ഉത്തർപ്രദേശിൽ പിഞ്ചു കുഞ്ഞിനോട് അച്ഛന്റെ ക്രൂരത. ഭാര്യ രണ്ടാമതും പെണ്‍കുഞ്ഞിന് ജന്മം നൽകിയതിൽ പ്രകോപിതനായ പിതാവ് 18 മാസം പ്രായമുള്ള മൂത്ത മകളെ ടെറസില്‍ നിന്ന് താഴേക്ക് എറിയുകയായിരുന്നു. പര്‍ദൗളി എന്ന ഗ്രാമത്തിലായിരുന്നു മനസാക്ഷിയെ നടുക്കിയ സംഭവം.

ഗുരുതരമായി പരിക്കേറ്റ കുഞ്ഞിനെ അടുത്തുള്ള ആശുപത്രിയില്‍ പ്രവേശിപ്പിച്ചു. അരവിന്ദ് ഗംഗ്വര്‍ എന്നയാളാണ് സ്വന്തം കുഞ്ഞിനോട് ഇത്തരത്തിലൊരു ക്രൂരത ചെയ്‌തത്‌. അതേസമയം മദ്യലഹരിയിലാണ് പിതാവ് ഇക്കാര്യം ചെയ്‌തതെന്ന്‌ പോലീസ് അറിയിച്ചു.

അഞ്ച് ദിവസം മുൻപാണ് അരവിന്ദിന്റെ ഭാര്യ രണ്ടാമത്തെ കുഞ്ഞിന് ജന്മം നല്‍കിയത്. എന്നാല്‍ ഇതും പെണ്‍കുട്ടിയായതോടെ ഇയാള്‍ മാനസിക സമ്മര്‍ദ്ദത്തിലാകുകയായിരുന്നുവെന്ന് ഗ്രാമവാസികള്‍ വ്യക്തമാക്കി. സംഭവത്തില്‍ പിതാവിനെതിരെ കൊലപാതക ശ്രമത്തിന് പൊലീസ് കേസെടുത്തിട്ടുണ്ട്.