കടുവയെ കിടുവ പിടിച്ചു; അഥവാ സിബിഐയെ പോലീസ്‌ പിടിച്ചു
പാലക്കാട്‌ സമ്പത്ത്‌ കസ്റ്റഡിമരണകേസില്‍ മാനസികാസ്വാസ്ഥ്യത്തെ തുടര്‍ന്ന്‌ ആത്മഹത്യ ചെയ്ത സിബിഐ ഉദ്യോഗസ്ഥന്‍ ഹരിദത്തിനെ ആത്മഹത്യയ്‌ക്ക്‌ പ്രേരിപ്പിച്ചത്‌ സഹപ്രവര്‍ത്തകരാണെന്ന്‌ ക്രൈംബ്രാഞ്ച്‌ കണ്ടെത്തല്‍. ഹരിദത്തിനൊപ്പം അന്വേഷണസംഘത്തിലുണ്ടായിരുന്ന ഉണ്ണികൃഷ്‌ണന്‍നായര്‍ക്കും രാജനുമെതിരെയാണ്‌ ക്രൈംബ്രാഞ്ച്‌ കുറ്റപത്രം നല്‍കുന്നത്‌. സംസ്ഥാന ചരിത്രത്തില്‍ ആദ്യമായാണ്‌ ഒരു കേസന്വേഷണസംഘത്തലവന്‍ സഹപ്രവര്‍ത്തകരുടെ പീഡനം കാരണം ആത്മഹത്യ ചെയ്‌തത്‌. ഇവരെ പ്രോസിക്യൂട്ട്‌ ചെയ്യാനുള്ള അനുമതിക്ക്‌ ക്രൈംബ്രാഞ്ച്‌ സിബിഐ ഉന്നതരെ സമീപിച്ച്‌ കഴിഞ്ഞു.
ഫലത്തില്‍ അന്വേഷണ മികവിന്‌ പേരുകേട്ട സിബിഐയെ സംസ്ഥാന പോലീസ്‌ കുടുക്കിട്ട്‌ പിടിച്ചിരിക്കുകയാണ്‌; കടുവയെ കിടുവ പിടിച്ചു എന്ന മട്ടില്‍.
സിബിഐ അനുമതി ലഭിച്ചാല്‍ മാത്രമേ ക്രൈം ബ്രാഞ്ചിന്‌ പ്രോസിക്യൂഷന്‍ നടപടികള്‍ സ്വീകരിക്കാന്‍ കഴിയുകയുള്ളൂ. ഇതു രണ്ടാം തവണയാണ്‌ സിബിഐ സംസ്ഥാനത്ത് വിമര്‍ശന വിധേയമാകുന്നത്‌. കേസന്വേഷണത്തിന്‌ എറണാകുളം സര്‍ക്കാര്‍ റസ്റ്റ്‌ ഹൗസില്‍ താമസിക്കുന്ന സിബിഐ ഉദ്യോഗസ്ഥര്‍ വാടക നല്‍കാന്‍ തയ്യാറാകാത്തത്‌ വിവാദമായിരുന്നു. സര്‍ക്കാര്‍ ഇക്കാര്യത്തില്‍ സിബിഐക്കെതിരെ നിയമനടപടികളിലേക്ക്‌ നീങ്ങുകയാണ്‌.
2012 മാര്‍ച്ച്‌ 15 നാണ്‌ ഹരിദത്ത്‌ എറണാകുളം നായരമ്പലത്തെ വീട്ടില്‍ തൂങ്ങി മരിച്ച നിലയില്‍ കണ്ടെത്തിയത്. സമ്പത്തിന്റെ കസ്റ്റഡിമരണത്തിന്‌ ഉത്തരവാദി ഉയര്‍ന്ന സിവില്‍സര്‍വീസസ്‌ ഉദ്യോഗസ്ഥരാണെന്ന കണ്ടെത്തല്‍ പുറത്തു വരാനിരിക്കെയായിരുന്നു ആത്മഹത്യ. മുതിര്‍ന്ന്‌ ഐ.പി.എസ്‌ ഉദ്യോഗസ്ഥരായ മുഹമ്മദ്‌ യാസിന്‍, വിജയ്‌സാവന്ന എന്നിവര്‍ സമ്പത്ത്‌ വധക്കേസില്‍ ആരോപണവിധേയരാണ്‌. ഇവരെ അറസ്‌റ്റ്‌ ചെയ്യാന്‍ ഹരിദത്ത്‌ വാറന്റ്‌ വാങ്ങിയിരുന്നെങ്കിലും പിന്നീട്‌ മടക്കേണ്ടി വന്നു. വാറന്റ്‌ മടക്കേണ്ടി വന്നത്‌ സിബിഐ ഉദ്യോഗസ്ഥരുടെ ഇടപെടല്‍ കാരണമാണെന്നായിരുന്നു ഹരിദത്ത്‌ പറഞ്ഞത്‌.
ഹരിദത്തിന്റെ മരണശേഷം അന്വേഷണ ചുമതല ഉദ്യോഗസ്ഥന്‍ ഐ.പി.എസ്‌ ഉദ്യോഗസ്ഥരെ ഒഴിവാക്കിയിരുന്നു. എന്നാല്‍ സംശയം തോന്നിയ കോടതി കുറ്റപത്രം മടക്കി. തുടര്‍ അന്വേഷണം വേണമെന്നും കോടതി ഉത്തരവിട്ടിരുന്നു.
സംഭവം വിവദമായതോടെ സംസ്ഥാന പോലീസിനെ കൈയിലെടുക്കാന്‍ സിബിഐ ശ്രമിച്ചിരുന്നു. സ്വന്തം ഉദ്യോഗസ്ഥരെ രക്ഷിക്കാനുള്ള ശ്രമമാണ്‌ സിബിഐ നടത്തിയത്. ഹരിദത്താകട്ടെ സത്യസന്ധമായി പ്രവര്‍ത്തിച്ചിരുന്നു. ഒരു ഐ.എ.എസ്‌ ഉദ്യോഗസ്ഥന്റെ സഹോദരിയെയാണ്‌ സമ്പത്ത്‌ മോഷണത്തിനുവേണ്ടി കൊന്നത്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
