നീണ്ടകരയില്‍ മത്സ്യത്തൊഴിലാളികള്‍ തമ്മിലുണ്ടായ തര്‍ക്കം സങ്കര്‍ഷത്തില്‍ കലാശിച്ചു. മത്സ്യബന്ധനത്തെച്ചൊല്ലി വള്ളക്കാരും ബോട്ടുകാരും തമ്മിലുണ്ടായ തര്‍ക്കമാണ് റോഡുപരോധത്തില്‍ വരെ എത്തിയത്. മത്സ്യതൊഴിലാളികളുടെ വള്ളങ്ങള്‍ ബോട്ടുകാര്‍ കെട്ടഴിച്ചുവിട്ടു എന്നാരോപിച്ചാണ് സംഘര്‍ഷത്തിന്റെ തുടക്കം.
പുലിമുട്ടിലെ തിരയില്‍പെട്ടും പാറക്കൂട്ടത്തിലിടിച്ചും ഏഴ് വള്ളങ്ങള്‍ പൂര്‍ണമായും തകര്‍ന്നു.
സംഭവത്തില്‍ പ്രതിഷേധിച്ച് വള്ളം ഉടമകളും മത്സ്യതൊഴിലാളികളും ചേര്‍ന്ന് നീണ്ടകര പാലം ഉപരോധിച്ചു. ഇതേ തുടര്‍ന്ന് ദേശീയപാതയില്‍ മണിക്കൂറുകളോളം ഗതാഗതം സ്തംഭിച്ചു.
നീണ്ടകര മത്സ്യബന്ധനമേഖലയില്‍ കെട്ടിയിട്ടിരുന്ന 15 ഓളം കരിയര്‍ വള്ളങ്ങളാണ് ഇന്നലെ രാത്രി കെട്ടഴിച്ച് വിട്ട നിലയില്‍ കണ്ടെത്തിയത്. ചെറിയഴീക്കല്‍, പണ്ടാരത്തുരുത്ത് സ്വദേശികളുടെ ഉടമസ്ഥതയിലുള്ള വള്ളങ്ങളാണ് അഴിച്ചുവിട്ടത്. ഇതില്‍ 7 വള്ളങ്ങള്‍ പുലിമുട്ടിന് സമീപം ശക്തമായ തിരയില്‍പെട്ട് തകര്‍ന്ന നിലയിലാണ്. .
രാവിലെ മത്സ്യബന്ധനത്തിന് പോകാനെത്തിയ തൊഴിലാളികളാണ് വള്ളങ്ങള്‍ അഴിച്ചുവിട്ട നിലയില്‍ കണ്ടെത്തിയത്.
കുളച്ചലില്‍ നിന്ന് മത്സ്യബന്ധനത്തിന് എത്തുന്ന ബോട്ടുകാരാണ് ഇതിന് പിന്നിലെന്ന് വള്ളക്കാര്‍ ആരോപിച്ചു. ഉപരോധത്തെ തുടര്‍ന്ന് പാലത്തിന് ഇരുവശത്തും കുടുങ്ങിയ യാത്രക്കാര്‍ കിലോ മീറ്ററുകളോളം നടന്ന് പാലം കടന്നാണ് മറ്റു വാഹനങ്ങള്‍ പിടിക്കാന്‍ നെട്ടോട്ടമോടിയത്. കോസ്റ്റല്‍ പൊലീസ് സ്‌റ്റേഷനില്‍ ചര്‍ച്ച നടത്തി ശക്തമായ നടപടികള്‍ കൈക്കൊള്ളാമെന്ന് ഉറപ്പ് നല്‍കിയതോടെയാണ് 9 മണിയോടെ സമരക്കാര്‍ ഉപരോധം അവസാനിപ്പിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha