ഹെൽമറ്റ് ധരിക്കാതിരുന്നാൽ കേരളത്തിൽ നൽകുന്ന ശിക്ഷ കുറ്റത്തിന്റെ കാഠിന്യമനുസരിച്ച് പിഴ ഈടാക്കാനാണ് പതിവ്. എന്നാൽ പലരും ഈ നിയമം ബോധപൂർവം തന്നെ ലംഘിക്കുകയും ചെയുന്നു. ഹെൽമറ്റ് ധരിക്കാതിരുന്നാൽ സംഭവിക്കുന്ന അപകടങ്ങൾ എത്രതന്നെ ആവർത്തിച്ച് പറഞ്ഞു കൊടുത്താലും പലരും ഇത് മനപ്പൂർവം തന്നെ ചെവികൊടുക്കാതിരിക്കുന്നതാണ് സാദാരണ കണ്ടുവരുന്ന കാഴ്ച. ഹെൽമറ്റ് ധരിക്കാതെ വാഹനമോടിക്കുന്നവർക്ക് വ്യത്യസ്ത രീതിയിലുള്ള പിഴ നൽകുകയാണ് ഭോപ്പാൽ പോലീസ്. ശിക്ഷയായി നൽകുന്നത് പേപ്പറും പേനയുമാണ്. പിഴ ഈടാക്കിയ രസീത് അല്ല മറിച്ച് നൽകുന്നത് നല്ലൊരു എട്ടിന്റെ പണിയും.ഹെല്‍മെറ്റ് ധരിക്കാത്തതിന്‍റെ കാരണം 100 വാക്കില്‍ കുറയാതെ എഴുതി നൽകണം. അതിനുവേണ്ടിയാണ് പേപ്പറും പേനയും നൽകുന്നത്.

കഴിഞ്ഞ ആറുദിവസത്തിനിടെ 150-ലേറെ ആളുകളാണ് ഹെല്‍മെറ്റ് ധരിക്കാത്തതിന് കാരണമെഴുതി ബോധിപ്പിച്ചത്. വെള്ളിയാഴ്ച അവസാനിക്കുന്ന റോഡ് സുരക്ഷാ വാരാചരണത്തോടനുബന്ധിച്ചാണ് ഈ വേറിട്ട നടപടി ഭോപ്പാൽ പോലീസ് ആരംഭിച്ചത്. ഹെല്‍മെറ്റ് ധരിക്കാതെ എത്തിയവരോട് എന്താണ് കാരണമെന്ന് 100 വാക്കില്‍ എഴുതി നല്‍കാന്‍ ആവശ്യപ്പെടുകയായിരുന്നു എന്ന് എഎസ്പി പ്രദീപ് ചൗഹാന്‍ വെളിപ്പെടുത്തി. റോഡ് സുരക്ഷാ വാരം കഴിഞ്ഞാലും ഈ രീതി തുടരുമെന്നും അദ്ദേഹം കൂട്ടിച്ചേർത്തു.