സംസ്ഥാനത്ത്  ആരോഗ്യ വകുപ്പിന്റെ അതീവ ജാഗ്രതാ നിര്‍ദേശം. കോഴിക്കോട്, മലപ്പുറം ജില്ലകളിലാണ് ജാഗ്രത പുലര്‍ത്താന്‍ ആരോഗ്യ വകുപ്പിന്റെ നിര്‍ദ്ദേശം. നിപ വൈറസ് രോഗ ലക്ഷണങ്ങളോടെ പുതുതായി 29 പേര്‍ ചികിത്സ തേടി. അതെ സമയം പരിശോധനക്കയച്ച പഴംതീനി വവ്വാലുകളില്‍ നിപ വൈറസിന്റെ സാന്നിധ്യമില്ലെന്ന് പരിശോധനാ ഫലം. പരിശോധിച്ച 13 വവ്വാലുകളിലും നിപാ വൈറസില്ല. ഭോപാലിലെ ലാബില്‍ നിന്നുള്ളതാണ് ഫലം.

പന്തിരിക്കരയിലും സമീപപ്രദേശങ്ങളിലും നിന്നുള്ള വവ്വാലുകളിലായിരുന്നു പരിശോധന. എന്നാല്‍ ഇപ്പോഴും വവ്വാലുകളല്ല രോഗം പരത്തിയതെന്ന് ഉറപ്പിക്കാനായിട്ടില്ലെന്ന് ആരോഗ്യവകുപ്പ് വ്യക്തമാക്കി. പരിശോധനക്കയച്ച 13 വവ്വാലുകളില്‍ നിപയില്ല എന്നു മാത്രമേ ഉറപ്പിക്കാനായുള്ളൂ. ഉറവിടം കണ്ടെത്താനുള്ള പരിശോധനകള്‍ തുടരും.

ഇതോടൊപ്പം നിപ വൈറസിന്റെ പേരില്‍ സോഷ്യല്‍ മീഡിയവഴി വ്യാജ സന്ദേശങ്ങള്‍ പ്രചരിപ്പിച്ച അഞ്ച് പേരെ പോലീസ് അറസ്റ്റ് ചെയ്തു. ഫറോക്, നടക്കാവ് സ്‌റ്റേഷനുകളില്‍ റെജിസ്റ്റര്‍ ചെയ്ത കേസിലാണ് അറസ്റ്റ്. നല്ലൂര്‍ സ്വദേശികളായ വൈഷ്ണവ്, ബിവിജ്, നിമേഷ്, ബില്‍ജിത്ത്, വിഷ്ണുദാസ് എന്നിവരാണ് അറസ്റ്റിലായത്. ഡിഎംഒയുടെ ഒപ്പും സീലും വ്യാജമായി നിര്‍മ്മിച്ചവരാണ് അറസ്റ്റിലായത്. വ്യാജ സന്ദേശങ്ങള്‍ ഫോര്‍വേഡ് ചെയ്യുന്നവരെയും അറസ്റ്റ് ചെയ്യുമെന്ന് പൊലീസ് മുന്നറിയിപ്പ് നല്‍കി.

അതേ സമയം നിപ വൈറസ് സ്ഥിരീകരിച്ച മേഖലകളിലേയ്ക്കുള്ള സ്വകാര്യ ബസ് സര്‍വീസുകള്‍ നിര്‍ത്താനുള്ള തീരുമാനവുമായി ബസ് ഉടമകള്‍. നിപ പടരുന്ന സാഹചര്യത്തില്‍ ആളുകള്‍ പുറത്തിറങ്ങാത്തതിനെ തുടര്‍ന്ന് വരുമാനം ഗണ്യമായി കുറഞ്ഞ സാഹചര്യത്തിലാണ് സര്‍വീസുകള്‍ നിര്‍ത്താനുള്ള തീരുമാനത്തിലേയ്ക്ക് ഉടമകള്‍ എത്തിയത്.

പേരാമ്പ്ര, മുക്കം, കുറ്റ്യാടി എന്നിവിടങ്ങളിലൂടെ കടന്നുപോകുന്ന സ്വകാര്യ ബസുകളാണ് സര്‍വീസ് നിര്‍ത്തുന്നത്. ഇവിടങ്ങളിലുള്ളവര്‍ പുറത്തിറങ്ങുകയോ ബസില്‍ കയറുകയോ ചെയ്യുന്നില്ലെന്ന് ഉടമകള്‍ പറയുന്നു. ദിവസവും ഇന്ധനത്തിനായി ഉപയോഗിക്കുന്ന പണം പോലും തിരിച്ചു കിട്ടാത്ത സാഹചര്യത്തിലാണ് ഇത്തരമൊരു തീരുമാനത്തിലേയ്ക്ക് എത്തിയതെന്ന് ബസ് ഉടമകള്‍ കൂട്ടിച്ചേര്‍ക്കുന്നു.

ദിവസേന നിരവധി ബസുകളാണ് പേരാമ്പ്ര, മുക്കം, കുറ്റ്യാടി എന്നിവിടങ്ങളിലൂടെ കോഴിക്കോട് നഗരത്തിലേയ്ക്ക് എത്തുന്നത്. കോടതിയിലെ സീനിയര്‍ സൂപ്രണ്ട് നിപ ബാധിച്ച് മരിച്ചതിനെ തുടര്‍ന്ന് കോഴിക്കോട് ജില്ലാ കോടതിയുടെ പ്രവര്‍ത്തനവും താത്കാലികമായി നിര്‍ത്തിവച്ചിരിക്കുകയാണ്.