ജമ്മുകാശ്മീരിലെ കുല്‍ഗാമില്‍ അഞ്ചു ഭീകരരെ സുരക്ഷാസേന വധിച്ചു
ജമ്മുകാശമീരിലെ കുല്‍ഗാമില്‍ ലഷ്‌കര്‍ ഇ ത്വയ്ബ, ഹിസ്ബുള്‍ മുജാഹിദിന്‍ അംഗങ്ങളായ അഞ്ചു ഭീകരരെ സുരക്ഷാസേന വധിച്ചു. കഴിഞ്ഞവര്‍ഷം രണ്ട് ബാങ്ക് ജീവനക്കാരെയും അഞ്ചു പോലീസുകാരെയും വെടിവച്ചുകൊന്ന കൊടുംഭീകരന്‍ ഗുല്‍സാര്‍ അഹമ്മദ് പാദര്‍ ഉള്‍പ്പെടെയുള്ളവരെയാണു സുരക്ഷാസേന വധിച്ചത്. ഇന്നലെ പുലര്‍ച്ചെ തെക്കന്‍കാഷ്മീരിലെ കുല്‍ഗാമില്‍ ഖ്വാസിഗുണ്ടിനു സമീപം ചൗഗാമില്‍ തെരച്ചില്‍ നടത്തുകയായിരുന്ന സുരക്ഷാസേനാംഗങ്ങളെ ഭീകരര്‍ ആക്രമിക്കുകയായിരുന്നു.
ഭീകരര്‍ ഒളിച്ചിരിപ്പുണ്ടെന്ന രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. ഗ്രാമവാസികളെ ഒഴിപ്പിച്ച ശേഷമാണു സുരക്ഷാസേന ഭീകരരെ നേരിട്ടത്. ഏറ്റുമുട്ടല്‍ തുടരുന്‌പോള്‍ സുരക്ഷാസേനയെ കല്ലെറിഞ്ഞ ഒരുവിഭാഗം യുവാക്കളെ പിരിച്ചുവിടാനുള്ള ശ്രമത്തിനിടെ ഗ്രാമവാസികളിലൊരാള്‍ കൊല്ലപ്പെട്ടു. കണ്ണീര്‍വാതക ഷെല്ലുകളും പെല്ലറ്റുകളും ഉപയോഗിച്ചാണു പ്രതിഷേധക്കാരെ പിന്തിരിപ്പിക്കാന്‍ സുരക്ഷാസേന ശ്രമിച്ചത്.
മണിക്കൂറുകള്‍ നീണ്ട സൈനിക നടപടികളിലാണു ഭീകരരെ വധിക്കാനായത്. കുല്‍ഗാമിലെ അദിജാനിലുള്ള സെയ്ഫ് എന്നറിയപ്പെടുന്ന ഗുല്‍സാര്‍ അഹമ്മദ് പാദര്‍, യാമാരാക് സ്വദേശി ദാവൂദ് എന്നറിയപ്പെടുന്ന ഫൈസല്‍ അഹമ്മദ് റാത്തര്‍, ഹാഷിം എന്നറിയപ്പെടുന്ന സാഹിദ് അഹമ്മദ് മിര്‍ അനന്തനാഗിലെ മാസ്‌രൂര്‍ മൗലവി, റഹ്മാന്‍ ഭായി എന്നറിയപ്പെടുന്ന സാഹൂര്‍ അഹമ്മദ് ലോണ്‍ എന്നിവരാണു കൊല്ലപ്പെട്ടതെന്നു സൈനികകേന്ദ്രങ്ങള്‍ പറഞ്ഞു.
കഴിഞ്ഞ മാസം അനന്ത്‌നാഗില്‍ ഏറ്റുമുട്ടലില്‍ കൊല്ലപ്പെട്ട ഹിസ്ബുള്‍ കമാന്‍ഡര്‍ അല്‍താഫിന്റെ അടുത്ത അനുയായിയാണ് ഗുല്‍സാര്‍ അഹമ്മദ് പാദര്‍. മറ്റു നാലു ഭീകരരും ചെറുതും വലുതുമായി നിരവധി ആക്രമണങ്ങളില്‍ പങ്കാളികളാണ്. ഭീകരര്‍ ഒളിച്ചിരുന്ന പ്രദേശത്തുനിന്നു നിരവധി ആയുധങ്ങളും വെടിക്കോപ്പുകളും സുരക്ഷാസേന പിടിച്ചെടുത്തു.
https://www.facebook.com/Malayalivartha
