ഹിന്ദുക്കള് കൂട്ടത്തോടെ; പാകിസ്ഥാനില് നിന്നും പഞ്ചാബിലേക്കെത്തിയ ഇരുന്നൂറോളം ഹിന്ദു മതവിഭാഗത്തില്പെട്ട പാകിസ്ഥാന്കാര് ഇന്ത്യന് സുരക്ഷാ വിഭാഗത്തിന്റെയും അധികാരികളുടെയും ആശങ്കയേറ്റുന്നു
പാകിസ്ഥാനില് നിന്നും പഞ്ചാബിലേക്കെത്തിയ ഇരുന്നൂറോളം ഹിന്ദു മതവിഭാഗത്തില്പെട്ട പാകിസ്ഥാന്കാര് ഇന്ത്യന് സുരക്ഷാ വിഭാഗത്തിന്റെയും അധികാരികളുടെയും ആശങ്കയേറ്റുന്നു. ടൈംസ് ഓഫ് ഇന്ത്യ പത്രമാണ് ഇക്കാര്യം റിപ്പോര്ട്ട് ചെയ്യുന്നത്. തങ്ങളുടെ സകല സമ്പാദ്യവും ചുമലുകളിലേറ്റി കാല്നടയായാണ് ഇവര് അട്ടാരി-വാഗാ അതിര്ത്തി വഴി ഇന്ത്യയിലേക്ക് എത്തിച്ചേര്ന്നത്. അതുകൊണ്ടുതന്നെ ഇന്ത്യയില് പൗരത്വ നിയമ ഭേദഗതി പാസായ സാഹചര്യത്തില് ഇവര് ഇന്ത്യന് പൗരത്വം തേടിയാണോ ഇന്ത്യയിലേക്ക് എത്തിയതെന്നാണ് അധികാരികള് സംശയിക്കുന്നത്.
കഴിഞ്ഞ വര്ഷം ഡിസംബര് പകുതിയോടെയാണ് ഇവര് ഇന്ത്യയിലേക്ക് എത്തിത്തുടങ്ങിയത്. ഇന്ത്യയിലേക്ക് എത്തിച്ചേര്ന്ന ഇവര് പൗരത്വം ആവശ്യപ്പെടുമോ എന്ന കാര്യത്തില് അധികാരികള്ക്ക് യാതൊരു തീര്ച്ചയുമില്ല. ഇക്കാര്യത്തെക്കുറിച്ച് യാതൊന്നും ഇവര് തുറന്നുപറഞ്ഞിട്ടില്ലെന്നതും സുരക്ഷാ ഏജന്സികളുടെ ആശങ്ക വര്ദ്ധിപ്പിക്കുന്ന കാരണങ്ങളില് ഒന്നാണ്. ഇവരെ ക്രമാനുഗതമായ രീതിയില് പാകിസ്ഥാന് തന്നെയാണോ ഇന്ത്യയിലേക്ക് അയക്കുന്നതെന്നും സുരക്ഷാ വിഭാഗങ്ങള് സംശയിക്കുന്നുണ്ട്.
വലിയ ലഗേജുകളും താങ്ങിയാണ് ഇവര് ഇന്ത്യയിലേക്ക് എത്തിയതെന്ന വസ്തുതയും സംശയത്തിന് ആക്കം കൂട്ടുന്നുണ്ട്. ഇത് സാധാരണ വിനോദ സഞ്ചാരികളുടെ രീതിയല്ല. സന്ദര്ശന വിസ വഴിയാണ് ഇവര് നിലവില് ഇന്ത്യയില് കഴിയുന്നത്. ഈ വിസകള് കാലഹരണപ്പെട്ടാല് മാത്രമാണ് ഇവര് ഇന്ത്യയില് നിന്നും പൗരത്വം ആവശ്യപ്പെടുമോ ഇല്ലയോ എന്ന് പറയാന് സാധിക്കുകയുള്ളൂ എന്നും സുരക്ഷാ ഏജന്സികള് പറയുന്നു.പൗരത്വ നിയമ ഭേദഗതി സംബന്ധിച്ച ചര്ച്ചകള് ഇന്ത്യയില് ആരംഭിച്ചപ്പോള് മുതല് തന്നെ ഇവര് പൗരത്വത്തിനായി അപേക്ഷിച്ചിരുന്നുവെന്നും അധികാരികള് സംശയിക്കുന്നുണ്ട്. സി.എ.എ ഇന്ത്യ പാസാക്കിയത് പാകിസ്ഥാനിലെ സിഖുകാരെയും ഹിന്ദുക്കളെയും ഇന്ത്യയില് പൗരത്വം തേടാന് പ്രേരിപ്പിച്ചിട്ടുണ്ടെന്ന് പാകിസ്ഥാന് മുസ്ലിം ലീഗ് നവാസിന്റെ ദേശീയ അസംബ്ലിയിലെ ഹിന്ദു അംഗം ഖീല് ദാസ് ഖോഹിസ്ഥാനി പറയുന്നു.
https://www.facebook.com/Malayalivartha
