കണ്ടം നികത്താതെ ഓടിരക്ഷപെടാന് സി.പി.എം; കീഴാറ്റൂരില് എലിവേറ്റഡ് ഹൈവേ സാധ്യതതേടി സര്ക്കാര് കേന്ദ്രത്തിന് കത്തയച്ചു, വയല്ക്കിളികളുടെ സമരത്തിന് നേരെ ആക്രമണം നടത്തരുതെന്നും നിര്ദ്ദേശം
കീഴാറ്റൂരില് വയല് നികത്താതെ മേല്പ്പാലം പണിയാമോ എന്ന് ആരാഞ്ഞ് പൊതുമാരാമത്ത് മന്ത്രി ജി.സുധാകരന് കേന്ദ്ര ഗതാഗതമന്ത്രിക്കും ദേശീയപാതാ അതോറിട്ടിക്കും കത്തെഴുതിയതിന് പിന്നാലെ സി.പി.എം ഇന്ന് തുടങ്ങുന്ന സമരം ഇന്ന് തന്നെ അവസാനിപ്പിച്ചേക്കും. വയല്നികത്തുന്നതിനെതിരെ സി.പി.എം അനുകൂലികളായ നാട്ടുകാര് വയല്ക്കിളികള് എന്ന പേരില് നടത്തിവന്ന സമരത്തിന് ബദലായാണ് സി.പി.എം സമരം നടത്താന് തീരുമാനിച്ചത്. തളിപ്പറമ്പില് നിന്ന് വലിയ മാര്ച്ച് കീഴാറ്റൂരിലേക്ക് നടത്തുന്നുണ്ട്. പാര്ട്ടിഗ്രാമത്തില് അണികള്തന്നെ നേതൃത്വത്തിനെതിരെ തിരിഞ്ഞതോടെയാണ് കീഴാറ്റൂര് സമരം ശ്രദ്ധയാകര്ഷിച്ചത്.
ഇന്ന് വൈകിട്ട് 'നാടുകാവല്' എന്ന പേരില് സിപിഎമ്മും ഞായറാഴ്ച വൈകിട്ട് 'കേരളം കീഴാറ്റൂരിലേക്ക്' എന്ന പേരില് വയല്ക്കിളികളും പരിസ്ഥിതി പ്രവര്ത്തകരും കീഴാറ്റൂര് വയലിലേക്കു മാര്ച്ച് പ്രഖ്യാപിച്ചിട്ടുണ്ട്. അതിനിടെയാണ് സര്ക്കാര് സമവായത്തിന് ശ്രമിക്കുന്നത്. കേന്ദ്രസര്ക്കാര് അംഗീകരിച്ചാല് മുകള്പാലം പണിയുന്നതിന് എതിര്പ്പില്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് വ്യക്തമാക്കിയിരുന്നു. രണ്ട് കൂട്ടരുടെയും സമരം സമാധാനപരമായി നടത്താന് പൊലീസിന്റെ നേതൃത്വത്തില് നടത്തിയ ചര്ച്ചയില് ധാരണയായി. ഞായറാഴ്ചത്തെ വയല്ക്കിളികളുടെ സമരത്തിന് മൈക്ക് ഉപയോഗിക്കാനും അനുമതി നല്കി. സമരത്തില് ആരെങ്കിലും നുഴഞ്ഞ് കയറി അക്രമം നടത്താന് ശ്രമിച്ചാല് തടയുമെന്ന് വയല്ക്കിളികളുടെ നേതാവ് സുരേന്ദ്രന് അറിയിച്ചു.
ബൈപ്പാസിന്റെ അലൈന്മെന്റ് മാറ്റുന്നകാര്യം പരിഗണിക്കാമെന്ന് കേന്ദ്ര ഉപരിതല ഗതാഗത മന്ത്രി നിതിന് ഗഡ്കരി പ്രതികരിച്ചിട്ടുണ്ട്. ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരന്റെ ആവശ്യത്തെ തുടര്ന്നായിരുന്നു ഇത്. പാര്ട്ടിഗ്രാമത്തില് ബി.ജെ.പി നുഴഞ്ഞ് കയറി ഭിന്നതയുണ്ടാക്കാന് സി.പി.എം ആഗ്രഹിക്കുന്നില്ല. അതിനാല് പ്രശ്നം രമ്യതയില് പരിഹരിക്കാനാണ് നീക്കം. ഞായറാഴ്ച വയല്ക്കിളികളുടെ പരിപാടിക്കിടെ പ്രവര്ത്തകരുടെ ഭാഗത്ത് നിന്ന് അനിഷ്ടസംഭവങ്ങളോ, പ്രകോപനമോ ഉണ്ടാകരുതെന്ന് സി.പി.എം പ്രദേശിക നേതൃത്വം കര്ശനനിര്ദ്ദേശം നല്കിയിട്ടുണ്ട്. കഴിഞ്ഞയാഴ്ച സര്വേ നടത്താനെത്തിയ ഉദ്യോഗസ്ഥരെ വയല്ക്കിളികള് തടഞ്ഞപ്പോള് സിപിഎമ്മുര് ഇടപെട്ടിരുന്നു. പൊലീസ് വയല്ക്കിളികളെ അറസ്റ്റ് ചെയ്തതോടെ അവരുടെ സമരപ്പന്തല് സി.പി.എം പ്രവര്ത്തകര് കത്തിച്ചു. ഇത് പാര്ട്ടിക്ക് വലിയ ക്ഷീണമുണ്ടാക്കിയെന്ന് കണ്ണൂര് ജില്ലാ നേതൃത്വം വിലയിരുത്തുന്നു.
https://www.facebook.com/Malayalivartha
