ദലിത് സംഘടനകള് ആഹ്വനം ചെയ്ത നാളത്തെ ഹർത്താൽ വ്യാപക അക്രമങ്ങള്ക്ക് സാധ്യത; മതതീവ്രവാദികള് ഹര്ത്താലിനെ ഹൈജാക്ക് ചെയ്യുമെന്ന് രഹസ്യാന്വേഷണ വിഭാഗം
ദലിത് സംഘനടകളുടെ ഭാരത് ബന്ദിനിടെ ഉത്തരേന്ത്യയില് നടന്ന സംഘര്ഷങ്ങളില് പ്രതിഷേധിച്ചാണ് നാളെ ദലിത് സംഘനടകൾ ഹര്ത്താലിന് ആഹ്വാനം ചെയ്തിരിക്കുന്നത്. രാവിലെ ആറുമുതല് വൈകിട്ട് ആറുവരെയാണ് ഹര്ത്താല്. പാല്, പത്രം തുടങ്ങിയ അവശ്യ സര്വീസുകളെ ഹര്ത്താലില് നിന്ന് ഒഴിവാക്കിയിട്ടുണ്ട്. എന്നാൽ ദലിത് സംഘടനകള് നാളെ നടത്താനിരിക്കുന്ന ഹര്ത്താലില് വ്യാപക അക്രമങ്ങള്ക്ക് സാധ്യതയുള്ളതായി രഹസ്യാന്വേഷണ വിഭാഗം റിപ്പോര്ട്ട്. മതതീവ്രവാദികള് ഹര്ത്താലിനെ ഹൈജാക്ക് ചെയ്യുമെന്നാണ് രഹസ്യാന്വേണ വിഭാഗത്തിന്റെ റിപ്പോര്ട്ട്.
അതിനാല് കനത്ത സുരക്ഷ പാലിക്കണം എന്ന നിര്ദേശം രഹസ്യാന്വേഷണ വിഭാഗം ഡിജിപിക്ക് കൈമാറും എന്നാണ് സൂചന. കൂടുതല് പൊലീസിനെ വിന്യസിക്കണം എന്ന നിര്ദേശവും നല്കും. ഏപ്രില് രണ്ടിനായിരുന്നു രാജ്യത്തെ വിവിധ ദലിത് സംഘടനകള് ഭാരത് ബന്ദ് നടത്തിയത്. ബന്ദിനെ തുടര്ന്നുണ്ടായ സംഘര്ഷങ്ങളില് ഉത്തരേന്ത്യയിലെ വിവിധ സംസ്ഥാനങ്ങളിലായി 12 പേര് കൊല്ലപ്പെട്ടു.
നിരവധി പേര്ക്ക് പരുക്കേല്ക്കുകയും ചെയ്തിരുന്നു. പ്രതിഷേധക്കാര്ക്ക് നേരെ പൊലീസ് നടത്തിയ വെടിവെപ്പിലായിരുന്നു 12 പേരുടെ ജീവന് പൊലിഞ്ഞത്. പട്ടികജാതിവര്ഗ (സംരക്ഷണ നിയമം) നിയമത്തില് ഭേദഗതി വരുത്തി സുപ്രിംകോടതി പുറപ്പെടുവിച്ച വിധിയില് പ്രതിഷേധിച്ചായിരുന്നു ഭാരത് ബന്ദ്.
അതേസമയം നാളെ നടക്കാനിരിക്കുന്ന ഹർത്താലിൽ സഹകരിക്കില്ലെന്ന് ബസുടമകള് അറിയിച്ചിരുന്നു. ഹര്ത്താലില് പങ്കെടുക്കേണ്ടതില്ലെന്നും അന്ന് സാധാരണരീതിയില് സര്വീസ് നടത്താനും ജില്ലാ ബസ് ഓപ്പറേറ്റേഴ്സ് അസോസിയേഷന് പ്രവര്ത്തക സമിതി യോഗത്തിന്റെ തീരുമാനം.
https://www.facebook.com/Malayalivartha
