നിയമസഭ നടന്നുകൊണ്ടിരിക്കെ ആഭ്യന്തരമന്ത്രി കൂടിയായ മുഖ്യമന്ത്രി പിണറായി വിജയനെ നാണം കെടുത്താനായി പോലീസുകാര്‍. മുഖ്യമന്ത്രിയും ഡിജിപിയും പോലീസുകാര്‍ ജനങ്ങളോട് മാന്യമായി പെരുമാറണമെന്ന് പറയുമ്പോഴാണ് സംഭവം. ഒറ്റ ദിവസം കൊണ്ട് മൂന്ന് പോലീസ് ഉദ്യോഗസ്ഥരാണ് നടപടി നേരിട്ടത്.

രണ്ടുപേരുടെ ജീവനെടുത്ത വാഹനപരിശോധന

വാഹനപരിശോധനയ്ക്കിടെ പോലീസിന്റെ വീഴ്ച മൂലം രണ്ടുപേര്‍ മരിച്ച സംഭവത്തില്‍ എസ്.ഐയ്ക്കു സസ്‌പെന്‍ഷന്‍. കുത്തിയതോട് പോലീസ് സ്‌റ്റേഷനിലെ എസ്.ഐ: എസ്. സോമനെയാണു കൊച്ചി മേഖലാ ഐ.ജി. അന്വേഷണ വിധേയമായി സസ്‌പെന്‍ഡ് ചെയ്തത്.

സംഭവദിവസം ഹൈവേ പട്രോളിങ് ഡ്യൂട്ടിയിലുണ്ടായിരുന്ന സി.പി.ഒമാരായ ഡി. സുരേഷ് ബാബു, ടി.എസ്. രതീഷ് എന്നിവര്‍ക്കെതിരേ വകുപ്പുതല നടപടിക്കും ഉത്തരവായിട്ടുണ്ട്. ജില്ലാ പോലീസ് മേധാവി നടത്തിയ പ്രാഥമിക അന്വേഷണത്തില്‍ ആലപ്പുഴ മുതല്‍ അരൂര്‍ വരെ ദേശീയ പാതയില്‍ പെട്രോളിങ് ഡ്യൂട്ടി ചെയ്യുന്ന ഹൈവേ പെട്രോള്‍ വാഹനത്തിന്റെ ചുമതലക്കാരനായ എസ്.ഐയ്ക്കു വീഴ്ചയുണ്ടായതായി കണ്ടെത്തിയതിനെത്തുടര്‍ന്നാണു നടപടി. കഴിഞ്ഞ 11 ന് പുലര്‍ച്ചെ ദേശീയപാതയില്‍ കഞ്ഞിക്കുഴിക്ക് വടക്ക് എ.എസ് കനാല്‍ തീരത്തായിരുന്നു അപകടം.

പോലീസ് ജീപ്പ് കുറുകെയിട്ടു തടഞ്ഞ ബൈക്കിനു പിന്നില്‍ മറ്റൊരു ബൈക്കിടിച്ചാണു രണ്ടുപേര്‍ മരിച്ചത്. കഞ്ഞിക്കുഴി പന്ത്രണ്ടാം വാര്‍ഡില്‍ കൂത്തക്കര വീട്ടില്‍ ഷേബുവും കുടുംബവും സഞ്ചരിച്ചിരുന്ന ബൈക്ക് ചേര്‍ത്തല എസ്.എന്‍. കോളജിന് മുന്നില്‍ ഹൈവേ പോലീസ് കൈകാണിച്ചെങ്കിലും ശ്രദ്ധിക്കാതെ പോയിരുന്നു. പിന്തുടര്‍ന്നെത്തിയ പോലീസ് എ.എസ്. കനാല്‍ തീരത്ത് വച്ച് ജീപ്പ് കുറുകെയിട്ടു ബൈക്ക് തടഞ്ഞു.

ഈ സമയം പിന്നാലെയെത്തിയ മറ്റൊരു ബൈക്ക് ഷേബുവിന്റെ ബൈക്കിലിടിക്കുകയായിരുന്നു. പാതിരപ്പള്ളി സ്വദേശി വിച്ചു (26), ഷേബുവിന്റെ ഭാര്യ സുമി (36) എന്നിവരാണു മരിച്ചത്.

ഷേബു (40), മക്കളായ ഹര്‍ഷ (10), ശ്രീലക്ഷ്മി (മൂന്ന്) എന്നിവര്‍ക്കു ഗുരുതരമായി പരുക്കേറ്റു. വിച്ചു സംഭവസ്ഥലത്തുവച്ചും സുമി കോട്ടയം മെഡിക്കല്‍ കോളജ് ആശുപത്രിയില്‍വച്ചുമാണു മരിച്ചത്.

ഗവര്‍ണര്‍ക്ക് വഴിയൊരുക്കാന്‍ യാത്രക്കാരന്റെ മൂക്കിനിടിച്ചു

ഗവര്‍ണര്‍ക്കു വഴിയൊരുക്കാന്‍ കാര്‍യാത്രക്കാരന്റെ മൂക്കിനിടിച്ചു പരുക്കേല്‍പ്പിച്ച സംഭവത്തില്‍ പോലീസുകാരനെ സ്ഥലംമാറ്റി. കോട്ട്ക്കല്‍ പോലീസ് സ്‌റ്റേഷനിലെ എ.എസ്.ഐ ബെന്നിയെ തിരുവനന്തപുരം സ്‌പെഷല്‍ ആംഡ് പോലീസ് ബറ്റാലിയനിലേക്കാണു മാറ്റിയത്. മൂന്നുമാസം നിര്‍ബന്ധിത പരിശീലനം പൂര്‍ത്തിയാക്കുകയും വേണം.

ശനിയാഴ്ച കോട്ടയ്ക്കല്‍ ബസ് സ്റ്റാന്‍ഡിനു സമീപമാണു സംഭവം. ഗവര്‍ണര്‍ പി. സദാശിവത്തിന്റെ വാഹനവ്യൂഹം കടന്നു പോകുന്നതിന് കാര്‍ മാറ്റിയിടണമെന്നാവശ്യപ്പെട്ടാണു യാത്രക്കാരന്റെ മൂക്കിനിടിച്ചു പരുക്കേല്‍പ്പിച്ചത്. കോട്ടയ്ക്കല്‍ കൊളത്തൂപ്പറമ്പ് ശ്രുതിയില്‍ കെ.ആര്‍. ജനാര്‍ദനാണ് (69) പരാതിക്കാരന്‍.

ഇദ്ദേഹത്തെ കോട്ടയ്ക്കല്‍ അല്‍മാസ് ആശുപത്രിയില്‍ പ്രവേശിപ്പിച്ചിരുന്നു. ഗവര്‍ണര്‍ പോയ ശേഷം കാറെടുക്കാനൊരുങ്ങുമ്പോള്‍ പോലീസുകാരന്‍ ആക്രോശിച്ചു മുഷ്ടിചുരുട്ടി മൂക്കിനിട്ട് ഇടിച്ചെന്നാണു പരാതി. രാവിലെ വീട്ടില്‍നിന്ന് സ്വാഗതമാട്ടേയ്ക്ക് പോകുമ്പോഴാണു സംഭവമെന്നും ജനാര്‍ദ്ദനന്‍ പറഞ്ഞു.

തെറി പറയുന്ന പോലീസ്

യുവാക്കളെ എസ്.ഐ. അസഭ്യം പറയുന്ന വീഡിയോ സമൂഹമാധ്യമങ്ങളിലൂടെ പ്രചരിച്ചതിനെത്തുടര്‍ന്ന്, ജില്ലാ പോലീസ് മേധാവി റിപ്പോര്‍ട്ട് തേടി. ഈരാറ്റുപേട്ട എസ്.ഐ. അസഭ്യം പറയുന്ന വീഡിയോയാണ് പ്രചരിച്ചത്. എസ്.ഐ. മഞ്ജുദാസിനെ സസ്‌പെന്‍ഡ് ചെയ്തു.

കഴിഞ്ഞദിവസം ഈരാറ്റുപേട്ടയിലൂടെ ഹെല്‍മെറ്റില്ലാതെ ബൈക്കില്‍ യാത്രചെയ്ത യുവാക്കള്‍ക്കുനേരേയായിരുന്നു അസഭ്യവര്‍ഷം. വാഹനം പിടികൂടി സ്‌റ്റേഷനിലെത്തിച്ചശേഷം ചീത്തവിളിക്കുകയായിരുന്നു.

മൊബൈലില്‍ പകര്‍ത്തിയ ദൃശ്യങ്ങളാണ് സമൂഹമാധ്യമങ്ങളിലൂടെ പ്രചരിച്ചത്. 'ഈരാറ്റുപേട്ടയിലെ ജനമൈത്രി പോലീസിന്റെ മാന്യമായ പെരുമാറ്റംഇതാണെടാ പോലീസ്' എന്ന തലക്കെട്ടോടെയാണ് വീഡിയോ ദൃശ്യങ്ങള്‍ പ്രചരിച്ചത്

യുവാക്കളെ പരസ്യമായി തെറിവിളിക്കുന്നതു വ്യക്തമായി കേള്‍ക്കാം. പോലീസുകാര്‍ മാന്യമായി സംസാരിക്കണമെന്ന് വകുപ്പുമേധാവി നിര്‍ദേശിച്ചിട്ടുള്ളതാണ്. സംഭവം സംബന്ധിച്ച് എസ്.ഐ. പ്രതികരിച്ചിട്ടില്ല..