നാലുമാസത്തെ സാമൂഹികക്ഷേമ പെന്‍ഷന്‍ കുടിശ്ശിക ഏപ്രില്‍ ആദ്യവാരം തന്നെ കൊടുത്തുതീര്‍ക്കുമെന്ന് മന്ത്രി തോമസ് ഐസക്. കര്‍ഷക പെന്‍ഷന്‍ വിതരണ ഉത്തരവ് ഇറങ്ങിയിട്ടുണ്ട്. 58 ലക്ഷം പേരാണ് ക്ഷേമപെന്‍ഷന്‍ ഗുണഭോക്താക്കള്‍. ഇതില്‍ ഇരട്ടിപ്പും അനര്‍ഹരുമുണ്ടെന്ന ആക്ഷേപത്തിന്റെ പശ്ചാത്തലത്തിലാണ് ഗുലാത്തി ഇന്‍സ്റ്റിറ്റിയൂട്ടിനെ പഠനം നടത്താന്‍ ചുമതലപ്പെടുത്തിയത്. കര്‍ഷകര്‍ തൊഴിലാളി ക്ഷേമനിധിയില്‍ വിരമിച്ചവരുടെ ആനുകൂല്യ ഇനത്തില്‍ 250 കോടിയുടെ ബാധ്യതയുണ്ട്.

ഭൂനികുതി വര്‍ധനവിലൂടെ ഈ വര്‍ഷം ലഭിക്കുന്ന തുക കുടിശ്ശിക തീര്‍പ്പാക്കുന്നതിന് വിനിയോഗിക്കും. എല്‍.ഐ.സി ഏജന്റുമാര്‍ക്ക് ക്ഷേമനിധി ഏര്‍പ്പെടുത്തുന്ന കാര്യം സര്‍ക്കാര്‍ പരിഗണിക്കും. മലയോരതീരദേശ ഹൈവേകള്‍ പൂര്‍ത്തിയാക്കാന്‍ നടപടി സ്വീകരിക്കും. തീരദേശ ഹൈവേ 12.5 മീറ്റര്‍ വീതിയിലാണ് നിര്‍മിക്കാന്‍ ഉദ്ദേശിക്കുന്നത്. എന്നാല്‍, പലയിടങ്ങളിലും ആറ് മീറ്റര്‍ മാത്രമാണ് വീതി.

നിര്‍ദിഷ്ട പദ്ധതി മേഖലയില്‍ നാലില്‍ ഒന്ന് സ്ഥലത്ത് മാത്രമാണ് 12 മീറ്റര്‍ വീതിയുള്ളത്. ഈ സ്ഥലങ്ങളില്‍ ആദ്യഘട്ടം പൂര്‍ത്തിയാക്കും. എട്ടുമീറ്റര്‍ വരെ വീതി ലഭ്യമായ സ്ഥലങ്ങള്‍ രണ്ടാമത്തെ ഘട്ടത്തില്‍ പരിഗിണിക്കും. ആരെയും കുടിയിറക്കില്ല. കേന്ദ്രാവിഷ്‌കൃത പദ്ധതികള്‍ക്കുള്ള പ്രൊജക്ട് തയാറാക്കുന്നതിന് ധനകാര്യവകുപ്പില്‍ പ്രൊജക്ട് സെല്‍ രൂപവത്കരിക്കും. കിഫ്ബി വഴി പ്രതിമാസം 10002000 കോടിയുടെ പദ്ധതികള്‍ക്ക് അനുമതി നല്‍കാന്‍ കഴിയുന്നുണ്ട് മറുപടിയില്‍ ഐസക് വ്യക്തമാക്കി.

സംസ്ഥാനത്തെ വാര്‍ഷിക പദ്ധതിയില്‍ തിങ്കളാഴ്ച വരെ 74.8 ശതമാനം ചെലവഴിക്കാന്‍ കഴിഞ്ഞതായി ധനമന്ത്രി പറഞ്ഞു. ഇതില്‍ സംസ്ഥാനത്തിന്റെ പദ്ധതി വിഹിതത്തില്‍ 74.9 ശതമാനവും തദ്ദേശസ്ഥാപനങ്ങളുടേത് 74.52 ശതമാനവുമാണ് ചെലവ്. കേന്ദ്രാവിഷ്‌കൃത പദ്ധതിയിലെ ചെലവ് 58.6 ശതമാനമാണ്. ഈ വര്‍ഷം പദ്ധതി ചെലവ് 80 ശതമാനമാകുമെന്നാണ് വിലയിരുത്തലെന്നും മന്ത്രി പറഞ്ഞു.