മകളെക്കൊണ്ട് മാപ്പു പറയിച്ച് ക്രിമിനല് കേസില് നിന്ന് തലയൂരാന് രഹസ്യ ഫോര്മുല... അന്വേഷണം മുന്നോട്ട് പോകും തോറും എ.ഡി.ജി.പി. സുദേഷ് കുമാറിന്റെ കൂടുതല് കള്ളക്കളികള് പുറത്ത്; നീക്കങ്ങള് പൊളിഞ്ഞതോടെ കേസ് എങ്ങനെയും ഒതുക്കിത്തീര്ക്കാന് അണിയറനീക്കം ശക്തമായി
ഏറെ വിവാദമുണ്ടാക്കിയ പോലീസ് ഡ്രൈവര് ഗവാസ്കറെ എ.ഡി.ജി.പി. സുദേഷ്കുമാറിന്റെ മകള് മര്ദിച്ച കേസ് വഴിത്തിരിവിലേക്ക്. എങ്ങനെയും കേസ് ഒതുക്കിത്തീര്ക്കാന് അണിയറനീക്കം ശക്തമായി. എ.ഡി.ജി.പിയുടെ മകളെക്കൊണ്ടു മാപ്പു പറയിച്ച് ക്രിമിനല് കേസില്നിന്നു തലയൂരാനുള്ള രഹസ്യ ഫോര്മുലയാണ് ഉന്നതോദ്യോഗസ്ഥതലത്തില് തയാറായത്. കാര് യാത്രികനെ കെ.ബി. ഗണേഷ്കുമാര് എം.എല്.എ. മര്ദിച്ച കേസ് മാപ്പില് ഒതുക്കിയതിനു പിന്നാലെയാണ് ഐ.പി.എസ്. പുത്രിവിവാദവും അതേ ക്ലൈമാക്സിലേക്കു നീങ്ങുന്നത്. ഗണേഷ്കുമാറിനെ രക്ഷിക്കാന് രാഷ്ട്രീയസാമുദായിക നേതൃത്വങ്ങളാണു രംഗത്തിറങ്ങിയതെങ്കില് ഐ.പി.എസ്. പുത്രിയുടെ കാര്യത്തില് അഞ്ചംഗ ഐ.പി.എസ്. സംഘമാണു ചരടുവലിക്കുന്നത്.
തലസ്ഥാനത്തെ ഒരു ഐ.ജിയുടെ നേതൃത്വത്തിലാണ് ഗവാസ്കര്ക്കു മര്ദനമേറ്റ കേസ് മാപ്പുപറഞ്ഞ് ഒതുക്കാനുള്ള നീക്കം. ഗവാസ്കറെ അനുനയിപ്പിക്കാന് മറ്റൊരു എ.ഡി.ജി.പിയെ ചുമതലപ്പെടുത്തിയതായും സൂചനയുണ്ട്. കേസില് കര്ശന നടപടി സ്വീകരിക്കണമെന്ന നിലപാടിലാണു മുഖ്യമന്ത്രിയും സംസ്ഥാന പോലീസ് മേധാവി ലോക്നാഥ് ബെഹ്റയും. എന്നാല്, ഐ.പി.എസ്. അസോസിയേഷന് ഇക്കാര്യത്തില് ഇടഞ്ഞുനില്ക്കുകയാണ്. സിവില് സര്വീസ് പരീക്ഷയ്ക്കു തയാറെടുക്കുന്ന ഐ.പി.എസ്. പുത്രിയുടെ ഭാവിയിലാണ് ഐ.പി.എസ്. ലോബിയുടെ ആശങ്ക.
സംഭവ ദിവസം ഗവാസ്കറല്ല കാറോടിച്ചതെന്നു വരുത്തിത്തീര്ക്കാനുള്ള ആസൂത്രിതനീക്കവും ക്രൈംബ്രാഞ്ച് പൊളിച്ചതോടെയാണ് അറ്റകൈക്കു മാപ്പുപറഞ്ഞ് തലയൂരാനുള്ള ശ്രമം. ഡ്യൂട്ടി ബുക്കില് തിരിമറി നടത്തി, മറ്റൊരു െ്രെഡവറുടെ പേര് എഴുതിച്ചേര്ക്കാനായിരുന്നു നീക്കം. വാഹനത്തിന്റെ ടയര് കാലിലൂടെ കയറ്റിയിറക്കിയെന്നാണു സുദേഷ്കുമാറിന്റെ മകള് ക്രൈംബ്രാഞ്ചിനു നല്കിയ മൊഴി. സംഭവം നടന്ന 14നു രാവിലെ എ.ഡി.ജി.പിയുടെ വീട്ടിലെ ഡ്യൂട്ടി ബുക്കില് ജെയ്സണ് എന്ന പോലീസ് ഡ്രൈവറുടെ പേരാണു രേഖപ്പെടുത്തിയിരുന്നത്. എന്നാല്, താന് ആ സമയത്തു വാഹനം ഓടിച്ചിരുന്നില്ലെന്നു ജെയ്സണ് ക്രൈംബ്രാഞ്ചിനു മൊഴി നല്കി. ഗവാസ്കറെ ആശുപത്രിയില് പ്രവേശിപ്പിച്ചശേഷമാണു താന് വാഹനമെടുത്തതെന്നു ജെയ്സണ് വെളിപ്പെടുത്തിയതോടെ ആ തന്ത്രവും പാളി.
ഗവാസ്കറുമായി അന്വേഷണസംഘം സംഭവം നടന്ന കനകക്കുന്നില് തെളിവെടുപ്പു നടത്തി. എ.ഡി.ജി.പിയുടെ മകള്ക്കെതിരേ ശക്തമായ തെളിവുകള് ലഭിച്ചെങ്കിലും അറസ്റ്റിന് അന്വേഷണസംഘം മടിക്കുകയാണ്. പോലീസുകാരിയെക്കൊണ്ടു പീഡനപരാതി നല്കിച്ച് ഗവാസ്കറെ കുടുക്കാനും ശ്രമം നടന്നു. സംഭവദിവസത്തെ സി.സി. ടി.വി ദൃശ്യങ്ങള് പരിശോധിക്കുന്ന കാര്യത്തിലും അലംഭാവമുണ്ട്. മോട്ടോര് വാഹനവകുപ്പും ക്രൈംബ്രാഞ്ചും സംയുക്തപരിശോധന നടത്തിയെങ്കിലും എ.ഡി.ജി.പിയുടെ മകള് പറഞ്ഞപ്രകാരമുള്ള അപകടം നടന്നതിന്റെ ലക്ഷണങ്ങള് കണ്ടെത്താനായില്ല.
https://www.facebook.com/Malayalivartha
