വിവിധ സംസ്ഥാനങ്ങളിലെ 601 പ്രത്യേക കോവിഡ് ആശുപത്രികളിലായി ഒരു ലക്ഷത്തിലേറെ കിടക്കകളടക്കം ഒരുക്കിയിട്ടുണ്ടെന്ന് ആരോഗ്യ മന്ത്രാലയം ജോയിന്റ് സെക്രട്ടറി ലവ് അഗര്‍വാള്‍ പറഞ്ഞു. കോവിഡ് ബാധിതരുടെ എണ്ണം കൂടുന്നതനുസരിച്ചു ചികിത്സാ സൗകര്യം ഒരുക്കാന്‍ സജ്ജമാണെന്നു കേന്ദ്ര ആരോഗ്യ മന്ത്രാലയം. നിലവില്‍ കോവിഡ് സ്ഥിരീകരിച്ച എണ്ണായിരത്തിലേറെ രോഗികളില്‍ 1671 പേര്‍ക്കു മാത്രമേ തീവ്രപരിചരണ സംവിധാനങ്ങള്‍ ആവശ്യമുള്ളൂ.

അതിനിടെ ആരോഗ്യപ്രവര്‍ത്തകര്‍ക്കു കോവിഡ് പ്രതിരോധ മരുന്നായി നല്‍കുന്ന ഹൈഡ്രോക്‌സി ക്ലോറോക്വിന്‍ 13 രാജ്യങ്ങളിലേക്കു കൂടി കയറ്റുമതി ചെയ്യാന്‍ മന്ത്രിതല ഉപസമിതി അനുമതി നല്‍കി.

അതേസമയം, 40 ഗവേഷണങ്ങളാണ് ഐസിഎംആര്‍-ന്റെ നേതൃത്വത്തില്‍ നടക്കുന്നതെങ്കിലും കോവിഡ് പ്രതിരോധ വാക്‌സിന്‍ കണ്ടെത്താനുള്ള ശ്രമം അടുത്ത ഘട്ടത്തിലേക്കു കടന്നിട്ടുണ്ടെന്ന് പറയാറായിട്ടില്ല എന്ന് ഐസിഎംആര്‍ അറിയിച്ചു.

കോവിഡ് ബാധിതരുടെ എണ്ണം വര്‍ധിക്കുന്നതിനിടെ, രോഗമുക്തരായവരുടെ എണ്ണവും ഇന്നലെ ഉയര്‍ന്നു. ഇന്നലെ വൈകിട്ടു വരെയുള്ള 24 മണിക്കൂറില്‍ 74 പേരാണു സുഖം പ്രാപിച്ചത്. ഇതുവരെ 716 പേര്‍ ആശുപത്രി വിട്ടു. പ്രതിദിനം റിപ്പോര്‍ട്ട് ചെയ്യുന്ന കേസുകള്‍ ശരാശരി 584 ആയി. കഴിഞ്ഞ 5 ദിവസത്തെ കോവിഡ് റിപ്പോര്‍ട്ടുകളുടെ അടിസ്ഥാനത്തിലാണിതെന്ന് ഐസിഎംആര്‍ അറിയിച്ചു.

ഉപഭോക്തൃ മന്ത്രാലയം രാജ്യത്തെ ചെറുകിട - ചില്ലറ വില്‍പനശാലകളെ 'സുരക്ഷാ സ്റ്റോറു'കളാക്കാന്‍ ആലോചിക്കുന്നു. അതിവേഗ വില്‍പനയുള്ള ഉപഭോക്തൃ സാമഗ്രികള്‍ (എഫ്എംസിജി) നിര്‍മിക്കുന്ന കമ്പനികളുടെ സഹകരണത്തോടെയാകും പദ്ധതി. ഒന്നരമാസം കൊണ്ട് 20 ലക്ഷം കടകളെ സുരക്ഷാ കാര്യത്തില്‍ മാറ്റിയെടുക്കാമെന്നാണ് സര്‍ക്കാര്‍ കണക്കുകൂട്ടല്‍.

നിത്യോപയോഗ സാധനങ്ങള്‍ക്കായി ജനം ആശ്രയിക്കുന്ന കടകളില്‍ കര്‍ശന സുരക്ഷാ മാനദണ്ഡങ്ങള്‍ സജ്ജമാക്കുന്നതാണു പദ്ധതി. കടയിലെത്തുന്നവര്‍ ഒന്നര മീറ്റര്‍ അകലം പാലിക്കല്‍, കടയ്ക്കുള്ളില്‍ പ്രവേശിക്കും മുന്‍പ് സാനിറ്റൈസര്‍ അല്ലെങ്കില്‍ ഹാന്‍ഡ് വാഷ് ഉപയോഗിക്കല്‍, ജീവനക്കാര്‍ക്ക് മാസ്‌ക് തുടങ്ങിയവ ഉറപ്പാക്കും. ഒന്നോ രണ്ടോ സംസ്ഥാനങ്ങളുടെ ചുമതല ഓരോ എഫ്എംസിജിക്കും നല്‍കിയാകും സുരക്ഷാ സ്റ്റോറുകള്‍ ഒരുക്കുക.