സ്വാതന്ത്ര്യത്തിനു വേണ്ടി നൊന്ത ആളുകള്‍ക്കും അവരുടെ പിന്‍ഗാമികള്‍ക്കും മാത്രമേ രാജ്യം വെട്ടി മുറിക്കുന്ന നടപടികളില്‍ വേദന തോന്നൂവെന്നു ജസ്റ്റിസ് എം. കെമാല്‍ പാഷ. കുട്ടികളെ ജാതിയുടെയും മതത്തിന്റെയും അടിസ്ഥാനത്തില്‍ വേര്‍തിരിക്കുന്ന സമ്പ്രദായം ചില സ്‌കൂളുകളിലെങ്കിലുമുണ്ടെന്ന് ജസ്റ്റിസ് കെമാല്‍ പാഷ. തന്റെ കൊച്ചുമകന് ഉണ്ടായ ഞെട്ടിക്കുന്ന അനുഭവവും അദ്ദേഹം പങ്കുവെച്ചു. പത്തനാപുരം അല്‍ അമീന്‍ പബ്ലിക് സ്‌കൂളിന്റെ വാര്‍ഷികാഘോഷം ഉദ്ഘാടനം ചെയ്ത് സംസാരിക്കവെയാണ് കൊച്ചുമകനുണ്ടായ അനുഭവം അദ്ദേഹം വിവരിച്ചത്.
രണ്ടാം ക്ലാസുകാരനായ കൊച്ചുമകന്റെ ഡയറി നോക്കിയ സഹപാഠികള്‍ നീ മുസ്ലിം ആണല്ലേ എന്ന് ചോദിക്കുകയും ടീച്ചറോട് ഇക്കാര്യം പറഞ്ഞുകൊടുക്കുമെന്ന് ഭീഷണിപ്പെടുത്തുകയും ചെയ്തതായി കെമാല്‍ പാഷ പറയുന്നു. മുസ്ലിം എന്നാല്‍ ഒളിച്ചുവെക്കേണ്ട കാര്യമാണെന്നാണ് ആ കുട്ടികള്‍ ധരിച്ചുവെച്ചിരിക്കുന്നതെന്നും കെമാല്‍ പാഷ പറഞ്ഞു. കുട്ടികളെ കള്ളം പറയാന്‍ പഠിപ്പിക്കരുതെന്നും വിദേശ രാജ്യങ്ങളിലെ നല്ല സംസ്‌കാരങ്ങള്‍ കടമെടുക്കാനാണ് ശ്രമിക്കേണ്ടതെന്നും കെമാല്‍ പാഷ കൂട്ടിച്ചേര്‍ത്തു.

കെമാല്‍ പാഷയുടെ പ്രസംഗത്തില്‍ നിന്ന്....

''കുഞ്ഞുങ്ങളെ കള്ളം പറയാന്‍ പഠിപ്പിക്കരുത്. കുഞ്ഞുങ്ങളെ ജാതിയുടെയും മതത്തിന്റെയും പേരില്‍ വേര്‍തിരിക്കുന്ന സമ്പ്രദായം പല സ്‌കൂളുകളിലുമുണ്ട്. സ്‌കൂളിന്റെ പേര് ഞാന്‍ പറയുന്നില്ല. എന്റെ കൊച്ചുമോന്‍ പഠിക്കുന്ന സ്‌കൂളാണ്. രണ്ടാം ക്ലാസുകാരനാണ്. അവന്റെ ഡയറി എടുത്ത് നോക്കിയിട്ട് ഒരു കുട്ടി ചോദിക്കുകയാണ് നീ മുസ്ലിം ആണല്ലേ എന്ന്. അപ്പോള്‍ കൊച്ചുമോന്‍ അതേ എന്ന് പറഞ്ഞു. ഞാന്‍ ടീച്ചറോട് പറയും. അപ്പോള്‍ മുസ്ലിം എന്നു പറയുന്നത് ഏതാണ്ട് വലിയ കുഴപ്പമാണ്, ഒളിച്ചുവെക്കേണ്ട കാര്യമാണ് എന്നാണ് ആ കുട്ടികള്‍ ധരിച്ചിരിക്കുന്നത്. അവന്റെ കൂടെ രണ്ട് മൂന്ന് കുട്ടികള്‍ കൂടിയുണ്ട്. അതുശരി ഞങ്ങളും പറഞ്ഞുകൊടുക്കുമിതെന്നാണ് അവരും പറഞ്ഞത്. ഇതു കേട്ട് കൊച്ചുമകന്‍ കരച്ചിലായി.

ഇത് മനസിലാക്കിയശേഷം ഞാന്‍ സ്‌കൂളില്‍ വിളിച്ച് പരാതി പറഞ്ഞു. നിങ്ങളുടെ സ്‌കൂളിന്റെ കുഴപ്പമല്ലിത്. പക്ഷേ നിങ്ങള്‍ ഈ കുട്ടികളുടെ രക്ഷ കര്‍ത്താക്കളെ വിളിച്ചുവരുത്തണം. ഈ കുഞ്ഞുങ്ങള്‍ ഈ രീതിയില്‍ പെരുമാറണമെങ്കില്‍, എവിടന്ന് പഠിക്കുന്നു ഇത്. അച്ഛനമ്മമാരില്‍ നിന്ന് തന്നെയാണ്. അവരെ വിളിച്ചുപറയണം ഇങ്ങനെ പെരുമാറാന്‍ പാടില്ല, കുട്ടികളെ ഇങ്ങനെ പഠിപ്പിക്കരുത് എന്ന്. എനിക്കതിലേ ഉള്ളൂ പരാതി. ആ കുഞ്ഞുങ്ങള്‍ തലതിരിഞ്ഞുപോകുന്നത് ആലോചിച്ചുനോക്കൂ. ഏഴുവയസ്സുകാരന്‍ ചിന്തിക്കുന്നതാണ് ഞാന്‍ പറഞ്ഞത്. മനുഷ്യന്റെ മനസ്സുകളെ മതംകൊണ്ട് വേര്‍തിരിക്കുന്നത്. വീട്ടില്‍ നിന്ന് പഠിപ്പിച്ച് വിടുന്നത് ഇങ്ങനെയാണ്. നീ അവരോടൊന്നും കൂട്ടുകൂടരുത് അവരൊക്കെ മുസ്ലിം ആണെന്ന് പറഞ്ഞാല്‍. ഒന്നാലോചിച്ച് നോക്കൂ. നമ്മുടെ നാട് ഏങ്ങോട്ട് പോകുന്നുവെന്ന്....നമ്മള്‍ കള്ളം പറയാനാണ് കുട്ടികളെ പഠിപ്പിക്കുന്നത്. നിങ്ങള്‍ക്ക് ഇഷ്ടമില്ലാത്ത ഒരാള്‍ വീട്ടില്‍ വന്നാല്‍ ഞാന്‍ ഇവിടെയില്ലെന്ന് പറഞ്ഞേക്കാന്‍ കുട്ടിയെ ചുമതലപ്പെടുത്തുന്നു. കള്ളം പറയാന്‍ പഠിപ്പിക്കുകയാണ് ഇവിടെ. അത് അവന് കിട്ടുന്ന ഏറ്റവും വലിയ ലൈസന്‍സാണ്. അവന്‍ വേണമെങ്കില്‍ നിങ്ങള്‍ ചത്തുപോയെന്ന് പറയും. ആ രീതിയില്‍ പോലും കള്ളം പറയാന്‍ അവന്‍ പഠിക്കുകയാണ്.

വിദേശ രാജ്യങ്ങളുടെ സംസ്‌കാരങ്ങള്‍ പലതും നാം കടമെടുക്കും. അവരുടെ എന്തു വൃത്തികേടുകളുണ്ടോ അത് നാം കടമെടുക്കും. ഉദാഹരണം സ്വകാര്യത എന്ന് പറയുന്നത് അവര്‍ക്ക് വളരെ വലുതാണ്. ഇപ്പോള്‍ നമുക്കും വളരെ വലുതായിപ്പോയി. നമ്മള്‍ വിദേശ രാജ്യത്ത് നിന്നാണ് കടമെടുത്തത്. അവര്‍ക്ക് ചില നല്ല ഗുണങ്ങളുണ്ട്. അത് നമ്മള്‍ സ്വീകരിക്കില്ല. അമേരിക്കയിലൊക്കെ ഒരു കള്ളനെയോ കൊലപാതകിയെ പിടിച്ചാല്‍ ഉള്ളത് തത്ത പറയുന്നതുപോലെ അവന്‍ പറയും. കാരണം സത്യം പറയണമെന്നത് അവന്റെ രക്തത്തില്‍ അലിഞ്ഞുചേര്‍ന്ന സംസ്‌കാരമായി മാറിയിട്ടുണ്ട്. നമ്മള്‍ എന്തുകൊണ്ട് അതു കടമെടുക്കുന്നില്ല. വൃത്തിക്കെട്ട കാര്യങ്ങള്‍ മാത്രം കടമെടുക്കുകയാണ്. അവന്‍ റോഡില്‍ നിന്ന് കെട്ടിപ്പിടിക്കുന്നത് നാം കടമെടുക്കുന്നു. മദ്യപിക്കുന്നത് കടമെടുക്കുന്നു. നേരെ മറിച്ച് അവരുടെ നല്ല സംസ്‌കാരം നാം കടമെടുക്കുന്നുമില്ല....''