കേരളത്തില്‍ പ്രച്ഛന്ന ജിഹാദികള്‍ ധാരാളമുണ്ട്. അവര്‍ക്ക് നിയമവിരുദ്ധ മാര്‍ഗങ്ങളിലൂടെ വിദേശത്തു നിന്ന് ധാരാളം പണമെത്തുന്നുണ്ട്. പലതരം പ്രലോഭനങ്ങളിലൂടെയും മറ്റും അവര്‍ ആസൂത്രിതമായി ആളുകളെ മതംമാറ്റുന്നുണ്ടെന്നും മുതിര്‍ന്ന മാധ്യമപ്രവര്‍ത്തകനും പത്രപ്രവര്‍ത്തക യൂണിയന്‍ മുന്‍ സംസ്ഥാന കമ്മിറ്റി അംഗവുമായ അബ് ദുള്‍ മജീദ്. ആസൂത്രിത മതംമാറ്റത്തെ കുറിച്ച് യഥാര്‍ത്ഥ മതേതരവാദികള്‍ പറയാന്‍ തുടങ്ങിയിട്ട് കാലമേറെയായി. എന്നാല്‍ അതിനിടയില്‍ കയറി ഹിന്ദുത്വ വര്‍ഗീയവാദികളും ഇതൊക്കെ പറയുന്നത് ജിഹാദികള്‍ക്കു സൗകര്യമാകുകയായിരുന്നെന്നും അദ്ദേഹം ഫെയിസ്ബുക്കിലൂടെ വെളിപ്പെടുത്തുന്നു.

മതപരിവര്‍ത്തനം നടത്താറുണ്ടെന്നും വിദേശത്ത് നിന്ന് ഹവാല പണം സ്വീകരിക്കാറുണ്ടെന്നും പോപ്പുലര്‍ ഫ്രണ്ട് നേതാക്കള്‍ ഇന്ത്യാടുടേയുടെ ഒളിക്യാമറയില്‍ സമ്മതിച്ചിരുന്നു. അഥില്‍ പോപ്പുലര്‍ഫ്രണ്ട് നേതാവും തേജസ് ദിനപത്രത്തിന്റെ അസോസിയേറ്റ് എഡിറ്ററുമായ പി. അഹമ്മദ് ശരീഫ് തന്റെ സുഹൃത്താണെന്ന് പറഞ്ഞാണ് പോസ്റ്റ് തുടങ്ങുന്നത്. ഗള്‍ഫ് മേഖലയില്‍ രണ്ടു പത്രങ്ങളിലായി കുറച്ചുകാലം ഞങ്ങള്‍ ഒരുമിച്ചു പ്രവര്‍ത്തിച്ചിട്ടുണ്ട്. ഒരു പത്രത്തില്‍ ഒരുമിച്ച് ദുബായ് ഓഫീസിലും മറ്റൊരു പത്രത്തില്‍ ഞാന്‍ ജിദ്ദയിലും അദ്ദേഹം ദുബായിലും. ആ പരിചയം വച്ചു പറയട്ടെ, അദ്ദേഹം തികഞ്ഞ ഇസ്ലാമിക മതമൗലികവാദിയാണ്. ഇതൊരു കുറ്റമായി പറഞ്ഞതല്ല. അത് അദ്ദേഹത്തിന്റെ രാഷ്ട്രീയമാണ്. എനിക്ക് എന്റേതായ രാഷ്ട്രീയമുള്ളതുപോലെ അദ്ദേഹത്തിന് അദ്ദേഹത്തിന്റേതായ രാഷ്ട്രീയമുണ്ടാകുന്നത് സ്വാഭാവികം. 

അക്കാലത്ത് അദ്ദേഹം എന്‍.ഡി.എഫില്‍ അഹമ്മദ് ശരീഫ് സജീവമായിരുന്നു. ആ സംഘടന പിന്നീട് പോപ്പുലര്‍ ഫ്രന്റായി മാറിയപ്പോള്‍ അതിലേക്കു മാറിക്കാണണം. വിശ്വസിക്കുന്ന പ്രത്യയശാസ്ത്രത്തോടും പ്രസ്ഥാനത്തോടും സത്യസന്ധത പുലര്‍ത്തുന്ന ആള്‍ കൂടിയാണ് ശരീഫ്. അത്തരമൊരാള്‍ സ്വന്തം പ്രസ്ഥാനത്തിനു ദോഷകരമാകുന്ന തരത്തില്‍ കള്ളം പറയില്ല. അതുകൊണ്ടു തന്നെ പ്രസ്ഥാനത്തിന്റെ ലക്ഷ്യത്തെക്കുറിച്ചും അതിന്റെ പണമിടപാടുകളെക്കുറിച്ചുമൊക്കെ ഇന്ത്യാടുടേയുടെ ഒളിക്യാമറയില്‍ പറഞ്ഞ കാര്യങ്ങള്‍ നൂറു ശതമാനം സത്യമായിരിക്കും. അതുപോലെ അതിന്റെ വനിതാ നേതാവിലൂടെ പുറത്തുവന്ന കാര്യങ്ങളും സത്യമാവാനാണ് സാധ്യത. അവരുടെ വാക്കുകളില്‍ നിന്ന് ചില കാര്യങ്ങള്‍ വ്യക്തമാകുന്നു. 

വോട്ട് ബാങ്ക് രാഷ്ട്രീയം കളിക്കുന്ന കപട മതേതര കക്ഷികളുടെ രാഷ്ട്രീയ നീക്കങ്ങള്‍ ജിഹാദികള്‍ക്കു സംരക്ഷണ കവചമൊരുക്കുന്നുണ്ടെന്നും അബ് ദുള്‍ മജീദ് ആരോപിക്കുന്നു. അതിന്റെയൊക്കെ ആനുകൂല്യം അനുഭവിച്ച് പ്രവര്‍ത്തിച്ചുകൊണ്ടിരിക്കുന്ന ജിഹാദികളില്‍ നിന്നു തന്നെ ഇപ്പോള്‍ ആ സത്യം പുറത്തുവരുന്നു. രാജ്യത്ത് ഇസ്ലാമിക ഭരണം സ്ഥാപിക്കാന്‍ പ്രവര്‍ത്തിക്കുന്ന ധാരാളമാളുകളും അതിനുള്ള സന്നാഹങ്ങളും കേരളത്തിലുമുണ്ടെന്ന ഭീതിജനകമായ സത്യമാണ് പുറത്ത് വന്നിരിക്കുന്നതെന്നും പറഞ്ഞാണ് പോസ്റ്റ് അവസാനിപ്പിക്കുന്നത്. മുസ്ലിം സംഘടനയായ സുന്നികളുടെ മുഖപത്രമായ സുപ്രഭാതത്തിന്റെ തിരുവനന്തപുരം യൂണിറ്റിലാണ് അബ് ദുള്‍ മജീദ് ജോലി ചെയ്യുന്നത്.