മസാറത് ആലത്തിന്റെ അറസ്റ്റ്; കശ്മീരില് ഇന്ന് ബന്ദ്, ബന്ദ് ജനജീവിതത്തെ ബാധിക്കാന് അനുവദിക്കില്ലെന്ന് ജമ്മുകശ്മീര് ഉപമുഖ്യമന്ത്രി
കശ്മീരിലെ വിഘടനവാദി നേതാവ് മസാറത് ആലം ഭട്ടിനെ അറസ്റ്റ് ചെയ്തതില് പ്രതിഷേധിച്ച് ജമ്മു കാശ്മീരില് ഇന്ന് ബന്ദ്. ഹുറിയത്ത് കോണ്ഫറന്സ് നേതാവ് സെയ്ദ് അലിഷാ ഗിലാനിയാണ് ബന്ദിന് ആഹ്വാനം ചെയ്തിരിക്കുന്നത്. ബന്ദ് ജനജീവിതത്തെ ബാധിക്കാന് അനുവദിക്കില്ലെന്ന് ജമ്മുകശ്മീര് ഉപമുഖ്യമന്ത്രി നിര്മല് സിങ് മാധ്യമങ്ങളോട് വ്യക്തമാക്കി.
മസാറത് ആലത്തിന്റെ അറസ്റ്റിനെത്തുടര്ന്ന് ഇന്നലെ ശ്രീനഗറിലുണ്ടായ പ്രതിഷേധത്തിനിടെ 14 പേര്ക്ക് പരുക്കേറ്റിരുന്നു. ശ്രീനഗറില് പാക് പതാകവീശി ഇന്ത്യാ വിരുദ്ധ പ്രക്ഷോഭം നടത്തിയതിനാണ് മസാറത് ആലം അറസ്റ്റിലായത്.
ആലത്തെ ഏഴു ദിവസത്തെ പൊലീസ് കസ്റ്റഡിയില് വിട്ടു. 2010ല് കശ്മീരില് കല്ലെറിയല് പ്രതിഷേധത്തെ തുടര്ന്ന് 122 പേര് കൊല്ലപ്പെട്ട സംഭവത്തില് തടവിലായിരുന്ന ആലം കശ്മീരില് പുതിയ സര്ക്കാര് വന്നതിനെ തുടര്ന്നു 40 ദിവസം മുന്പാണ് മോചിതനായത്. ആലമിനെ വിട്ടയച്ച കശ്മീര് സര്ക്കാരിന്റെ തീരുമാനം അന്നുതന്നെ വന് വിവാദമായിരുന്നു.
മസ്രത്ത് ആലത്തിനെ അറസ്റ്റുചെയ്തതില് പ്രതിഷേധിച്ച് ശ്രീനഗറില് നടന്ന പ്രകടനം സംഘര്ഷത്തില് കലാശിക്കുകയായിരുന്നു. ഹുറിയത്ത് കോണ്ഫറന്സ് നേതാവ് മിര്വായിസ് ഉമര് ഫറൂഖിന്റെ നേതൃത്വത്തിലാണ് പ്രതിഷേധ പ്രകടനം നടന്നത്.
വിലക്ക് ലംഘിച്ച് പ്രതിഷേധം നടത്തിയവരെ പിരിച്ചുവിടാന് പോലീസ് ലാത്തിവീശി. പിരിഞ്ഞുപോകാന് കൂട്ടാക്കാത്തവര്ക്ക് നേരെ കണ്ണീര്വാതകവും പ്രയോഗിക്കുകയും ചെയ്തു. കഴിഞ്ഞമാസം സംസ്ഥാനസര്ക്കാര് ജയില് മോചിതനാക്കിയ ഗീലാനി അനുയായി മസ്രത്ത് ആലം പ്രകടനത്തിനിടെ പാക് അനുകൂല മുദ്രാവാക്യം മുഴക്കുകയും അനുയായികള് പാക് പതാക വീശുകയും ചെയ്തിരുന്നു. അഞ്ച് വര്ഷത്തെ ഇടവേളയ്ക്ക് ശേഷമാണ് സംസ്ഥാന സര്ക്കാര് ഗീലാനിക്ക് പൊതുപ്രകടനം നടത്താന് അനുമതി നല്കിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
