പൗരത്വ ഭേദഗതി നിയമത്തിനെതിരെ ഉയര്‍ന്ന പ്രതിഷേധെത്ത തുടര്‍ന്നുണ്ടായ അക്രമങ്ങളുമായി ബന്ധപ്പെട്ട് മംഗളൂരു സ്റ്റേഷനില്‍ ഹാജരാകാന്‍ 1800 മലയാളികള്‍ക്ക് പൊലീസ് നോട്ടീസ് അയച്ചു. കാസര്‍കോട്, ഉപ്പള, മഞ്ചേശ്വരം മേഖലയിലെ സ്ത്രീ-പുരുഷ ഭേദമന്യേയുള്ള 1800 പേര്‍ക്കാണ് മംഗളൂരു സിറ്റി ക്രൈം റെക്കോഡ്‌സ് ബ്യൂറോ അസി. കമാണ്ടന്റ് ഓഫിസില്‍നിന്ന് നോട്ടീസ് അയച്ചത്. മഞ്ചേശ്വരത്ത് മാത്രം 400 പേര്‍ക്ക് നോട്ടീസ് ലഭിച്ചു.

വെടിവെപ്പും രണ്ടുപേരുടെ മരണവും നടന്ന 2019 ഡിസംബര്‍ 19ന് മംഗളൂരു നോര്‍ത്ത് പൊലീസ് സ്റ്റേഷന്‍ അതിര്‍ത്തിയിലെ അഞ്ച് മൊബൈല്‍ ടവറുകളുടെ പരിധിയില്‍ ഉണ്ടായിരുന്ന ഫോണ്‍ നമ്പറുകളുടെ വിലാസത്തിലാണ് നോട്ടീസ് അയച്ചത്. മംഗളൂരുവിലെ വിദ്യാഭ്യാസ സ്ഥാപനങ്ങളില്‍ പഠിക്കുന്ന മലയാളി വിദ്യാര്‍ഥികളും നോട്ടീസ് ലഭിച്ചവരില്‍ പെടും.

മഞ്ചേശ്വരം ചാത്തിപടപ്പ് മുഹമ്മദിന്റെ ഭാര്യ ഷഫിയ നോട്ടീസ് ലഭിച്ച വനിതയാണ്. കേരളത്തിലേക്ക് മടങ്ങാനാവാതെ ബന്ധുക്കളുടെയും സുഹൃത്തുക്കളുടെയും വീടുകളില്‍ കുടുങ്ങിപ്പോയവര്‍ക്കും നോട്ടീസ് ലഭിച്ചു. കര്‍ഫ്യൂ ലംഘിക്കല്‍, പൊലീസുകാരെ മാരകായുധം ഉപയോഗിച്ച് അടിച്ചുപരിക്കേല്‍പ്പിക്കല്‍, വധശ്രമം, പൊതുമുതല്‍ നശിപ്പിക്കല്‍, ക്രിമിനല്‍ ഗൂഢാലോചന തുടങ്ങി ഇരുപതോളം വകുപ്പുകള്‍ ചേര്‍ത്താണ് നോട്ടീസ് അയച്ചിരിക്കുന്നത്. മംഗളൂരുവില്‍ കലാപം സൃഷ്ടിച്ചത് കേരളത്തില്‍ നിന്നുള്ളവരാണെന്ന് കര്‍ണാടക ആഭ്യന്തര വകുപ്പ് അന്നുതന്നെ ആരോപിച്ചിരുന്നു.

സിറ്റി പൊലീസ് കമീഷണര്‍ പി. ഹര്‍ഷയും വാര്‍ത്തസമ്മേളനം വിളിച്ച് ഇതുതന്നെ പറയുകയുണ്ടായി. മാരകായുധങ്ങളുമായി വന്നവര്‍ എന്ന് മുദ്രകുത്തി മലയാളി മാധ്യമ പ്രവര്‍ത്തകരെ കസ്റ്റഡിയിലുമെടുത്തു. ഈ പ്രചാരണത്തിന് സാധൂകരിക്കാനാണ് കേരളത്തിലേക്കുവന്ന നൂറുകണക്കിന് നോട്ടീസുകളെന്നാണ് വിലയിരുത്തല്‍.

സ്റ്റേഷനില്‍ ഹാജരായില്ലെങ്കില്‍ മംഗളൂരുവിലെ കലാപത്തില്‍ കുറ്റകൃത്യവും ഗൂഢാലോചനയും നടത്തിയതായി കണക്കാക്കുമെന്നും അന്വേഷണത്തില്‍ സഹകരിച്ചില്ലെങ്കില്‍ കേസുമായി മുന്നോട്ടുപോകുമെന്നും നോട്ടീസില്‍ രേഖപ്പെടുത്തിയിട്ടുണ്ട്. നോട്ടീസ് ലഭിച്ചവര്‍ കൂട്ടത്തോടെ നോര്‍ത്ത് പൊലീസ് സ്റ്റേഷനില്‍ ഹാജരായെങ്കിലും അന്വേഷണം ക്രൈം ഡിറ്റാച്ച്‌മെന്റാണ് നടത്തുന്നതെന്നും അവര്‍ വിളിച്ചാല്‍ ഹാജരായാല്‍ മതിയെന്നുമാണ് നിര്‍ദേശം.

കലാപം നടത്തിയത് കേരളത്തില്‍നിന്നുള്ളവരാണെന്ന് സ്ഥാപിക്കാനാണ് കര്‍ണാടക പൊലീസ് മലയാളികള്‍ക്ക് നോട്ടീസ് അയച്ചതെന്ന് കോണ്‍ഗ്രസ് നേതാവ് ഹര്‍ഷദ് വോര്‍ക്കാടി പറഞ്ഞു. മംഗളൂരുവില്‍ പല ആവശ്യങ്ങള്‍ക്കായി പോയ മലയാളികള്‍ക്കാണ് നോട്ടീസ് ലഭിച്ചത്. മലയാളികള്‍ കലാപവുമായി ബന്ധപ്പെട്ട് ആശുപത്രിയില്‍ എവിടെയും ഉണ്ടായിരുന്നില്ല. ഇതോടെ പൊലീസിന്റെ വാദം പൊളിഞ്ഞു. തുടര്‍ന്നാണ് കര്‍ഫ്യൂ ഇല്ലാത്ത സമയത്ത് അവിടെയുണ്ടായിരുന്ന മലയാളികള്‍ക്ക് നോട്ടീസ് അയച്ചത്.