അങ്ങനെ താരസംഘടനായയ അമ്മ വീണ്ടും ദിലീപിന്റെ കാല്‍ക്കീഴിലായി. ഇടവേളബാബുവിനെയും സിദ്ധിഖിനെയും പോലുള്ള ഡമ്മികളെ മുന്‍നിര്‍ത്തി ഗ്യാലറിയിലിരുന്ന് ദിലീപ് കളിനിയന്ത്രിച്ചു. ഇങ്ങിനെ പോയാല്‍ കളി കുരുതിക്കളമാകുമെന്ന് മുന്‍കൂട്ടിക്കണ്ട് മമ്മൂട്ടി യോഗത്തില്‍ പങ്കെടുത്തില്ല. അതിനും മുമ്പേ എല്ലാ ഭാരവാഹിത്വവും ഒഴിഞ്ഞു. ഇനി വെറും മെമ്പര്‍ മാത്രമായിരിക്കും. മകന്‍ ഇന്‍ഡസ്ട്രിയില്‍ നില്‍ക്കുന്നതും മറ്റ് ചില താരങ്ങളുടെ സമ്മര്‍ദ്ദവും കാരണം കടുത്തനിലപാടുകളിലേക്ക് മമ്മൂട്ടി കടന്നില്ലെന്ന് സിനിമാവൃത്തങ്ങള്‍ മലയാളിവാര്‍ത്തയോട് പറഞ്ഞു. ഇന്നലെ പൊതുയോഗം കഴിഞ്ഞ് നിര്‍വാഹകസമിതി ചേര്‍ന്നെങ്കിലും കാര്യമായ തീരുമാനങ്ങളൊന്നും ചായ കുടിച്ച് പിരിഞ്ഞതല്ലാതെ കാര്യമായ തീരുമാനങ്ങള്‍ എടുത്തില്ല. 

വെട്ടിനിരത്തല്‍ അമ്മയിലും

കൊച്ചിയില്‍ നടിയെ ആക്രമിക്കപ്പെട്ട സംഭവത്തിന് പിന്നാലെ ദിലീപിനെ സംഘനയില്‍ നിന്ന് പുറത്താക്കാന്‍ വാശിപിടിച്ച യുവതാരങ്ങളെ ഇത്തവണത്തെ തെരഞ്ഞെടുപ്പില്‍ ദിലീപ് വെട്ടിനിരത്തി. പൃഥ്വിരാജും നിവിന്‍പോളിയും ഉള്‍പ്പെടെ അതിലുണ്ട്. അതേസമയം ദിലീപിനെതിരെ പര്യമായി വിമര്‍ശനം നടത്തുകയും പിന്നീട് തിരുത്തിപ്പറയുകയും ചെയ്ത ആസിഫ് അലിയ നിര്‍വാഹകസമിതിയില്‍ നിലനിര്‍ത്തുകയും ചെയ്തു. ദിലീപിന്റെ നിര്‍ദ്ദേശപ്രകാരമാണ് ഇടവേളബാബു പുതിയ പാനല്‍ അവതരിപ്പിച്ചത്. മോഹന്‍ലാല്‍ പ്രസിഡന്റാവാന്‍ താല്‍പര്യം പ്രകടിപ്പിച്ചതോടെ മറ്റ് ഭാരവാഹികളെ ദിലീപ് ദിലീപ് ഇടപെട്ട് തീരുമാനിക്കുകയായിരുന്നു. സംഘടനയുടെ തലപ്പത്ത് എത്താനും ഏറ്റുമുട്ടലിന് താല്‍പര്യമില്ലാത്തതിനാലും യുവതാരങ്ങള്‍ മല്‍സരരംഗത്ത് ഉണ്ടായിരുന്നില്ല. തങ്ങളുടെ പ്രതിഷേധം ശക്തമായി അറിയിക്കുന്നതിന്റെ ഭാഗമായി ഭൂരിപക്ഷം അംഗങ്ങളും യോഗത്തില്‍ പങ്കെടുത്തുമില്ല. 

ഊര്‍മിള ഉണ്ണിയുടെ ബുദ്ധി ആരുടേത്? 

നടി ആക്രമിക്കപ്പെട്ട സംഭവത്തിന്റെ തുടക്കംമുതല്‍ ദിലീപിനെ പിന്തുണച്ചിരുന്ന നടി ഊര്‍മിള ഉണ്ണിയും ഗണേഷ്‌കുമാറും ദിലീപിന്റെ ഓപ്പറേഷന്റെ ഭാഗമായി. ദിലീപിനെ സംഘടനയില്‍ തിരിച്ചെടുക്കണമെന്ന ആവശ്യം ഊര്‍മിള ഉണ്ണിയെ കൊണ്ട് ഇടവേളബാബു പറയിപ്പിക്കുകയായിരുന്നെന്നാണ് താരങ്ങളുടെ ഇടയിലെ രഹസ്യസംസാരം. പൊതുയോഗത്തില്‍ ഊര്‍മിള ഉണ്ണി ഇക്കാര്യം ഉന്നയിച്ചപ്പോള്‍ പുറത്താക്കിയ മമ്മൂട്ടിയും മോഹന്‍ലാലും വെട്ടിലായി. ഇതെല്ലാം ഇരുവരും മുന്‍കൂട്ടി കണ്ടിരുന്നതിനാല്‍ മൗനംപാലിച്ചു. ട്രഷററായി സംഘടനയിലേക്ക് ശക്തമായി ജഗദീഷ് തിരിച്ചുവന്നെങ്കിലും മോഹന്‍ലാലും ഗണേഷും ഉള്‍പ്പെടെയുളളവരുമായി അകലംപാലിച്ചു എന്നത് ശ്രദ്ധേയമായി. 

അടി തുടരും...

ഗണേഷ്‌കുമാറും ജഗദീഷും പത്തനാപുരത്ത് മത്സരിച്ചതിനെ തുടര്‍ന്ന് സംഘടനയിലുണ്ടായ വിവാദങ്ങളെ തുടര്‍ന്നാണ് ജഗദീഷും മോഹന്‍ലാലും തമ്മില്‍ അഭിപ്രായവ്യത്യാസം ഉടലെടുത്തത്. ഇക്കാര്യം ജഗദീഷ് പര്യമായി പറഞ്ഞു. മോഹന്‍ലാല്‍ ചെയ്തത് ശരിയായില്ലെന്ന് സലിംകുമാര്‍ പരസ്യമായി പറയുകയും ചെയ്തു. പിന്നീട് പ്രശ്‌നം ആറിത്തണുത്തെങ്കിലും ഇതുവരെ പൂര്‍ണമായും പരിഹരിച്ചിട്ടില്ല. ജഗദീഷിനെ സിനിമകളില്‍ നിന്ന് ഒഴിവാക്കുന്ന സാഹചര്യം പോലും സംജാതമായിരുന്നു. ആ സ്ഥിതിക്ക് ജഗദീഷും മോഹന്‍ലാലും ഗണേഷ്‌കുമാറും ഒരു കമ്മിറ്റിയില്‍ ഭാരവാഹികളായിരുന്നാലുണ്ടാകാവുന്ന പ്രശ്‌നങ്ങള്‍ ഊഹിക്കാവുന്നതേയുള്ളൂ. ഇതെല്ലാം മുന്‍കൂട്ടി കണ്ടാണ് മമ്മൂട്ടി ഊളിയിട്ടത്. 

യുവതാരങ്ങള്‍ക്ക് സംഘടന വേണ്ട, സിനിമ മതി

യുവതാരങ്ങളുടെ സിനിമകളെ പരാജയപ്പെടുത്താന്‍ പലവിധത്തില്‍ പല പണികളും ചെയ്തിട്ടുള്ള ദിലീപ് നിയന്ത്രിക്കുന്ന സംഘടനയുമായി സഹകരിക്കാന്‍ പൃഥ്വിരാജ്, ഇന്ദ്രജിത്ത്, നിവിന്‍പോളി, ടൊവിനോ തോമസ്, ഫഹദ് ഫാസില്‍ തുടങ്ങി നിരവധി പേര്‍ തയ്യാറല്ല. നടിമാരുടെ കാര്യവും വ്യത്യസ്തമല്ല. മഞ്ജുവാര്യര്‍ക്കൊപ്പം ഒരു വലിയ താരനിര തന്നെയുണ്ട്. വിമന്‍ ഇന്‍ കളക്ടീവ് ഭാരവാഹികളാരും ഇന്നലത്തെ പൊതുയോഗത്തില്‍ പങ്കെടുത്തില്ല എന്നത് ശ്രദ്ധേയമാണ്. ഇവരാരും പുതിയ സംഘടന രൂപീകരിക്കാന്‍ ആഗ്രഹിക്കുന്നില്ല. പകരം നിസഹകരണമാണ് ലക്ഷ്യമിടുന്നത്.

ദിലീപ് മടങ്ങിവരില്ല

ദിലീപിനെ മടക്കിക്കൊണ്ടുവരാന്‍ നീക്കം നടക്കുന്നുണ്ടെങ്കിലും അതൊരു നമ്പര്‍ മാത്രമാണെന്നാണ് അറിയുന്നത്. വിശദീകരണം പോലും ചോദിക്കാതെ ദിലീപിനെ പുറത്താക്കി എന്ന ന്യായം പറഞ്ഞാണ് തിരിച്ചെടുക്കാന്‍ ശ്രമിക്കുന്നത്. ഇക്കാര്യത്തില്‍ ദിലീപിന്റെ അഭിപ്രായം ചോദിക്കുമെന്നാണ് മറ്റൊരു വാദം. എന്നാല്‍ താന്‍ കൂടി ശക്തമാക്കിയ സംഘടന നോട്ടീസ് പോലും നല്‍കാതെ തന്നെ പുറത്താക്കിയതിനാല്‍ ഇനി പ്രവര്‍ത്തിക്കാന്‍ ആഗ്രഹിക്കുന്നില്ലെന്ന വാദമായിരിക്കും ദിലീപ് മുന്നോട്ട് വയ്ക്കുക. അങ്ങനെ പുറത്താക്കല്‍ നടപടി ശരിയായില്ലെന്നും അത് ചിലരുടെ അജണ്ടയായിരുന്നെന്നും വരുത്തിത്തീര്‍ക്കാനാണ് ശ്രമം. എന്നിട്ട് കാര്യങ്ങള്‍ പിന്‍സീറ്റിലിരുന്ന് നിയന്ത്രിക്കും. ഇതെല്ലാം അറിയാവുന്ന ഒരു മുതിര്‍ന്ന നടന്‍ ഇന്നലത്തെ യോഗം കഴിഞ്ഞ് പറഞ്ഞ കമന്റ് ഇതാണ് - കളളനെ നമ്പിയാലും കുള്ളനെ നമ്പരുതെന്ന് പണ്ടാരാണ്ട് പറഞ്ഞത് ചുമ്മാതല്ല!