ചന്ദനമരം വെട്ടികടത്തിയ സംഭവത്തില്‍ 63 പേരെ പോലീസ് അറസ്റ്റ് ചെയ്തു. ആന്ധ്രാപ്രദേശിലെ നെല്ലൂര്‍ ജില്ലയിലാണ് സംഭവം. രണ്ടുകോടി വിലമതിക്കുന്ന 40 രക്തചന്ദനത്തടികളും ഇവരില്‍ നിന്നും പിടിച്ചെടുത്തതായി പോലീസ് പറഞ്ഞു. ഓരേസമയം രണ്ടിടങ്ങളിലായി പൊലീസ് സംഘം നടത്തിയ തിരച്ചിലിലാണ് ഇവരെ പിടികൂടിയത്. അറസ്റ്റിലായവരില്‍ ഭൂരിഭാഗവും തമിഴ്‌നാട് സ്വദേശികളാണെന്നാണ് സൂചന.

ഏപ്രില്‍ ഏഴിന് ചിറ്റൂരിലെ ശേഷാചലം കാട്ടില്‍ രക്തചന്ദനമരം മുറിച്ചു കടത്താന്‍ ശ്രമിച്ച 20 പേരെ പൊലീസിന്റെ പ്രത്യേക ദൗത്യസേന വെടിവച്ചു കൊന്നിരുന്നു. അന്നു രക്ഷപ്പെട്ടവരാണോ ഇപ്പോള്‍ അറസ്റ്റിലായിരിക്കുന്നതെന്നും പൊലീസ് സംശയിക്കുന്നുണ്ട്. അതേസമയം, ശേഷാചലം വനത്തിലുണ്ടായ വെടിവയ്പില്‍ ദൃക്‌സാക്ഷികളായവരെ ദേശീയ മനുഷ്യാവകാശ കമ്മീഷനു മുന്നില്‍ ഇന്നു ഹാജരാക്കി.

ചിറ്റൂരില്‍ കൊല്ലപ്പെട്ടവരില്‍ 13 പേര്‍ തമിഴ്‌നാട്ടുകാരായിരുന്നു. നിര്‍ധനരായ തൊഴിലാളികളെ വധിച്ചതിനെതിരെ തമിഴ്‌നാട്ടിലെ വിവിധ രാഷ്ട്രീയപാര്‍ട്ടികള്‍ രംഗത്തെത്തിയിരുന്നു. കൊല്ലപ്പെട്ടവരില്‍ ഏഴു പേരെ ആന്ധ്രപ്രദേശ് പൊലീസ് അറസ്റ്റ് ചെയ്തിരുന്നതാണെന്നും പിന്നീട് ഇവരെ വ്യാജ ഏറ്റുമുട്ടലിലൂടെ വധിക്കുകയായിരുന്നു എന്ന ആരോപണവും ഉണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha