സി.പി.എമ്മില്‍ വ്യക്തി പൂജ പാടില്ലെന്ന് വാശിപിടിക്കുന്ന മുഖ്യമന്ത്രി പിണറായി വിജയന്റെ പോസ്റ്ററിനെ ചൊല്ലി കളമശേരി പ്രാദേശിക നേതൃത്വത്തില്‍ വിവാദം. ഇഎംഎസിന്റെയും എ.കെ.ജിയുടെയും ദിനാചരണത്തിന്റെ ഭാഗമായി ഇറക്കിയ പോസ്റ്ററില്‍ പിണറായി വിജയന്റെ പടം വലുപ്പത്തില്‍ അടിച്ചതിനെതിരെ ഒരു വിഭാഗം രംഗത്തെത്തി. എന്നാല്‍ പിണറി ഭക്തര്‍ ഇതിനെ ന്യായീകരിക്കുന്നു. തൃശൂരില്‍ സംസ്ഥാന സമ്മേളനം നടന്നപ്പോള്‍ തന്റെ ചിത്രം പതിച്ച ചെങ്കൊടിയുമായി എത്തിയ പ്രവര്‍ത്തകനെ പിണറായി വിലക്കിയിരുന്നു. വി.എസ് പാര്‍ട്ടിയില്‍ വ്യക്തിപൂജ നടത്തുന്നെന്ന് ആരോപിച്ച് സി.സിയില്‍ വരെ പരാതി എത്തിയിരുന്നു. കണ്ണൂരില്‍ വ്യക്തിപൂജയുടെ പേരില്‍ ജില്ലാ സെക്രട്ടറി പി.ജയരാജനെ സംസ്ഥാന കമ്മിറ്റി ശാസിച്ചിരുന്നു.

പിണറായിയുടെ പോസ്റ്ററിനെതിരെ കളമശേരി ഫാക്ട് ബ്രാഞ്ച് കമ്മിറ്റിയാണ് രംഗത്തെത്തിയത്. ഇഎംഎസ്സിനും, എകെജിക്കും മുകളിലാണോ, പിണറായി എന്നവര്‍ പോസ്റ്റര്‍ അച്ചടിച്ച ഏര്യാകമ്മിറ്റി നേതൃത്വത്തോട് ചോദിക്കുന്നു. എകെജി ദിനാചരണ പരിപാടിയുടെ ഉദ്ഘാടകന്‍ പിണറായി വിജയനായിരുന്നു. ഇതിന് കളമശ്ശേരി ഏര്യാ കമ്മിറ്റി തയ്യാറാക്കിയ പോസ്റ്ററിലാണ് പിണറായി വിജയന്റെ ചിത്രം വളരെ വലിപ്പത്തിലും ഇഎംഎസ്സിന്റെയും എകെജിയുടെയും ചിത്രം ചെറുതായും അച്ചടിച്ചത്. പിണറായിയുടെ ഫോട്ടോ കളറിലും ഇഎംഎസ്സിന്റെയും എകെജിയുടെയും ചിത്രങ്ങള്‍ ബ്ലാക്ക് ആന്‍ഡ് വൈറ്റിലുമാണ് അടിച്ചത്. ഇത് പാര്‍ട്ടി അണികളെ ചൊടിപ്പിച്ചു.

ബ്രാഞ്ച് കമ്മിറ്റിയിലെ ചിലര്‍ പുതിയ പോസ്റ്റര്‍ അടിച്ചാണ് ഏര്യാനേതൃത്വത്തോട് പ്രതികാരം ചെയ്തത്. എ.കെ.ജിയുടെയും ഇ.എം.എസിന്റെയും പോസ്റ്റര്‍ വലുതായും പിണറായിയുടെ ചിത്രം ചെറുതായും അടിച്ചാണ് പോസ്റ്റര്‍ ഇറക്കിയത്. ഇത് പലയിടത്തും ഒട്ടിക്കുകയും ചെയ്തു.ഇതിനെ ഏര്യാകമ്മിറ്റി ചോദ്യം ചെയ്തതോടെയാണ് വിവാദം തുടങ്ങിയത്. അതേസമയം പോസ്റ്റര്‍ പിന്‍വലിക്കില്ലെന്നും വിശദീകരണം നല്‍കാന്‍ തയ്യാറാണെന്നും ബ്രാഞ്ച് നേതൃത്വം വ്യക്തമാക്കി. വ്യക്തിപൂജ പാടില്ലെന്ന പിണറായി വിജയന്റെ നിലപാടിന്റെ അടിസ്ഥാനത്തിലാണ് പോസ്റ്റര്‍ മാറ്റി അടിച്ചതെനനും അവര്‍ അറിയിച്ചു.