കാശ്മീരിലെ ബഡ്ഗാമില്‍ രണ്ട് യുവാക്കള്‍ വെടിയേറ്റ് മരിച്ച സംഭവത്തില്‍ സൈന്യം ഖേദം പ്രകടിപ്പിച്ചു. സംഭവത്തിന്റെ ഉത്തരവാദിത്വം പൂര്‍ണമായും ഏറ്റെടുക്കുകയാണണ് കമാന്‍ഡിങ് ചീഫ് ലഫ്റ്റനന്റ് ജനറല്‍ ജനറല്‍ ഹൂഡ മാദ്ധ്യമങ്ങളോട് പറഞ്ഞു. വെളുത്ത കാറില്‍ തീവ്രവാദികള്‍ കടന്നുപോകുമെന്ന് വിവരം ലഭിച്ചിരുന്നു. വാഹന പരിശോധന നടത്തിയ സൈനികര്‍ക്ക് ആളുമാറിപ്പോയതാണെന്നും ഹൂഡ പറഞ്ഞു. ഇക്കാര്യത്തില്‍ സൈന്യത്തിനു തെറ്റുപറ്റി. സംഭവിക്കാന്‍ പാടില്ലാത്തതാണ് സംഭവിച്ചത് ഹൂഡ ഖേദം പ്രകടിപ്പിച്ചു. സംഭവത്തെ കുറിച്ച് സൈന്യം അന്വേഷണം നടത്തിവരികയാണെന്നും വീഴ്ച വരുത്തിയവര്‍ക്കെതിരെ ശക്തമായ നടപടി ഉണ്ടാവുമെന്നും ഹൂഡ പറഞ്ഞു. പുറമേ നിന്നുള്ള ഏത് അന്വേഷണത്തോടും സൈന്യം സഹകരിക്കുമെന്നും അദ്ദേഹം പറഞ്ഞു.
ബഡ്ഗാമിലെ ചാത്തര്‍ഗാമില്‍ കഴിഞ്ഞ തിങ്കളാഴ്ചയാണ് ചെക്ക് പോസ്റ്റില്‍ നിര്‍ത്താതെ പോയ വെളുത്ത കാറിനു നേരെ സൈന്യം വെടിയുതിര്‍ത്തത്.സംഭവത്തില്‍ സാധാരണക്കാരായ രണ്ട് യുവാക്കള്‍ കൊല്ലപ്പെടുകയും ചെയ്തിരുന്നു. വെടിവെയ്പില്‍ രണ്ട് പേര്‍ക്ക് പരിക്കേല്‍ക്കുകയും ചെയ്തിരുന്നു. സംഭവത്തെ തുടര്‍ന്ന് സൈന്യത്തിനെതിരെ വന്‍ പ്രതിഷേധമാണ് ഉയര്‍ന്നത്.മരിച്ചവരുടെ കുടുംബങ്ങള്‍ക്ക് പത്ത് ലക്ഷം രൂപ വീതവും പരിക്കേറ്റവര്‍ക്ക് അഞ്ച് ലക്ഷം വീതവും സൈന്യം നഷ്ടപരിഹാരം പ്രഖ്യാപിച്ചിട്ടുണ്ട്.