ലോക്സഭ തിരഞ്ഞെടുപ്പില്‍ വയനാട്ടില്‍ മത്സരിക്കാനുള്ള രാഹുലിന്റെ തീരുമാനത്തെ പരിഹസിച്ച് പ്രധാനമന്ത്രി നരേന്ദ്രമോദി. അഴിമതിയും കുടുംബ ഭരണവും കാരണം രാജ്യത്ത് കോണ്‍ഗ്രസിനെതിരെ വലിയ രീതിയില്‍ രോഷം ഉയരുന്നുണ്ട്. ഈ രോഷം രാഹുലിന്റെ സീറ്റിനും ഭീഷണി ഉയര്‍ത്തുകയാണ്. രാഹുലിന് തെക്കന്‍ സംസ്ഥാനങ്ങളില്‍ നിന്നും മത്സരിക്കാന്‍ ആഗ്രഹമുണ്ടെന്നാണ് അവര്‍ വാദിക്കുന്നത്. കോണ്‍ഗ്രസ് അധികാരത്തിലുള്ള കര്‍ണാടകയില്‍ നിന്ന് വേണമെങ്കിലും അവര്‍ക്ക് മത്സരിക്കാം. പക്ഷേ അയല്‍ സംസ്ഥാനത്തേക്കാണ് അദ്ദേഹം പോയത്. കാരണം അദ്ദേഹം സുരക്ഷിത സ്ഥാനം തേടി പോയതാണ്. കര്‍ണാടകയിലെ ജനങ്ങളുടെ വികാരം എന്താണെന്ന് അവര്‍ക്ക് മനസിലായിട്ടുണ്ട്. മാത്രവുമല്ല സഖ്യ കക്ഷിയായ ജെഡിഎസ്സിന്റെ കാര്യത്തില്‍ അവര്‍ക്ക് യാതൊരു ഉറപ്പുമില്ല. ജെഡിഎസ് പ്രതികാരം ചെയ്യുമോ എന്നാണ് കോണ്‍ഗ്രസ് ഭയക്കുന്നത്. പ്രധാനമന്ത്രി പദത്തിലിരുന്ന ദേവ ഗൗഡയെ സോണിയ ഗാന്ധിയാണ് താഴെ ഇറക്കിയത്. ദേവഗൗഡയോട് താന്‍ ചെയ്തതിനുള്ള പ്രതികാരം തന്റെ മകനോട് ജെഡിഎസ് ചെയ്യുമോ എന്നാണ് സോണിയ ഭയക്കുന്നതെന്നും അദ്ദേഹം പറഞ്ഞു.

കാവല്‍ക്കാരന്‍ കള്ളനാണെന്ന് പറഞ്ഞവരില്‍ നിന്നാണ് കെട്ടു കണക്കിനു കള്ളപ്പണം പിടിച്ചതെന്ന് പ്രധാനമന്ത്രി നരേന്ദ്ര മോദി. മഹാരാഷ്ട്രയിലെ ലാത്തൂരില്‍ തെരഞ്ഞെടുപ്പു റാലിയെ അഭിസംബോധന ചെയ്യുമ്പോള്‍ കോണ്‍ഗ്രസിന്റെ ഇരട്ടത്താപ്പിനെ മോദി രൂക്ഷമായി വിമര്‍ശിച്ചു.

കഴിഞ്ഞ ആറു മാസമായി അവര്‍ പറഞ്ഞു, ഇപ്പോള്‍ അവരുടെ പക്കല്‍ നിന്ന് കെട്ടുകണക്കിനു കള്ളപ്പണം പിടിച്ചു. കാവല്‍ക്കാരനെ ഭയക്കുന്നത് ആരാണെന്നു മനസ്സിലായില്ലേ? പ്രധാനമന്ത്രി ചോദിച്ചു. മധ്യപ്രദേശ് മുഖ്യമന്ത്രി കമല്‍നാഥിന്റെ സഹായികളില്‍ നിന്ന് കോടിക്കണക്കിന് അനധികൃത പണം പിടിച്ചത് പരാമര്‍ശിച്ചായിരുന്നു മോദിയുടെ പ്രസംഗം.

ഇങ്ങനെ അനധികൃതമായി പണം കൈവശം വയ്ക്കുന്നവര്‍ കാവല്‍ക്കാരനെ ഭയക്കുന്നത് സ്വാഭാവികം. അങ്ങിനെ ഭയക്കുന്നവര്‍ കാവല്‍ക്കാരനെ അധിക്ഷേപിക്കുന്നതും സ്വാഭാവികം. പാക്കിസ്ഥാനെന്ന രാജ്യം ഉടലെടുത്തതിന്റെ പൂര്‍ണ ഉത്തരവാദികള്‍ കോണ്‍ഗ്രസുകാരാണെന്ന് മോദി പറഞ്ഞു.

ഇന്ത്യക്ക് സ്വാതന്ത്ര്യം ലഭിക്കുന്നതിന് മുന്‍പ് അന്നത്തെ കോണ്‍ഗ്രസ് നേതാക്കള്‍ ബുദ്ധിപൂര്‍വം പ്രവര്‍ത്തിച്ചിരുന്നെങ്കില്‍ പാക്കിസ്ഥാനെ പോലെയൊരു രാജ്യം ഇന്നുണ്ടാവില്ലായിരുന്നു. പാക്കിസ്ഥാന്റെ താല്‍പര്യങ്ങളാണ് കോണ്‍ഗ്രസിന്റെ തെരഞ്ഞെടുപ്പ് പ്രകടനപത്രികയിലുള്ളത്. കൂടാതെ കശ്മീരിന് മാത്രമായി ഒരു പ്രധാനമന്ത്രി വേണമെന്ന് വാദിക്കുന്നവര്‍ക്കൊപ്പമാണ് കോണ്‍ഗ്രസും സഖ്യകക്ഷിയായ എന്‍സിപിയുമെന്നും മോദി ആരോപിച്ചു.

ഭീകരരെ വീട്ടില്‍ കയറി ആക്രമിക്കുന്ന ഇന്ത്യയാണ് ഇന്നുള്ളത്. രാജ്യ സുരക്ഷയും കര്‍ഷകക്ഷേമവുമാണ് ബിജെപി ലക്ഷ്യം വയ്ക്കുന്നത്. കഴിഞ്ഞ അഞ്ചു വര്‍ഷം നിങ്ങളെന്നിലര്‍പ്പിച്ച വിശ്വാസമാണ് എന്റെ നേട്ടം. രാജ്യത്ത് നിന്ന് മാവോയിസ്റ്റുകളെ തുരത്തുകയാണ് എന്റെ ലക്ഷ്യം, മോദി പറഞ്ഞു.