കഴിഞ്ഞ ഒരു വര്‍ഷമായി ഇവര്‍ ലിവിംഗ് ടുഗതര്‍ ബന്ധത്തിലായിരുന്ന കാമുകിയെ കാമുകന്‍ ഉപേക്ഷിച്ചു. മൂന്നു കൊല്ലം പ്രണയത്തിലായിരുന്നവരാണ് ഇവര്‍. യുവതിക്ക് 22 വയസ്സും യുവാവിന് 24 വയസ്സുമാണ് പ്രായം. യുവതി തന്നെയാണ് യഥാര്‍ത്ഥ പേര് വെളിപ്പെടുത്താതെ തന്റെ അവസ്ഥ സോഷ്യല്‍ മീഡിയ പ്ലാറ്റ്‌ഫോമായ റെഡിറ്റില്‍ കുറിച്ചത്. ആഴ്ചയില്‍ കുറഞ്ഞത് രണ്ടു തവണയെങ്കിലും യുവതി പങ്കാളിയെ കൂട്ടാതെ പുറത്ത് പോകുമായിരുന്നു. തന്നെ ഉപേക്ഷിച്ച് മറ്റാര്‍ക്കെങ്കിലും ഒപ്പം പോവുകയാവും യുവതി ചെയ്തത് എന്നായിരുന്നു യുവാവിന്റെ ധാരണ. ഒടുവില്‍ യുവതിയെ അവളുടെ പങ്കാളി രഹസ്യമായി പിന്തുടരാന്‍ തീരുമാനിച്ചു. ഇതിന്റെ പേരില്‍ ഇരുവരും തമ്മില്‍ വഴക്കുണ്ടായി. ചിക്കന്‍ കഴിക്കാന്‍ വേണ്ടിയാണ് പോകുന്നത് എന്ന് എത്ര തവണ പറഞ്ഞിട്ടും കാമുകന് വിശ്വാസം വന്നില്ല. പോകുന്ന സ്ഥലത്ത് യുവതി ആരുമായോ രഹസ്യ സമാഗമം നടത്തുന്നു എന്ന് പങ്കാളി അടിയുറച്ച് വിശ്വസിക്കുന്നു. ഇതോടു കൂടി ഇരുവരും ബന്ധം പിരിയേണ്ടി വന്നു.

യുവതി കുട്ടിക്കാലം മുതല്‍ ചിക്കന്‍ കഴിച്ചു ശീലിച്ചയാളാണ്. യുവാവാകട്ടെ കടുത്ത സസ്യാഹാരിയും. ഇത്രയും നാള്‍ താനറിയാതെ യുവതി പോയത് മക്‌ഡൊണാള്‍ഡ്‌സില്‍ ചിക്കന്‍ നഗേറ്റ്‌സ് കഴിക്കാനാണ് എന്ന കണ്ടെത്തല്‍ യുവാവിന് വിശ്വസനീയമായി തോന്നിയില്ല.

പങ്കാളിക്ക് ഇഷ്ടമില്ലാത്തതു കാരണമാണ് യുവതി പറയാതെ പോയത്. പക്ഷെ ഒരിക്കലും അത് തന്നെ ഉപേക്ഷിക്കാനുള്ള കാരണമാവും എന്ന് യുവതി കരുതിയതേയില്ല. സൂപ്പര്‍മാര്‍ക്കറ്റില്‍ പോകുന്നു എന്ന വ്യജേനെയാണ് യുവതി ചിക്കന്‍ കഴിക്കാന്‍ പോയിരുന്നത്. ഈ പതിവ് തുടര്‍ന്നപ്പോഴാണ് യുവാവിന് സംശയം ആരംഭിച്ചത്. താന്‍ തെറ്റൊന്നും ചെയ്തിട്ടില്ല, ഇക്കാര്യം കാമുകനെ എങ്ങനെ പറഞ്ഞു മനസ്സിലാക്കും എന്ന് നിര്‍ദ്ദേശങ്ങള്‍ ലഭിക്കാനായാണ് യുവതി ഈ വിവരം സോഷ്യല്‍ മീഡിയ ഫോറത്തില്‍ പങ്കിട്ടത്. നൂറുകണക്കിന് കമന്റുകളാണ് യുവതിക്ക് ഉപദേശമായി ലഭിച്ചത്. മക്‌ഡൊണാള്‍ഡ്‌സില്‍ പോയി അവിടുത്തെ സ്റ്റാഫിന്റെ സഹായത്തോടു കൂടി യുവാവിനെ കാര്യങ്ങള്‍ പറഞ്ഞ് മനസ്സിലാക്കാന്‍ ശ്രമിക്കൂ എന്നും ഒരു ഉപദേശമുണ്ടായിരുന്നു. മാത്രവുമല്ല, ഒളിച്ചും പാത്തും ചിക്കന്‍ കഴിക്കാന്‍ പോകാതിരിക്കാനും ഉപദേശമുണ്ട്.