പൗരത്വനിയമ ഭേദഗതിക്കെതിരെ വ്യാപക പ്രതിഷേധം കെട്ടടങ്ങിയെന്ന് വിചാരിച്ചെങ്കിലും ഡല്‍ഹിയില്‍ പ്രതിഷേധം വീണ്ടും ഉയരുകയാണ്. ജയിലില്‍ നിന്നും ഇറങ്ങിയ ഭീം ആര്‍മി നേതാവ് ചന്ദ്രശേഖര്‍ ആസാദ് വീണ്ടും സമരത്തിന് നേതൃത്വം നല്‍കിയതോടെ കര്‍ശന നടപടികളുമായി കേന്ദ്ര സര്‍ക്കാര്‍ രംഗത്തെത്തിയിരിക്കുകയാണ്. പ്രതിഷേധങ്ങള്‍ ശക്തി പ്രാപിക്കുന്നതിനിടെ ഡല്‍ഹി പോലീസിന് കേന്ദ്രസര്‍ക്കാര്‍ പ്രത്യേക അധികാരം നല്‍കിയിരിക്കുകയാണ്. ദേശീയ സുരക്ഷാ നിയമം നടപ്പിലാക്കാന്‍ ഡല്‍ഹി പോലീസ് കമ്മീഷണര്‍ക്ക് അനുമതി നല്‍കിക്കൊണ്ട് ലെഫ്റ്റണന്റ് ജനറല്‍ അനില്‍ ബയ്ജാല്‍ ഉത്തരവിറക്കി.

ദേശീയ സുരക്ഷാ നിയമപ്രകാരം ദേശീയ സുരക്ഷക്കും ക്രമസമാധാനത്തിനും ഒരു വ്യക്തി ഭീഷണിയാണെന്ന് അധികാരികള്‍ക്ക് തോന്നിയാല്‍ അയാളെ മാസങ്ങളോളം ഒരു കുറ്റവും ചുമത്താതെ തടങ്കലിലാക്കാന്‍ പോലീസിന് സാധിക്കും. ഈ അധികാരമാണ് ഡല്‍ഹി പോലീസിന് ലഭിച്ചിരിക്കുന്നത്.

ജനുവരി 19 മുതല്‍ ഏപ്രില്‍ 18 വരെയുള്ള കാലവയളവിലാണ് ഈ അധികാരം ഉപയോഗിക്കുന്നതിന് ലെഫ്റ്റണന്റ് ഗവര്‍ണര്‍ അനുമതി നല്‍കിയിരിക്കുന്നത്. ദേശീയ സുരക്ഷാ നിയമപ്രകാരം ആളുകളെ തടഞ്ഞുവെക്കാനുള്ള അധികാരവും ഡല്‍ഹി പോലീസ് കമ്മീഷണര്‍ക്ക് നല്‍കിയിട്ടുണ്ട്.

പൗരത്വനിയമ ഭേദഗതി, എന്‍.ആര്‍.സി.എന്നിവക്കെതിരെ ഡല്‍ഹിയില്‍ തുടര്‍ച്ചയായി പ്രതിഷേധം അരങ്ങേറുന്നതിനിടെയാണ് ഡല്‍ഹി പോലീസിന് പ്രത്യേക അധികാരം നല്‍കിയിരിക്കുന്നത് എന്നത് ശ്രദ്ധേയമാണ്. അതേസമയം, ഇതില്‍ അസ്വാഭാവിക ഒന്നുമില്ലെന്നാണ് ഡല്‍ഹി പോലീസ് പറയുന്നത്. ഓരോ മൂന്ന് മാസം കൂടുമ്പോഴും ഇത്തരം ഉത്തരവുകള്‍ ഉണ്ടാകാറുണ്ട്. പതിവ് രീതിയുടെ ഭാഗമാണിത്. നിലവിലെ സാഹചര്യങ്ങളുമായി ഇതിന് ബന്ധമില്ലെന്നും ഡല്‍ഹി പോലീസ് അറിയിച്ചു.

ഡല്‍ഹി ജമാമസ്ജിദില്‍ ഇന്നലെ നടന്ന പ്രതിഷേധത്തിലാണ് ഭീം ആര്‍മി നേതാവ് ചന്ദ്രശേഖര്‍ ആസാദ് വീണ്ടും പങ്കെടുത്തത്. ഭരണഘടനയുടെ ആമുഖം വായിച്ചുകൊണ്ടാണ് ചന്ദ്രശേഖര്‍ ആസാദ് സമരത്തില്‍ പങ്കെടുത്തത്. കഴിഞ്ഞ ദിവസമാണ് പൗരത്വ നിയമഭേദഗതിയ്‌ക്കെതിരായ പ്രതിഷേധത്തില്‍ പങ്കെടുത്തതിനെ തുടര്‍ന്ന് അറസ്റ്റിലായ ചന്ദ്രശേഖര്‍ ആസാദ് ജാമ്യം ലഭിച്ച് പുറത്തിറങ്ങിയത്.

ഈ സമരം മുന്നോട്ട് കൊണ്ടുപോകുമെന്ന് ചന്ദ്രശേഖര്‍ ആസാദ് ജമാ മസ്ജിദില്‍ വെച്ച് മാധ്യമപ്രവര്‍ത്തകരോട് പറഞ്ഞു. ആസാദിനൊടൊപ്പം നിരവധി ഭീം ആര്‍മി പ്രവര്‍ത്തകരും സമരത്തില്‍ പങ്കെടുക്കുന്നുണ്ട്. ചന്ദ്രശേഖര്‍ ആസാദിന്റെ നേതൃത്വത്തില്‍ പ്രതിഷേധക്കാര്‍ ജമാമസ്ജിദിന്റെ പുറത്തേക്ക് നീങ്ങിയിട്ടുണ്ട്.

കര്‍ശന ഉപാധികളോടെയാണ് ചന്ദ്രശേഖരര്‍ ആസാദിന് വ്യാഴാഴ്ച ജാമ്യം ലഭിച്ചത്. ഫെബ്രുവരി ആദ്യ ആഴ്ചവരെ ചന്ദ്രശേഖര്‍ ആസാദ് ഡല്‍ഹിയില്‍ പ്രതിഷേധം നടത്തരുതെന്ന് കോടതി നിര്‍ദ്ദേശിച്ചിരുന്നു. എന്നാല്‍ ഇത് ലംഘിച്ചുകാണ്ടാണ് ചന്ദ്രശേഖര്‍ ആസാദ് പ്രതിഷേധങ്ങളുടെ ഭാഗമായത്.

ഈയൊരു പശ്ചാത്തലത്തിലാണ് കര്‍ശന നടപടികളുമായി കേന്ദ്രം മുന്നോട്ട് പോകുന്നത്. പൗരത്വ രജിസ്റ്ററുമായി ബന്ധപ്പെട്ട പ്രതിഷേധങ്ങള്‍ രാജ്യത്ത് കുറഞ്ഞ മട്ടാണ്. പല സ്ഥലങ്ങളിലും സമരത്തിന് നേതൃത്വം നല്‍കാന്‍ ആള്‍ക്കാര്‍ പോലുമില്ല. ആ നിലയ്ക്ക് ഡല്‍ഹി കേന്ദ്രമാക്കി സമരം ചെയ്യാനുള്ള ശ്രമമാണ് പലരും നടത്തുന്നത്. ഇത് തടയിടാന്‍ കൂടിയാണ് അമിത്ഷായുടെ നീക്കം.