ജാര്‍ഖണ്ഡ് പൊലീസ്, പ്രശസ്ത സാമ്പത്തികശാസ്ത്രജ്ഞനും സാമൂഹ്യപ്രവര്‍ത്തകനുമായ ജീന്‍ ഡ്രീസിനെ അറസ്റ്റ് ചെയ്തു. അധികൃതരുടെ അനുവാദം കൂടാതെ പൊതുപരിപാടി സംഘടിപ്പിച്ചെന്നാരോപിച്ചാണ് അറസ്റ്റ് ചെയ്തിരിക്കുന്നത്.

പടിഞ്ഞാറന്‍ ജാര്‍ഖണ്ഡിലെ ഗാര്‍വയില്‍ നിന്ന് നാല്പത് കിലോമീറ്റര്‍ അകലെ വച്ചാണ് ജീന്‍ ഡ്രീസിനെ, സാമൂഹ്യപ്രവര്‍ത്തകനായ വിവേക് കുമാറിനോടും മറ്റൊരാളോടും ഒപ്പം അറസ്റ്റ് ചെയ്തത്. ജില്ലാ അധികാരികളുടെ മുന്‍കൂര്‍ അനുവാദം വാങ്ങാതെയാണ് ജീനും സംഘവും പൊതുപരിപാടി സംഘടിപ്പിച്ചതെന്നാണ് ബിഷ്ണുപൂര്‍ പൊലീസിന്റെ ആരോപണം. മൂവരെയും ചോദ്യം ചെയ്തുവരികയാണെന്നും അല്പസമയത്തിനകം വിട്ടയയ്ക്കുമെന്നും മുതിര്‍ന്ന പോലീസ് ഉദ്യേഗസ്ഥന്‍ അറിയിച്ചിട്ടുണ്ട്.

ജീനിനെപ്പോലൊരാളെ പൊലീസ് അറസ്റ്റ് ചെയ്തെന്ന വാര്‍ത്ത ഞെട്ടിക്കുന്നതാണെന്ന് രാഷ്ട്രീയനേതാവും സാമൂഹ്യപ്രവര്‍ത്തകനുമായ യോഗേന്ദ്ര യാദവ് ട്വീറ്റ് ചെയ്തു. അദ്ദേഹത്തെ അറസ്റ്റ് ചെയ്തിടത്തോളം അപമാനകരമായ പ്രവര്‍ത്തി വേറെയില്ലെന്നും യോഗേന്ദ്ര യാദവ് പറഞ്ഞു.

വിശപ്പ്, ദാരിദ്ര്യം, ലിംഗസമത്വം, കുട്ടികളുടെ ആരോഗ്യം എന്നീ മേഖലകള്‍ കേന്ദ്രീകരിച്ചാണ് ജീന്‍ ഡ്രീസിന്റെ പ്രവര്‍ത്തനം. തൊഴിലുറപ്പ് പദ്ധതി എന്ന ആശയം ആദ്യം അവതരിപ്പിച്ചതും അദ്ദേഹമാണ്. ഡല്‍ഹി സ്‌കൂള്‍ ഓഫ് എക്കണോമിക്സിലും റാഞ്ചി സര്‍വ്വകലാശാലയിലും അധ്യാപകനാണ് ജീന്‍. സാമ്പത്തിക നൊബേല്‍ പുരസ്‌കാര ജേതാവ് അമര്‍ത്യസെന്നുമായി ചേര്‍ന്ന് ഹംഗര്‍ ആന്റ് പബ്ലിക് ആക്ഷന്‍ എന്ന പുസ്‌കവും രചിച്ചിട്ടുണ്ട്.