വാട്​സ്​ ആപ്പ്​ ഹര്‍ത്താലില്‍ 385 ക്രിമിനല്‍ കേസ്​ രജിസ്​റ്റര്‍ ചെയ്​തിട്ടുണ്ടെന്ന് ​ മുഖ്യമന്ത്രി പിണറായി വിജയന്‍ നിയമസഭയെ അറിയിച്ചു. കേസുമായി ബന്ധപ്പെട്ട്​ 1595 അറസ്റ്റ് നടന്നിട്ടുണ്ടെന്നും മുഖ്യമന്ത്രി പറഞ്ഞു. അഞ്ചുപേര്‍ക്കെതിരെ ഗൂഢാലോചന കേസ് ചുമത്തിയിട്ടുണ്ട്​. ഇവര്‍ കുറ്റകരമായ ഗൂഢാലോചന നടത്തിയെന്ന് തെളിഞ്ഞു. ഇവരില്‍ മൂന്ന്​ പേര്‍ക്ക് സംഘ് പരിവാര്‍ ബന്ധമുണ്ടെന്നും മുഖ്യമന്ത്രി അറിയിച്ചു.

​ഐ .ടി രംഗത്ത് വിധ്വംസക ശക്​തികള്‍ സജീവമാണ്​. വാട്​സ്​ ആപ്പ്​ ഹര്‍ത്തല്‍ പുതിയ മുന്നറിയിപ്പാണ്​. എന്നാല്‍ സമൂഹ മാധ്യമങ്ങള്‍ വഴിയുള്ള വിദ്വേഷപ്രചാരണങ്ങള്‍ തടയാന്‍ നിയമ നടപടിക്ക് പരിമിതിയുണ്ട്. കേന്ദ്ര സര്‍ക്കാരാണ് ഇതിന്​ മുന്‍ കൈയെടുക്കേണ്ടതെന്നും വാട്​സ്​ ആപ്പ്​ ഹര്‍ത്താല്‍ ആസൂത്രണം ചെയ്തവരെ പൊലീസ് പിടികൂടിയതുകൊണ്ടാണ് കൂടുതല്‍ അപകടകരമായ തോതിലേക്ക് മാറാതിരുന്നതെന്നും മുഖ്യമന്ത്രി അറിയിച്ചു. സൈബര്‍ കേസുകള്‍ നേരിടാന്‍ സംസ്​ഥാനത്ത്​ വിപുലമായ സന്നാഹം ഒരുക്കുമെന്നും മുഖ്യമന്ത്രി അറിയിച്ചു.

ആര്‍.എസ്​.എസ്​ സ്വാധീന മേഖലകളില്‍ ക്ഷേത്രങ്ങളില്‍ സായുധ പരിശീലനം നടക്കുന്നത് ശ്രദ്ധയില്‍ പെട്ടിട്ടുണ്ട്. ഇക്കാര്യത്തില്‍ വിശ്വാസികളാണ് ഇടപെടേണ്ടത്. ആയുധ പരിശീലനത്തിനായി പ്രത്യേക സെല്ലുകള്‍ പ്രവര്‍ത്തിക്കുന്നുണ്ട്​. ആര്‍.എസ്​.എസിനു കീഴിലെ വിദ്യാലയങ്ങളില്‍ കായികപരിശീലനക്യാമ്ബ്​ നടന്നതായി ശ്രദ്ധയില്‍ പെട്ടിട്ടുണ്ട്. വിഷയത്തില്‍ നടപടിയുണ്ടാകുമെന്നും മുഖ്യമന്ത്രി പറഞ്ഞു.