നെല്ലിക്കുഴിയില്‍ പേവിഷബാധയേറ്റ ഒരു ഗര്‍ഭിണി പശുവിനെ വെടിവച്ചു കൊന്നു. കാപ്പുചിറ കാപ്പുചാലില്‍ അബുവിന്റെ എട്ട്മാസം ഗര്‍ഭിണിയായ പശുവിനെയാണ് വെടിവച്ചു കൊല്ലേണ്ടി വന്നത്. അബുവിന് മറ്റ് രണ്ട് പശുക്കളും ഒരു കിടാരിയും (ക്ടാവും) ഉണ്ട്. ഇവയെ തൊഴുത്തിലാണ് കെട്ടിയിരുന്നത്. കഴിഞ്ഞ വെള്ളിയാഴ്ച പശുവിന് നായുടെ കടിയേറ്റതായാണ് സംശയിക്കുന്നത്.

ശനിയാഴ്ച പശു അസ്വസ്ഥത പ്രകടിപ്പിച്ചതിനെ തുടര്‍ന്ന് വെറ്റിനറി ഡോക്ടറെ കൊണ്ടുവന്ന് പരിശോധന നടത്തിയിരുന്നു. എന്നാല്‍ പേവിഷബാധയുടെ ലക്ഷണങ്ങള്‍ മനസിലായിരുന്നില്ല.എന്നാല്‍ ഇന്നലെ രാവിലെ മുതല്‍ പശുവിന്റെ വായില്‍ നിന്ന് നുരയും പതയും വരികയും അക്രമാസക്തമാകുകയും ചെയ്തതോടെയാണ് പേവിഷബാധ സംശയിച്ചത്.

രോഗലക്ഷണങ്ങള്‍ മൂര്‍ച്ഛിച്ചതോടെ ഡോക്ടറെ കൊണ്ടുവന്ന് പരിശോധിപ്പിച്ച് പേവിഷബാധ സ്ഥിരീകരിക്കുകയായിരുന്നു. അഞ്ച് മാസം മുമ്പ് 40000 രൂപ നല്‍കി വാങ്ങിയ പശുവിനാണ് പേവിഷബാധയേറ്റത്. പോലീസില്‍ വിവരം അറിയച്ചതനുസരിച്ച് പശുവിനെ വെടിവച്ച് കൊല്ലാന്‍ തീരുമാനിച്ചു.പോലീസ് നിര്‍ദേശപ്രകാരം ലൈസന്‍സ് തോക്കുള്ള കുത്തുകുഴി സ്വദേശി എത്തി വൈകുന്നേരം പശുവിനെ വെടിവച്ചു കൊന്നു.

ജഡം മറവ് ചെയ്തു. അബുവും ഭാര്യ റഷീദക്കും ഇവരുടെ രണ്ട് പശുക്കള്‍ക്കും കിടാരിക്കും പ്രതിരോധകുത്തിവയ്‌പ്പെടുത്തു.മെഡിക്കല്‍ സംഘം ഇന്ന് സ്ഥലം സന്ദര്‍ശിച്ച് സ്ഥിതിഗതി വിലയിരുത്തും.പശുവിന് പേവിഷബാധയേറ്റ സംഭവം പ്രദേശത്ത് ആശങ്ക സൃഷ്ടിച്ചിട്ടുണ്ട്.പശുവിനെ കടിച്ച നായയെ കണ്ടെത്താനായിട്ടില്ല. പേപിടിച്ച നായ മറ്റേതെങ്കിലും വളര്‍ത്തുമൃഗങ്ങളെ കടിച്ചിട്ടുണ്ടോയെന്ന സംശയം ജനങ്ങളില്‍ ഭീതിപടര്‍ത്തിയിട്ടുണ്ട്.