കൊവിഡ് മൂലമുള്ള സാമ്ബത്തിക പ്രതിസന്ധി മറികടക്കാന്‍ മാലിദ്വീപിന്‌ 1840 കോടി രൂപയുടെ(കൃത്യമായി 1840 കോടി 25 ലക്ഷത്തി 50,000 രൂപ) ധനസഹായം കൂടി നല്‍കി ഇന്ത്യ. 250 മില്ല്യണ്‍ ഡോളറിന്റെ ധനസഹായം 'സോഫ്റ്റ് ലോണ്‍' പരിധിയില്‍ ഉള്‍പ്പെടുത്തയാണ് രാജ്യത്തിന് ഇന്ത്യ അനുവദിച്ചത്. മാലിദ്വീപ് സര്‍ക്കാരിന്റെ അടിയന്തര ആവശ്യങ്ങള്‍ നിറവേറ്റാനും രാജ്യത്തിന്റെ വരുമാനത്തിലുണ്ടായ വിടവ് നികത്താനും ഇന്ത്യയുടെ ഈ സഹായം ഉപകരിക്കുമെന്നും മാലിദ്വീപ് വിദേശകാര്യ മന്ത്രി അബ്‌ദുള്ള ഷാഹിദ് പറഞ്ഞു.

ഇന്ത്യയുടെ സഹായത്തില്‍ രാജ്യത്തിന് വളരെയേറെ നന്ദിയുണ്ടെന്നും അദ്ദേഹം വ്യക്തമാക്കി. കുറഞ്ഞ പലിശ നിരക്കുള്ള ലോണ്‍ തിരിച്ചടയ്ക്കാനായി പത്ത് വര്‍ഷത്തെ കാലാവധിയാണ് ഇന്ത്യ മാലിദ്വീപിന്‌ നല്‍കിയിരിക്കുന്നത്. കൊവിഡ് മൂലമുള്ള കടുത്ത സാമ്ബത്തിക പ്രതിസന്ധിയില്‍ തങ്ങളെ സഹായിക്കണമെന്ന് മാലിദ്വീപ് പ്രസിഡന്റായ ഇബ്രാഹിം സോലിഹ്‌ പ്രധാനമന്ത്രി നരേന്ദ്ര മോദിയോട് ആവശ്യപ്പെട്ടിരുന്നു. ഇത് പ്രകാരമാണ് സഹായം.

ഇന്ത്യന്‍ വിദേശകാര്യ മന്ത്രി എസ്. ജയശങ്കറും അബ്‌ദുള്ള ഷാഹിദും തമ്മില്‍ നടന്ന ഒരു വിര്‍ച്വല്‍ കൂടിക്കാഴ്ചയിലാണ് ധനസഹായത്തിന്റെ കാര്യത്തില്‍ അന്തിമ തീരുമാനമായത്.