ഗ്യാരന്റി കാര്‍ഡിലെ പത്ത് വാഗ്ദാനങ്ങള്‍ ഉടൻ നടപ്പിലാക്കും; ഡൽഹി മുഖ്യമന്ത്രി അരവിന്ദ് കെജ്‌രിവാൾ
വാഗ്ദാനങ്ങൾ നിറവേറ്റാനൊരുങ്ങി ഡൽഹി മുഖ്യമന്ത്രി അരവിന്ദ് കെജ്‌രിവാൾ. നിയമസഭാ തിരഞ്ഞെടുപ്പിനിടെ പുറത്തിറക്കിയ ഗ്യാരന്റി കാര്‍ഡിലെ പത്ത് വാഗ്ദാനങ്ങള്‍ നടപ്പാക്കുന്നത് സംബന്ധിച്ച കര്‍മ്മപദ്ധതി തയ്യാറാക്കാന്‍ ഉന്നത ഉദ്യോഗസ്ഥര്‍ക്ക് ഡല്‍ഹി മുഖ്യമന്ത്രി അരവിന്ദ് കെജ്‌രിവാൾ നിര്‍ദ്ദേശം നൽകി . കേന്ദ്ര ആഭ്യന്തരമന്ത്രി അമിത് ഷായുമായി നടത്തിയ കൂടിക്കാഴ്ചയ്ക്കുശേഷം വിളിച്ചുചേര്‍ത്ത മന്ത്രിമാരുടെയും ഉന്നത ഉദ്യോഗസ്ഥരുടെയും യോഗത്തിലാണ് കെജ്‌രിവാള്‍ ഈ നിര്‍ദ്ദേശം പങ്കുവെച്ചത്.
കര്‍മപദ്ധതി തയ്യാറാക്കാന്‍ ഒരാഴ്ചത്തെ സമയം വിവിധ വകുപ്പുകളുടെ തലവന്മാര്‍ക്ക് നല്‍കിയിട്ടുണ്ടെന്ന് യോഗത്തിനുശേഷം അദ്ദേഹം മാധ്യമങ്ങളോട് വ്യക്തമാക്കി. തടസമില്ലാത്ത വൈദ്യുതി വിതരണം, അനധികൃത കോളനികളിലെല്ലാം അടിസ്ഥാന സൗകര്യങ്ങള്‍ തുടങ്ങിയ ഉറപ്പുകളാണ് കെജ്‌രിവാള്‍ തിരഞ്ഞെടുപ്പ് പ്രചാരണത്തിനിടെ പുറത്തിറക്കിയ ഗ്യാരന്റി കാര്‍ഡില്‍ പറഞ്ഞിരിക്കുന്നത് . ഇവ നടപ്പാക്കുന്നതിനുള്ള തുക അടുത്ത ബജറ്റില്‍ വകയിരുത്തുമെന്നും കെജ്‌രിവാള്‍ ഉറപ്പ് നൽകിയിരുന്നു.
https://www.facebook.com/Malayalivartha
