പുല്‍വാമ: ചാവേറാക്രമണത്തിന് ഉപയോഗിക്കാന്‍ സജ്ജമാക്കിയ കാറിന്റെ ഉടമ അറസ്റ്റില്‍
കഴിഞ്ഞ വര്‍ഷം ഭീകര സംഘടനയില്‍ ചേര്‍ന്ന ഷോപ്പിയാന്‍ സ്വദേശിയും ഹിസ്ബുല്‍ മുജാഹിദീന്‍ ഭീകരനുമായ ഹിദായത്തുല്ല മാലിക്കിനെ സുരക്ഷാ സേന അറസ്റ്റ് ചെയ്തു. പുല്‍വാമയില്‍ സ്‌ഫോടകവസ്തുക്കള്‍ നിറച്ച് ചാവേറാക്രമണത്തിന് ഉപയോഗിക്കാന്‍ സജ്ജമാക്കിയ കാറിന്റെ ഉടമയാണ് ഹിദായത്തുല്ല മാലിക്ക്.
കാര്‍ ഉപേക്ഷിച്ച് കടന്നുകളഞ്ഞ ഹിസ്ബുല്‍ ഭീകരനു വേണ്ടിയുള്ള തിരച്ചില്‍ തുടരുകയാണ്. ഇരുചക്ര വാഹനത്തിന്റെ നമ്പര്‍ പതിപ്പിച്ച വ്യാജ നമ്പര്‍ പ്ലേറ്റ് ആണു കാറില്‍ ഉപയോഗിച്ചത്. ഹിസ്ബുലിനു പുറമെ ഭീകര സംഘടനയായ ജയ്‌ഷെ മുഹമ്മദിനും ആക്രമണ പദ്ധതിയില്‍ പങ്കുണ്ടെന്നാണു സൂചന.
ജമ്മു കശ്മീര്‍ പൊലീസിനു പുറമേ ദേശീയ അന്വേഷണ ഏജന്‍സിയും (എന്‍ഐഎ) കേസ് അന്വേഷിക്കുന്നുണ്ട്. സിആര്‍പിഎഫ് വാഹനവ്യൂഹത്തിനു നേരെ 2019 ഫെബ്രുവരി 14-നു നടത്തിയ ചാവേറാക്രമണത്തിന്റെ ആവര്‍ത്തനമാണു ഭീകരര്‍ ലക്ഷ്യമിട്ടത്. 2019-ലെ ആക്രമണവുമായി കഴിഞ്ഞ ദിവസത്തെ സംഭവത്തിനുള്ള സാമ്യമാണ് എന്‍ഐഎ പ്രധാനമായും പരിശോധിക്കുന്നത്.
പാക്കിസ്ഥാനിലുള്ള കൊടും ഭീകരന്‍ മസൂദ് അസ്ഹറിന്റെ ബന്ധുവായ ഹിസ്ബുല്‍ ഭീകരന്‍ മുഹമ്മദ് ഇസ്മായിലിന് ഇരു സംഭവങ്ങളിലും പങ്കുണ്ടെന്നാണു സൂചന. സ്‌ഫോടകവസ്തുക്കള്‍ നിര്‍മിക്കുന്നതില്‍ ഇയാള്‍ക്ക് പ്രത്യേക വൈദഗ്ധ്യമുണ്ട്. 2019-ലെ ആക്രമണവുമായി ബന്ധപ്പെട്ട കുറ്റപത്രം എന്‍ഐഎ ജൂലൈയില്‍ കോടതിയില്‍ സമര്‍പ്പിക്കും.
https://www.facebook.com/Malayalivartha
