പേരാവൂര്‍ കണ്ണവത്ത് എ.ബി.വി.പി പ്രവര്‍ത്തകന്‍ കെ.വി.ശ്യാമപ്രസാദിനെ വെട്ടിക്കൊലപ്പെടുത്തിയ കേസിലെ പ്രതിയായ എസ്.ഡി.പി.ഐ പ്രവര്‍ത്തകന്‍ അറസ്റ്റില്‍. നീര്‍വേലി മംഗലോട്ട് നെല്ലിക്കണ്ടി ഹസീന മന്‍സിലില്‍ എം.എന്‍.ഫൈസലിനെയാണ് പേരാവൂര്‍ പൊലീസ് അറസ്റ്റ് ചെയ്തത്. കൊല്ലപ്പെടുന്ന ദിവസം ശ്യാമപ്രസാദ് ഐ.ടി.ഐയില്‍ നിന്നും പുറപ്പെട്ട വിവരം മറ്റ് പ്രതികളെ അറിയിച്ചത് കേസിലെ അഞ്ചാം പ്രതിയായ ഫൈസലാണെന്ന് പൊലീസ് വ്യക്തമാക്കി. അറസ്റ്റ് രേഖപ്പെടുത്തിയ ഇയാളെ നാളെ കോടതിയില്‍ ഹാജരാക്കും.

കഴിഞ്ഞ ജനുവരി 19നാണ് ശ്യാമപ്രസാദ് കൊല്ലപ്പെട്ടത്. കാക്കയങ്ങാട് ഐ.ടി.ഐ. മെക്കാനിക്കല്‍ എന്‍ജിനീയറിംഗ് വിദ്യാര്‍ത്ഥിയായ ശ്യാമപ്രസാദ് ക്ലാസ് കഴിഞ്ഞ് ബൈക്കില്‍ വീട്ടിലേക്ക് മടങ്ങവേയാണ് ആക്രമണം നടന്നത്. ബൈക്കില്‍ കാറിടിച്ച്‌ വീഴ്‌ത്തിയതിനെത്തുടര്‍ന്ന് ശ്യാം സമീപത്തെ വീട്ടിലേക്ക് ഓടിക്കയറിയെങ്കിലും പിന്തുടര്‍ന്നെത്തിയ അക്രമികള്‍ വെട്ടിക്കൊല്ലുകയായിരുന്നു. സംഭവം നടന്ന് രണ്ട് മണിക്കൂറിനുള്ളില്‍ തന്നെ കേസിലെ ഒന്ന് മുതല്‍ നാല് വരെ പ്രതികളായ മുഴക്കുന്ന് പാറക്കണ്ടത്തെ പുത്തന്‍ വീട്ടില്‍ മുഹമ്മദ് (35), മിനിക്കോല്‍ വീട്ടില്‍ സലീം (26), നീര്‍വേലി സമീറ മന്‍സിലില്‍ സമീര്‍(25), കീഴല്ലൂര്‍ പാലയോടിലെ മുഹമ്മദ് ഷാഹിം(39) എന്നിവരെ വയനാട്, തലപ്പുഴയില്‍ നിന്ന് പൊലീസ് കസ്റ്റഡിയില്‍ എടുത്തിരുന്നു.