നിർത്താതെ ഹോണടിച്ചതിന്റെ പേരിൽ ഞെട്ടിക്കുന്ന ക്രൂരത. ഓട്ടോ ഡ്രൈവർക്ക് കുത്തേറ്റു. ഹരിയാനയിലെ സോനിപതിനടുത്താണ് സംഭവം നടന്നത്. സോനിപത്തിനടുത്ത ജിടി റോഡിൽ വെച്ച് ജഗ്‌ബീർ എന്ന ഓട്ടോറിക്ഷാ ഡ്രൈവർക്ക് കുത്തേറ്റത് രണ്ടുവർഷം മുൻപ് നടന്ന സംഭവത്തിന്റെ പക തീർക്കാൻ.

ഓവർടേക്ക് ചെയ്‍തുവന്ന് ഓട്ടോറിക്ഷയ്ക്ക് കുറുകെ ബൈക്ക് നിർത്തിയ രണ്ടു യുവാക്കള്‍ ഡ്രൈവറെ നടുറോഡിൽ കുത്തിപ്പരിക്കേൽപ്പിക്കുകയായിരുന്നു. വയറിന് ഗുരുതരമായ പരിക്കേറ്റ ഡ്രൈവർ ഇപ്പോൾ ഐസിയുവിലാണ്. അക്രമം നടത്തിയ ഉടന്‍ ഇവര്‍ കടന്നുകളയുകയും ചെയ്തു.

രണ്ടുവര്‍ഷം മുമ്പ് നടന്ന ഒരു സംഭവമാണ് ഇപ്പോള്‍ കത്തിക്കുത്തിലേക്ക് നയിച്ചത്. രണ്ടു വർഷം മുമ്പ് ജഗ്ബീറും ബൈക്കിൽ സഞ്ചരിച്ചുകൊണ്ടിരുന്ന ലളിത്, സുമൻ എന്നീ യുവാക്കളും തമ്മില്‍ ഹോൺ നിർത്താതെ അടിച്ചതിന്റെ പേരിൽ അടിപിടി നടന്നിരുന്നു. യുവാക്കളും ജഗ്‌ബീറും മകൻ സുനിലും തമ്മിൽ ഉണ്ടായ വാക്ക് തർക്കം ഒടുവിൽ കയ്യാങ്കളിയിൽ കലാശിക്കുകയായിരുന്നു. അതിന്റെ തുടർച്ചയായി നിരവധി തവണ കാണുന്നിടത്തെല്ലാം വച്ച് ഇരു പക്ഷവും ഇടയ്ക്കിടെ ഏറ്റുമുട്ടിയിരുന്നു. പോലീസിൽ നിരവധി തവണ പരാതിപ്പെട്ടിട്ടും പോലീസ് ഇടപെട്ടില്ല എന്നും ജഗ്‌ബീർ ആരോപിക്കുന്നു. സംഭവത്തിൽ പോലീസ് അന്വേഷണം ആരംഭിച്ചു.