എ.കെ ആന്റണിയുടെ മകന് പ്രതിരോധ ഇടപാടില് സഹായിക്കാമെന്ന് സരിതയ്ക്ക് വാഗ്ദാനം നല്കിയത് കേന്ദ്ര ഏജന്സി അന്വേഷിക്കണമെന്ന ആവശ്യം ബി.ജെ.പിയില് ശക്തമാകുന്നു
ടീം സോളാര് പദ്ധതികളുടെ പങ്കാളിത്തം പ്രതിരോധ ഇടപാടുകളില് ഉള്പ്പെടുത്താന് സഹായിക്കാമെന്ന് മുന് പ്രതിരോധമന്ത്രി എ.കെ ആന്റണിയുടെ മകന് വാഗ്ദാനം നല്കിയെന്ന സരിതാ എസ്. നായരുടെ പരാതി ബി.ജെ.പി ദേശീയ രാഷ്ട്രീയത്തില് ആയുധമാക്കുന്നു. ഇത് സംബന്ധിച്ച് കേന്ദ്ര ഏജന്സികള് അന്വേഷിക്കണമെന്ന് ബി.ജെ.പിയുടെ പല നേതാക്കളും സംഘപരിവാറുമായി ബന്ധപ്പെട്ടവരും പാര്ട്ടിയില് ഉന്നയിക്കും. ഇത്രയും ഗൗരവമായ വിഷയം സംസ്ഥാനത്തെ അന്വേഷണ സംഘത്തെ ഏല്പ്പിക്കാതെ കേന്ദ്ര ഏജന്സിയെ ഏല്പ്പിക്കണമെന്ന് എ.ബി.വി.പിയുടെ മുന് അഖിലേന്ത്യാ ഓര്ഗനൈസിംഗ് സെക്രട്ടറി സന്ദീപ് വെള്ളിയാഴ്ച ഒരു ചാനല് ചര്ച്ചയില് ആവശ്യപ്പെട്ടു. എന്നാല് ഇതേക്കുറിച്ച് താന് വ്യക്തിപരമായി ഇതുവരെ പരാതി നല്കിയിട്ടില്ലെന്ന് അദ്ദേഹം മലയാളി വാര്ത്തയോട് പ്രതികരിച്ചു.
അതേസമയം വിഷയം ശ്രദ്ധയില്പ്പെട്ടിട്ടുണ്ടെന്നും പരിശോധിച്ചിട്ട് തീരുമാനം അറിയിക്കാമെന്നും ബി.ജെ.പി സംസ്ഥാന ജനറല് സെക്രട്ടറി കെ. സുരേന്ദ്രന് പറഞ്ഞു. പാര്ട്ടി അധ്യക്ഷന് അമിത്ഷായുടെ മകന്റെ കമ്പനി വഴിവിട്ട് ലാഭം നേടിയെന്നുളള വിഷയത്തില് കോണ്ഗ്രസ് ശക്തമായ സമരപരിപാടികളുമായി മുന്നോട്ട് പോവുകയാണ്. അതിനെ പ്രതിരോധിക്കാന് മുന് പ്രതിരോധമന്ത്രിയുടെ മകനെ തന്നെ ആയുധമാക്കുമെന്നാണ് അറിയാന് കഴിയുന്നത്. അങ്ങനെയെങ്കില് ഇതിനകം ദേശീയ രാഷ്്ട്രീയത്തില് ചര്ച്ചയായ സോളാര് കേസ് കോണ്ഗ്രസിന്റെ അടിത്തറ തന്നെ ഇളക്കുന്ന ചരിത്ര സംഭവമാകും. എ.കെ ആന്റണി കേരള രാഷ്ട്രീയത്തിലും ദേശീയ രാഷ്ട്രീയത്തിലും എല്ലാ പാര്ട്ടി നേതാക്കള്ക്കും സ്വീകാര്യനായ നേതാവായതിനാല് ഒത്തുതീര്പ്പിനുള്ള ശ്രമങ്ങള്ക്കും സാധ്യതയുണ്ട്.
സാധാരണ ആന്റണിയെ പോലൊരാളുടെ മകനെതിരെ വാര്ത്തവരുമ്പോള് മുഖ്യധാരാ മാധ്യമങ്ങള് ഒതുക്കുകയാണ് പതിവ്. എന്നാല് കഴിഞ്ഞ ദിവസം പലപത്രങ്ങളും ആന്റണിയുടെ മകനെന്ന പേരില് തന്നെയാണ് വാര്ത്ത നല്കിയത്. മുതിര്ന്ന കോണ്ഗ്രസ് നേതാവിന്റെ മകനെന്നാണ് ഏഷ്യാനെറ്റ് റിപ്പോര്ട്ട് ചെയ്തത്. ഇത് സരിതയുടെ പരാതിയുടെ ഗൗരവം വര്ദ്ധിപ്പിക്കുന്നു. സരിത നല്കിയ പരാതിയോടൊപ്പം ആന്റണിയുടെ മകന്റെ ഫോണ് നമ്പറും ഉണ്ട്.
മുമ്പ് പരാതി നല്കിയെങ്കിലും അത് സര്ക്കാരോ അന്വേഷ ഏജന്സികളോ കാര്യമായി പരിശോധിച്ചില്ല. അതിനിടെ മംഗളം ചാനല് വാര്ത്ത പുറത്തുവിട്ടു. എന്നാല് ആന്റണിയുടെ രാഷ്ട്രപതി സ്ഥാനാര്ത്ഥിയായേക്കുമെന്ന് കരുതി ചിലര് നടത്തുന്ന വ്യാജപ്രചരണമാണിതെന്നാണ് അന്ന് കോണ്ഗ്രസ് നേതാക്കള് പറഞ്ഞിരുന്നത്. എന്നാല് മാറിയ രാഷ്ട്രീയ സാഹചര്യത്തില് കേസ് കേന്ദ്ര ഏജന്സികളെ കൊണ്ട് അന്വേഷിപ്പിക്കാന് രണ്ട് സാധ്യതകളാണ് ബി.ജെപിക്ക് മുന്നിലുള്ളത്. പാര്ട്ടി അധ്യക്ഷന്റെ കുടുംബത്തെയും രാജ്യത്തെ തകര്ന്ന സമ്പദ് വ്യവസ്ഥ കേന്ദ്രസര്ക്കാരിനെയും വിവാദങ്ങളില് നിന്നകറ്റി ജനശ്രദ്ധതിരിച്ചുവിടുക, 2019ലെ പാര്ലമെന്റ് തെരഞ്ഞെടുപ്പ് അടുക്കുമ്പോഴേക്കും കോണ്ഗ്രസിനെ ശിഥിലമാക്കുക.
https://www.facebook.com/Malayalivartha
