തന്റെ സേവനം രാജ്യത്തെ എല്ലാ പൗരന്‍മാര്‍ക്ക് വേണ്ടിയാണെന്നും അല്ലാതെ ഹിന്ദുവിനും മുസ്ലീമിനും വേണ്ടി മാത്രമല്ലെന്നും പ്രധാനമന്ത്രി നരേന്ദ്ര മോദി. അവര്‍ക്ക് മാത്രമായി ഒന്നും ചെയ്തിട്ടില്ലെന്നും അദ്ദേഹം കൂട്ടിച്ചേര്‍ത്തു.

തെരഞ്ഞെടുപ്പ് തൊട്ടടുത്തെത്തിയ സാഹചര്യത്തില്‍ എബിപി ന്യൂസിന് നല്‍കിയ അഭിമുഖത്തില്‍ സംസാരിക്കുകയായിരുന്നു മോദി. കോണ്‍ഗ്രസ് പാര്‍ട്ടി പുറത്തിറക്കിയ തെരഞ്ഞെടുപ്പ് പ്രകടനപത്രികയെ മോദി നിശിതമായി വിമര്‍ശിക്കുകയും ചെയ്തു. കപട പ്രകടന പത്രിക എന്നാണ് കോണ്‍ഗ്രസിന്റെ തെരഞ്ഞെടുപ്പ് പത്രികയെ മോദി വിശേഷിപ്പിച്ചത്. ജനങ്ങളുടെ കണ്ണില്‍ പൊടിയിടാനാണ് ഈ പ്രകടന പത്രികയെന്നും മോദി ആരോപിക്കുന്നു.

വിഘടനവാദികളുടെ ഭാഷയാണ് കോണ്‍ഗ്രസ് പ്രകടന പത്രികയില്‍ ഉപയോഗിച്ചിരിക്കുന്നതെന്നും ഇന്ത്യന്‍ സൈന്യത്തെ അപമാനിക്കുന്ന ഭാഷയാണ് പ്രയോഗിച്ചിരിക്കുന്നതെന്നും മോദി ആരോപിക്കുന്നു. ജമ്മു കാശ്മീരിന്റെ വികസനത്തില്‍ ബിജെപി ഏറെ ശ്രദ്ധ നല്‍കുന്നുണ്ട്. ജമ്മു കാശ്മീരിലെ എല്ലാ വീടുകളിലും വൈദ്യുതി എത്തിച്ചു. അതുപോലെ തന്നെ എല്ലാ വീടുകളിലും ടോയ്‌ലെറ്റ് സംവിധാനവും നല്‍കിയതായി മോദി അവകാശപ്പെട്ടു.

അധികാരത്തിലേറിയാല്‍ രാജ്യദ്രോഹപരമായ നിയമങ്ങള്‍ റദ്ദ് ചെയ്യുമെന്നായിരുന്നു കഴിഞ്ഞ തെരഞ്ഞെടുപ്പില്‍ ബിജെപിയുടെ വാ?ഗ്ദാനം. ഇത്തരത്തിലുള്ള 1400 നിയമങ്ങള്‍ റദ്ദാക്കിയതായി മോദി വെളിപ്പെടുത്തി. നിയമസംവിധാനത്തില്‍ അടിയുറച്ച് വിശ്വസിക്കുന്ന പാര്‍ട്ടിയാണ് ബിജെപി. അതുപോലെ ബിജെപിയുടെ ശ്രമഫലമായിട്ടാണ് നീരവ് മോദിയെപ്പോലെയുള്ള തട്ടിപ്പുവീരന്‍മാരെ തുറുങ്കിലടയ്ക്കാന്‍ സാധിച്ചത്. നമോ ചാനലിനെക്കുറിച്ച് ചോദിച്ചപ്പോള്‍ ഇതുവരെ കാണാന്‍ സമയം ലഭിച്ചില്ല എന്നായിരുന്നു മോദിയുടെ മറുപടി. നരേന്ദ്ര മോദി അഴിമതിക്കൊപ്പം ഒരിക്കലും നില്‍ക്കില്ല എന്ന് ജനങ്ങള്‍ക്ക് മനസ്സിലാക്കി കൊടുക്കാന്‍ ഈ ചാനല്‍ വഴി സാധിച്ചുവെന്നും മോദി പറഞ്ഞു.

രാമക്ഷേത്ര നിര്‍മ്മാണം തന്റെ മാത്രം ആഗ്രഹമല്ല, മറിച്ച് രാജ്യത്തെ മുഴുവന്‍ ജനങ്ങളും അയോധ്യയില്‍ രാമക്ഷേത്രം നിര്‍മ്മിച്ചു കാണാന്‍ ആഗ്രഹിക്കുന്നതായി മോദി അഭിപ്രായപ്പെട്ടു. ഈ വിഷയത്തില്‍ സുപ്രീം കോടതിയുടെ ഏറ്റവും പുതിയ തീരുമാനത്തിനായി കാത്തിരിക്കുകയാണ്. മുസ്ലീം സമുദായത്തിന് മാത്രമായി ഒന്നും ചെയ്തിട്ടില്ല. അതുപോലെ ഹിന്ദുക്കള്‍ക്ക് മാത്രമായും. എന്നാല്‍ 2020 ആകുമ്പോഴേയ്ക്കും രാജ്യത്തെ എല്ലാവര്‍ക്കും പാര്‍പ്പിട സംവിധാനം ഒരുക്കുക എന്നതാണ് തന്റെ സ്വപ്നമെന്നും മോദി വ്യക്തമാക്കി. സബ്കാ സാത്ത് സബ്കാ വികാസ് എന്നതാണ് തന്റെ ലക്ഷ്യം. മതത്തിന് പ്രാധാന്യം നല്‍കുന്ന സര്‍ക്കാരല്ല തന്റേതെന്നും അദ്ദേഹം അഭിമുഖത്തില്‍ പറഞ്ഞു.

വാരണാസിയില്‍ പ്രിയങ്ക ഗാന്ധി മത്സരിക്കുമെന്ന വാര്‍ത്തയ്ക്ക് മോദി നല്‍കിയ മറുപടി ജനാധിപത്യ രാജ്യത്ത് ആര്‍ക്ക് എവിടെ വേണമെങ്കിലും മത്സരിക്കാന്‍ അവകാശമുണ്ട് എന്നായിരുന്നു. രാജ്യസുരക്ഷയ്ക്ക് വേണ്ടി ഒരു മതിലായി നിലകൊള്ളുമെന്നും മോദി വ്യക്തമാക്കി.