ശ്രീപത്മനാഭസ്വാമി ക്ഷേത്രത്തിലെ പൈങ്കുനി ഉത്സവത്തിന് കൊടിയേറി. 31ന് രാത്രി സുന്ദരവിലാസം കൊട്ടാരത്തിന് മുന്നിലെ വേട്ടക്കളത്തില്‍ പള്ളിവേട്ട നടക്കും. ഏപ്രില്‍ ഒന്നിന് വൈകുന്നേരം ശംഖുമുഖത്തേക്കുള്ള ആറാട്ട് എഴുന്നള്ളത്തിനും ആറാട്ടിനും ശേഷം ഉത്സവത്തിന് കൊടിയിറങ്ങും. എട്ടാം ഉത്സവദിവസമായ 30ന് വൈകുന്നേരം അഞ്ചിന് അമ്പലപ്പുഴക്കാരുടെ ആചാരപ്രാകാരമുള്ള വേലകളി കിഴക്കേനടയില്‍ അരങ്ങേറും. രാത്രി 8.30ന് ഉത്സവശീവേലിയില്‍ വലിയ കാണിക്ക നടക്കും.

തന്ത്രി തരണനല്ലൂര്‍ പരമേശ്വരന്‍ നമ്പൂതിരിപ്പാടിന്റെ കാര്‍മികത്വത്തിലാണ് ഇന്നലെ ഉത്സവത്തിന് കൊടിയേറ്റിയത്. രാവിലെ തന്ത്രിക്കു പിന്നാലെ പെരിയനന്പി കൊടിക്കൂറയും കൊടിക്കയറും കിഴക്കേനടയ്ക്ക് പുറത്ത് കൊടിമരച്ചുവട്ടില്‍ എഴുന്നള്ളിച്ചു. പുണ്യാഹവും ദക്ഷിണയും കഴിഞ്ഞ് തന്ത്രിയുടെ കാര്‍മികത്വത്തില്‍ കൊടിയേറ്റ് നടന്നു.

തുടര്‍ന്ന് ശ്രീകൃഷ്ണ ക്ഷേത്രത്തിലും കൊടിയേറ്റി. രണ്ട് കൊടിക്കൂറകളിലും മധ്യത്തെ ഗരുഡരൂപം ശ്രീപത്മനാഭസ്വാമി ക്ഷേത്രം ജീവനക്കാരനായ സുരേഷ്, ക്ഷേത്രം എക്‌സിക്യൂട്ടീവ് ഓഫീസര്‍ വി. രതീശന്‍, ഭരണസമിതി ചെയര്‍മാന്‍ കെ. ബാബു, രാജകുടുംബാംഗം അവിട്ടം തിരുനാള്‍ ആദിത്യവര്‍മ, ഉദ്യോഗസ്ഥരായ ബി. ശ്രീകുമാര്‍, ഉദയഭാനു കണ്ടേത്ത്, വി. അയ്യപ്പന്‍, ഡി. അച്യുതന്‍ എന്നിവര്‍ കൊടിയേറ്റ് ചടങ്ങിന് നേതൃത്വം നല്‍കി. ഉത്സവദിവസങ്ങളില്‍ ക്ഷേത്രത്തിലെ ദര്‍ശനസമയത്തില്‍ മാറ്റമുണ്ടായിരിക്കും.
രാവിലെ 3.30 മുതല്‍ 4.45 വരെയും 6.30 മുതല്‍ ഏഴുവരെയും 8.30 മുതല്‍ 10 വരെയും വൈകുന്നേരം അഞ്ചു മുതല്‍ ആറുവരെയുമാണ് ദര്‍ശന സമയം. രാവിലെ ഒമ്പതു മുതല്‍ 11 മണിവരെ കലശാഭിഷേകത്തിന് ദര്‍ശനം അനുവദിക്കും. ആറാട്ട് ദിവസമായ ഏപ്രില്‍ ഒന്നിന് രാവിലെ 8.30 മുതല്‍ 10 മണിവരെ മാത്രമാണ് ദര്‍ശനം.