നോയിഡയില്‍ രണ്ട് കെട്ടിടങ്ങള്‍ തകര്‍ന്നുണ്ടായ അപകടത്തില്‍ 66 മണിക്കൂര്‍ നീണ്ട രക്ഷാ പ്രവര്‍ത്തനം അവസാനിപ്പിച്ചതായി ദേശീയ ദുരന്തനിവാരണ അതോറിറ്റി അറിയിച്ചു. വെളളിയാഴ്ച വൈകുന്നേരത്തോടെയാണ് രക്ഷാപ്രവര്‍ത്തനങ്ങള്‍ അവസാനിപ്പിച്ചത്. ആറ് പുരുഷന്മാരും രണ്ട് സ്ത്രീകളും ഒന്നര വയസുളള പെണ്‍കുഞ്ഞുമടക്കം ഒന്‍പത് പേരുടെ മൃതദേഹങ്ങള്‍ കെട്ടിടത്തിന്റെ അവശിഷ്ടങ്ങള്‍ക്കിടയില്‍ നിന്നും കണ്ടെത്തി.

ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് ഗൗതം ബുദ്ധ നഗര്‍ ഡി എം യോട് രക്ഷാപ്രവര്‍ത്തനത്തിന് നേതൃത്വം നല്‍കാന്‍ നിര്‍ദ്ദേശം നല്‍കിയിരുന്നു. നേപ്പാള്‍, കേദാര്‍നാഥ് ഭൂമികുലുക്കങ്ങള്‍ക്ക് ശേഷം ദേശീയ ദുരന്ത നിവാരണ അതോറിറ്റിയുടെ 8 ാമത്തെ ബെറ്റാലിയന്‍ നടത്തിയ ദൈര്‍ഘ്യമേറിയ രക്ഷാപ്രവര്‍ത്തനമായിരുന്നു ഗ്രേറ്റര്‍ നോയിഡയിലേത്.

നിര്‍മ്മാണത്തിലിരുന്ന ആറുനില കെട്ടിടം ചൊവ്വാഴ്ച രാത്രിയോടെ സമീപത്തുളള നാലു നില കെട്ടിടത്തിന് മുകളിലേക്ക് പതിച്ചായിരുന്നു അപകടം സംഭവിച്ചത്്. നാലുനില കെട്ടിടവും തകര്‍ന്നുവീണു. നിര്‍മ്മാണത്തിലിരുന്ന കെട്ടിടത്തില്‍ പന്ത്രണ്ടോളം തൊഴിലാളികള്‍ ഉണ്ടായിരുന്നതായാണ് പ്രാഥമിക നിഗമനം. ഇതില്‍ മൂന്ന്‌പേരുടെ മൃതദേഹം നേരത്തെ കണ്ടെത്തിയിരുന്നു.