പത്ത് മിനിറ്റ് നീണ്ട യാത്ര മുക്കൂട്ടുതറ ടൗണില് അവസാനിച്ചു... ചെറിയ ഹാന്ഡ് ബാഗില് നിന്ന് 20 രൂപ നല്കി നടന്നു പോകുന്ന ജെസ്ന: കണ്മുന്നില് നിന്ന് മായാതെ നിക്കുന്ന ആ കാഴ്ചയെക്കുറിച്ച് ഓട്ടോ ഡ്രൈവര് സിജോ പറയുന്നു
നാടൊട്ടുക്ക് തെരയുമ്പോഴും അഭ്യൂഹങ്ങള് പരന്നപ്പോഴും തന്റെ ഓട്ടോയില് ഓടിക്കയറുന്ന കാഴ്ച മറക്കാനാകാതെ ജസ്നയുടെ തിരിച്ചുവരവിനായി സിജോയും പ്രാര്ഥിക്കുന്നു. മുക്കൂട്ടുതറ കുന്നത്ത് ജയിംസിന്റെ മകള് ജസ്നയെ കാണാതാകുന്നതിനു തൊട്ടുമുമ്പ് അവസാനമായി കണ്ടത് അയല്വാസിയും ഓട്ടോ ഡ്രൈവറുമായ കിഴക്കുങ്കര സിജോയാണ്.
മാര്ച്ച് 22 ന് ജസ്നയെ കാണാതാകുമ്പോള് സിജോയുടെ ഓട്ടോറിക്ഷയിലാണ് യാത്ര ചെയ്തത്. അന്ന് ഓട്ടോ സര്വീസ് സെന്ററില് എത്തിക്കേണ്ടതിനാല് പതിവിലും വൈകിയാണ് വീട്ടില്നിന്നു സിജോ ഓട്ടോയുമായി മുക്കൂട്ടുതയിലെ സ്റ്റാന്ഡിലേക്കു പുറപ്പെട്ടത്.
ജസ്നയുടെ വീട് കഴിഞ്ഞ് മുക്കാല് കിലോമീറ്റര് അകലെയാണ് സിജോയുടെ വീട്. ജസ്നയുടെ വീടിന്റെ സമീപത്തെ റോഡിലൂടെ ഓട്ടോയുമായി വരുമ്പോള് ഓടിയെത്തുകയായിരുന്നു ജസ്നയെന്ന് സിജോ പറയുന്നു.
ഓട്ടോയില് കയറിയ ജസ്നയോട് പരിചയമുളളതിനാല് എവിടേക്കാണ് പോകുന്നതെന്ന് സിജോ ചോദിച്ചു. പുഞ്ചവയലിലെ ആന്റിയുടെ വീട്ടിലേക്കാണെന്നായിരുന്നു മറുപടി. അധികം സൗഹൃദമില്ലാത്ത ജസ്നയുടെ പ്രകൃതം അറിയാവുന്നതിനാല് സിജോ കൂടുതലൊന്നും തിരക്കിയില്ല.
ഏകദേശം പത്തു മിനിറ്റ് നീണ്ട ആ യാത്ര മുക്കൂട്ടുതറ ടൗണില് അവസാനിച്ചു. കൈവശമുണ്ടായിരുന്ന ചെറിയ ഹാന്ഡ് ബാഗില് നിന്നും 20 രൂപ യാത്രാക്കൂലിയായി നല്കി ജസ്ന പോകുന്ന കാഴ്ച സിജോയുടെ കണ്മുമ്പില് മായാതെ നില്ക്കുകയാണ്.
ജസ്നയുടെ തിരോധാനം അറിഞ്ഞപ്പോള് സിജോ നടുങ്ങിപ്പോയി. അവസാനമായി കണ്ട വിവരം അപ്പോള്തന്നെ ബന്ധുക്കളെയും തുടര്ന്ന് പോലീസിലും നേരിട്ടെത്തി മൊഴി നല്കി അറിയിച്ചിരുന്നു. ധരിച്ചിരുന്ന വേഷം, മുഖ ഭാവം ഉള്പ്പടെ പത്ത് മിനിറ്റ് നീണ്ട യാത്രയിലെ കാര്യങ്ങള് വിവരിച്ചിരുന്നു.
മുക്കൂട്ടുതറയില്നിന്നു ബസില് എരുമേലി പ്രൈവറ്റ് സ്റ്റാന്ഡിലിറങ്ങിയ ശേഷം മുണ്ടക്കയത്തിനുള്ള ബസില് ജസ്ന സഞ്ചരിച്ചിരുന്നുവെന്ന വിവരമല്ലാതെ മറ്റൊരു സൂചനകളും അന്വേഷക സംഘത്തിന് ലഭിച്ചിട്ടില്ല. അറിയാവുന്ന സുഹൃത്തുക്കളോടെല്ലാം ജസ്നയെ കണ്ടെത്താനുള്ള ശ്രമം തുടരണമെന്ന് അഭ്യര്ഥിക്കുകയാണ് സിജോ.
ബംഗളൂരുവില് കണ്ടെന്ന വാര്ത്ത പ്രചരിച്ചപ്പോള് ഏറെ സന്തോഷിച്ചിരുന്നു. എന്നാല് അത് ജസ്നയല്ലെന്നറിയുകയും കഴിഞ്ഞ ദിവസം തമിഴ്നാട് കാഞ്ചീപുരത്ത് പെണ്കുട്ടിയുടെ പാതിയോളം കത്തിക്കരിഞ്ഞ മൃതദേഹം കിട്ടിയത് വാര്ത്തയായി മാറിയപ്പോഴും ജസ്നയുടെ ബന്ധുക്കളുടെ ദുഃഖത്തിനൊപ്പം സങ്കടത്തിലായിരുന്നു സിജോ. ജസ്ന അല്ല അതെന്ന് സ്ഥിരീകരിക്കപ്പെട്ടെങ്കിലും ഉത്തരമില്ലാതെ അവശേഷിക്കുകയാണ് രണ്ട് മാസമായി നീളുന്ന തിരോധാനം.
https://www.facebook.com/Malayalivartha
