അസാധുവായ നോട്ടുകള്‍ ഇപ്പോഴും മാറ്റിനല്‍കുന്നുണ്ടെന്ന ആരോപണവുമായി കോണ്‍ഗ്രസ് രംഗത്ത്. നോട്ട് നിരോധനം വലിയ അഴിമതിയാണെന്ന് മുതിര്‍ന്ന കോണ്‍ഗ്രസ് നേതാവ് കപില്‍ സിബല്‍ ആരോപിച്ചു. അസാധു നോട്ടുകള്‍ സര്‍ക്കാര്‍ ഉദ്യോഗസ്ഥരാണ് മാ്റ്റി നല്‍കിയത്. അതിന്റെ ദൃശ്യങ്ങളും അദ്ദേഹം പുറത്ത് വിട്ടു. ഒറ്റയടിക്ക് 320 കോടി വരെ മാറ്റിയെടുത്തു. ഇടപാട് നടന്നത് മഹാരാഷ്ട്ര ഇന്‍ഡസ്ട്രിയില്‍ ഡെവലപ്പ്‌മെന്റ് കോര്‍പ്പറേഷന്‍ ഗോഡൗണിലാണ്. സര്‍ക്കാര്‍ ഉദ്യോഗസ്ഥരും ബാങ്ക് ജീവനക്കാരും ചേര്‍ന്നാണ് ഇടപാട് നടത്തുന്നതെന്നും അദ്ദേഹം ആരോപിച്ചു. പ്രതിപക്ഷനേതാക്കളെ ലക്ഷ്യമിട്ട് ആദായനികുതി വകുപ്പ് റെയ്ഡ് തുടരുന്ന പശ്ചാത്തലത്തിലാണ് നോട്ട് നിരോധനത്തിന്റെ മറവില്‍ നടന്ന ഞെട്ടിക്കുന്ന കാര്യങ്ങളുടെ വീഡിയോ കോണ്‍ഗ്രസ് പുറത്ത് വിട്ടത്. ബി.ജെ.പി നേതാക്കളുടെ സഹായത്തോടെയാണ് പല ഉദ്യോഗസ്ഥരും ഇപ്പോഴും അസാധുനോട്ടുകള്‍ മാറ്റി നല്‍കുന്നതെന്നും കപില്‍ സിബല്‍ ആരോപിച്ചു.

ബി.ജെ.പി ഓഫീസുകളില്‍ നിരോധിത നോട്ടുകള്‍ മാറി നല്‍കുന്നുണ്ടെന്ന് മുമ്പും കോണ്‍ഗ്രസ് ആരോപിച്ചിരുന്നു. നോട്ട് നിരോധനം ആകെ സഹായിച്ചത് പ്രധാനമന്ത്രിയുടെ സമ്പന്നരായ സുഹൃത്തുക്കളെ മാത്രമാണെന്നും രാഹുല്‍ ആരോപിച്ചിരുന്നു. പാവപ്പെട്ട ജനങ്ങള്‍ക്ക് നേരെ നടത്തിയ മനപ്പൂര്‍വമായ ആക്രമണമായിരുന്നു നോട്ട് നിരോധനമെന്നും രാഹുല്‍ ആരോപിച്ചിരുന്നു. ഭീകരവാദം, കള്ളപ്പണം, കള്ളനോട്ട് വ്യാപനം ഇത് മൂന്നും അവസാനിപ്പിക്കുമെന്നായിരുന്നു മോദിയുടെ അവകാശ വാദം. ഈ മൂന്ന് മേഖലയിലും അദ്ദേഹം പരാജയപ്പെട്ടെന്നാണ് കണക്കുകള്‍ തെളിയിക്കുന്നത്. 

2016 നവംബര്‍ എട്ടിനാണ് 500,1000 രൂപ നോട്ടുകള്‍ മോദി സര്‍ക്കാര്‍ നിരോധിച്ചത്. കള്ളപ്പണവും, ഹവാല ഇടപാടുകള്‍, ഭീകര പ്രവര്‍ത്തനം എന്നിവ തടയാന്‍ എന്നായിരുന്നു കേന്ദ്ര സര്‍ക്കാര്‍ അവകാശപ്പെട്ടിരുന്നതെങ്കിലും നോട്ട് നിരോധിക്കുമ്പോള്‍ പ്രാബല്യത്തിലുണ്ടായിരുന്ന 15.44 ലക്ഷം കോടി രൂപയുടെ 500, 1000 രൂപ നോട്ടുകളില്‍ 14.31 ലക്ഷം കോടിയും തിരിച്ചെത്തിയതായി (99.3 ശതമാനം) കഴിഞ്ഞ ദിവസം ആര്‍.ബി.ഐ വ്യക്തമാക്കിയിരുന്നു. നോട്ട് നിരോധനം സമ്പൂര്‍ണ പരാജയമാണെന്ന പ്രതിപക്ഷ ആരോപണം ശരിവെക്കുന്നതാണ് പുറത്തുവന്ന കണക്കുകള്‍.

ബി.ജെ.പി അധ്യക്ഷന്‍ അമിത് ഷാ ഡയറക്ടറായ ബാങ്കാണ് നോട്ട് നിരോധന കാലത്ത് ഏറ്റവും കൂടുതല്‍ നോട്ടുകള്‍ മാറിയതെന്ന വിവരാവകാശ രേഖ പുറത്ത് വന്നിരുന്നു. ബി.ജെ.പി.യും സഖ്യകക്ഷികളും ചേര്‍ന്ന് ഗുജറാത്തിലെ ജില്ലാ സഹകരണ ബാങ്കുകളില്‍ 14,293.71 കോടി രൂപ നിക്ഷേപിച്ചിരിക്കുന്നു. മറ്റ് സംസ്ഥാനങ്ങളുമായി വെച്ച് നോക്കുമ്പോള്‍ ഇത് വലിയ തുകയാണ്്. നോട്ട് നിരോധനം പ്രഖ്യാപിച്ച് അഞ്ച് ദിവസത്തിനകം അമിത് ഷാ ഡയറക്ടറായ അഹമ്മദാബാദ് ഡിസ്ട്രിക് കോഓപ്പറേറ്റീവ് ബാങ്ക് 745.59 കോടി രൂപയുടെ നിരോധിത നോട്ടുകളാണ് മാറിയെടുത്തത്. ഇക്കാര്യം വിവവാരാവകാശ നിയമപ്രകാരം നല്‍കിയ അപേക്ഷയ്ക്ക് നല്‍കിയ മറുപടിയില്‍ വ്യക്തമാക്കുന്നു. 2000 മുതല്‍ അമിത് ഷായാണ് ബാങ്കിന്റെ ഭരണത്തലവന്‍. നോട്ട് നിരോധനത്തിന് പിന്നാലെ ജില്ലാ സഹകരണ ബാങ്കുകള്‍ക്ക് അസാധുനോട്ട് നിക്ഷേപമായി സ്വീകരിക്കാന്‍ അനുമതി നല്‍കിയിരുന്നെങ്കിലും അഞ്ച് ദിവസം കഴിഞ്ഞപ്പോള്‍ വിലക്കി. അതിനിടെയാണ് അസാധുനോട്ടുകള്‍ മാറ്റിയത്.