍ക്കിടയിലേക്ക് പാഞ്ഞുകയറി കളമശേരി എന്‍.എ.ഡി കോളനിയില്‍ വാടകക്ക് താമസിക്കുന്ന ഉത്തര്‍പ്രദേശ് സോനാബന്ദ്ര സ്വദേശികളായ രാം പ്യാരെയുടെ മകന്‍ സൂര്യകാന്ത് (32), മണിയാസ് മസീഹിന്റെ മകന്‍ ബബലു മസീഹ് (42), രാജ്ഘട് സ്വദേശി ബഹാരിയുടെ മകന്‍ ഉമേഷ് ബഹാരി (23) എന്നിവരാണ് മരിച്ചത്. പത്തടിപ്പാലത്ത് വാടകക്ക് താമസിക്കുന്ന ഉത്തര്‍പ്രദേശ് സ്വദേശി ഇന്ദ്രദേവിന് (22) ഗുരുതരമായി പരിക്കേല്‍ക്കുകയും ചെയ്തിരുന്നു. ഉറങ്ങിപ്പോയതാണ് അപകടകാരണമെന്നും പിന്നീട് ഭയം കൊണ്ടാണ് നിര്‍ത്താതിരുന്നതെന്നും പ്രതി പൊലീസിനോട് വെളിപ്പെടുത്തി. സെക്ഷന്‍ ഐ.പി.സി 304,308 വകുപ്പ് പ്രകാരം മനപ്പൂര്‍വ്വമല്ലാത്ത നരഹത്യക്കും ഗുരുതരമായി പരിക്കേല്‍പ്പിച്ചതിനുമാണ് കേസ്. പ്രതിയെ ഇന്ന് ഉച്ചയ്ക്ക് ശേഷം ആലുവ കോടതിയില്‍ ഹാജരാക്കുമെന്നും പൊലീസ് പറഞ്ഞു.

കസ്റ്റഡിയിലെടുത്ത ലോറി കളമശേരി എ.ആര്‍ ക്യാമ്പില്‍ സൂക്ഷിച്ചിരിക്കുകയാണ്. വ്യാഴാഴ്ച രാത്രി 12.30ഓടെ മുട്ടം തൈക്കാവില്‍ 199 ാം നമ്പര്‍ മെട്രോ തൂണിന് സമീപമാണ് അപകടം നടന്നത്. മെട്രോ നിര്‍മ്മാണ കരാറുകാരായ എല്‍ ആന്റ് ടിയിലെ തൊഴിലാളികളാണ് നാല് പേരും. നിര്‍മ്മാണം കഴിഞ്ഞ ഭാഗത്തെ തൂണുകളിലും മറ്റും ഇരിക്കുന്ന നിര്‍മ്മാണ സാമഗ്രികളുടെ ബാക്കി നീക്കം ചെയ്യുന്നതിനായിട്ടാണ് നാലംഗ സംഘം മുട്ടത്തെത്തിയത്. ഇതിനായി വാഹനങ്ങള്‍ തിരിച്ചുവിടാനുള്ള ശ്രമം നടത്തുന്നതിനിടെയാണ് അമിത വേഗത്തിലെത്തിയ ലോറി ഇവരെ ഇടിച്ചുതെറിപ്പിച്ചത്.

ആലുവയില്‍ നിന്നെത്തിയ പൊലീസാണ് ഇവരെ ആശുപത്രിയിലെത്തിച്ചത്. അപകടം വരുത്തിയ ലോറി കണ്ടെത്തുന്നതിനുള്ള ശ്രമത്തിലാണ് പൊലീസ്. ഗുജറാത്ത് രജിസ്‌ട്രേഷനിലുള്ള ജി.ജെ 0ഹ ഡി.ഇസഡ് 0587 നമ്പര്‍ ടാങ്കര്‍ ലോറിയാണ് അപകടമുണ്ടാക്കിയതെന്ന് സി.സി ടി.വി കാമറയില്‍ നിന്നും പൊലീസിന് വ്യക്തമായിരുന്നു. ഇതേതുടര്‍ന്ന് വാഹന രജിസ്റ്റര്‍ നമ്പര്‍ പ്രകാരം ഉടമയെ ബന്ധപ്പെട്ട് ലോറി ആലുവയിലെത്തിക്കാന്‍ പൊലീസ് നിര്‍ദ്ദേശവും നല്‍കിയിരുന്നു. ഇതിനിടയിലാണ് ലോറിയിലുണ്ടായിരുന്ന കെമിക്കല്‍ കുത്തിയതോട് ഇറക്കിയ ശേഷം മടക്കയാത്രയില്‍ െ്രെഡവറും വാഹനവും ടോള്‍പ്‌ളാസയില്‍ കുടുങ്ങിയത്.