ഉടച്ചുവാര്ക്കണം; കോണ്ഗ്രസ് നേതൃത്വത്തെ വിമര്ശിച്ച് യുവ നേതാക്കള് പരസ്യമായി രംഗത്ത്; പിജെ കുര്യനെതിരെ യുവതുര്ക്കികള്; രാജ്യസഭയിലേക്ക് പുതുമുഖങ്ങളെ പരിഗണിക്കണം
ചെങ്ങന്നൂര് ഉപതെരഞ്ഞെടുപ്പില് കോണ്ഗ്രസിനേറ്റ കനത്ത തിരിച്ചടിക്കു ശേഷം നേതൃത്വത്തിനെതിരെ നിശിതവിമര്ശനവുമായി കോണ്ഗ്രസിലെ യുവനേതാക്കള് രംഗത്തെത്തിയിരിക്കുകയാണ്. ഫേസ്ബുക്ക് പോസ്റ്റില് വി ടി ബല്റാമും ഷാഫി പറമ്പിലും നേതൃത്വത്തിനെതിരെ രംഗത്തുവന്നപ്പോള് അരുവിക്കര എംഎല്എ കെ എസ് ശബരിനാഥന് സ്വകാര്യ ചാനലിനോടാണ് നേതൃത്വത്തില് മാറ്റം വരണമെന്ന നിലപാട് പറഞ്ഞത്.
ചെറുപ്പക്കാര് പാര്ലമെന്റിലേക്ക് വന്നിട്ട് പതിറ്റാണ്ടുകളായെന്നും സാമൂഹിക, പ്രാദേശിക പശ്ചാത്തലങ്ങള് പരിഗണിക്കുമ്പോള് ഒരു വനിതയോ മുസ്ലിം ന്യൂനപക്ഷത്തിന്റെ പ്രതിനിധിയോ മലബാര് ജില്ലകളില് നിന്നുള്ള ഒരു നേതാവോ ഒക്കെ പരിഗണിക്കപ്പെടുന്നത് ഉചിതമായിരിക്കുമെന്നും ബല്റാം പറയുന്നു. ഷാനിമോള് ഉസ്മാന്, ഡോ.മാത്യു കുഴല്നാടന്, ടി.സിദ്ദിഖ്, എം ലിജു, രാജ്മോഹന് ഉണ്ണിത്താന് എന്നിവരുടെ പേരും രാജ്യസഭാ സ്ഥാനാര്ഥി സ്ഥാനത്തേക്ക് പരിഗണിക്കണമെന്നും ബല്റാം ആവശ്യപ്പെടുന്നു. വരുന്ന രാജ്യസഭാ തെരഞ്ഞെടുപ്പില് ഒരു പുതുമുഖത്തെ നിര്ബന്ധമായും പരിഗണിക്കണമെന്നാണ് ഷാഫിയും ബല്റാമും ആവശ്യപ്പെടുന്നത്. പി ജെ കുര്യന്റെ കാലാവധി ജൂലൈയില് അവസാനിക്കുകയാണ്. ഈ സാഹചര്യത്തില് ഇനി മല്സരിക്കുന്നില്ലെന്ന് പ്രഖ്യാപിക്കാന് പി ജെ കുര്യന് തയ്യാറാകണമെന്ന് ഷാഫി പറമ്പില് എം എല് എ ആവശ്യപ്പെടുന്നു. യു ഡി എഫ് കണ്വീനര് സ്ഥാനത്തു നിന്ന് പിപി തങ്കച്ചന് മാറണമെന്നും ഏറ്റവും അനുയോജ്യനായ ഒരാള് ആ സ്ഥാനത്തേക്ക് വരണമെന്നും ഷാഫി ആവശ്യപ്പെടുന്നു.
അതേസമയം,യുവത്വം മാത്രമല്ല പ്രവര്ത്തനപരിചയവും ജനങ്ങള്ക്കിടയിലുള്ള സ്വീകാര്യതയും പരിഗണിക്കണമെന്ന് എം എല് എ കെ എസ് ശബരിനാഥന് ആവശ്യപ്പെട്ടു. രാജ്യസഭയിലേക്ക് സ്ഥാനാര്ഥിയെ പരിഗണിക്കുമ്പോള് യുവത്വം മാത്രം അളവുകോലാക്കരുത്. പ്രവര്ത്തിക്കാനുള്ള ഊര്ജ്ജവും ജനങ്ങള്ക്കിടയിലുള്ള സ്വീകാര്യതയും മാനദണ്ഡമാക്കണമെന്നും ശബരിനാഥന് പറഞ്ഞു.
https://www.facebook.com/Malayalivartha
