ന്യുമോണിയ ബാധയെത്തുടര്‍ന്ന് പ്രശസ്ത ജ്യോത്സ്യന്‍ ബേജാന്‍ ദാരുവാല (89) അന്തരിച്ചു. ദിനപത്രങ്ങളില്‍ ജ്യോത്സ്യവുമായി ബന്ധപ്പെട്ട നിരവധി ലേഖനങ്ങള്‍ എഴുതിയിട്ടുണ്ട്.

കോവിഡ് രോഗബാധയെത്തുടര്‍ന്നാണ് ദാരുവാല മരിച്ചതെന്ന് സമൂഹമാധ്യമങ്ങളിലും മറ്റും വാര്‍ത്തകള്‍ വന്നുവെങ്കിലും  ന്യുമോണിയ ആണ് അദ്ദേഹത്തിന്റെ വിയോഗത്തിന് കാരണമായതെന്ന് മകന്‍ നസ്തൂര്‍ ദാരുവാല വാര്‍ത്താ ഏജന്‍സിയായ പിടിഐയോട് പറഞ്ഞു.

അതേസമയം, അഹമ്മദാബാദ് മുനിസിപ്പല്‍ കോര്‍പറേഷന്‍ പുറത്തിറക്കിയ കോവിഡ് രോഗബാധിതരുടെ പട്ടികയില്‍ അദ്ദേഹത്തിന്റെ പേര് ഉള്‍പ്പെട്ടിരുന്നു.

അഹമ്മദാബാദില്‍ ഇംഗ്ലിഷ് പ്രഫസറായും പ്രവര്‍ത്തിച്ചിട്ടുള്ള ബേജാന്‍ ദാരുവാല ലോകത്തെ വിവിധ രാജ്യങ്ങളിലെ പ്രശസ്ത വ്യക്തികളുടെ ഇഷ്ടജ്യോത്സ്യന്‍ കൂടിയാണ്.

2014 ലോക്‌സഭാ തിരഞ്ഞെടുപ്പിനു മുന്‍പ് അന്ന് ഗുജറാത്ത് മുഖ്യമന്ത്രിയായിരുന്ന നരേന്ദ്ര മോദിയുടെ കൈ നോക്കി തുടര്‍ ജൈത്രയാത്രയുടെ പ്രവചനം നടത്തിയതായി 2015-ല്‍ ദാരുവാല അവകാശപ്പെട്ടിരുന്നു.

ബേജാന്‍ ദാരുവാലയുടെ നിര്യാണത്തില്‍ ഗുജറാത്ത് മുഖ്യമന്ത്രി വിജയ് രുപാണി, കേന്ദ്രമന്ത്രി സ്മൃതി ഇറാനി തുടങ്ങിയവര്‍ അനുശോചനം രേഖപ്പെടുത്തി.