ദിവസങ്ങൾക്ക് മുൻപ് വീട് പൊളിച്ചപ്പോൾ അസ്ഥികൂടം കണ്ട സംഭവം വാർത്തകളിൽ നിറഞ്ഞതാണ്. ഇപ്പോളിതാ ഹരിയാനയിലെ വീട്​ നവീകരണത്തിന്​ തറ പൊളിച്ചപ്പോള്‍ അസ്​ഥികൂടം കണ്ടെത്തിയ കേസില്‍ ഒരാള്‍ പിടിയിലായി. അറ്റകുറ്റ പണികൾക്കായി വീട് പൊളിച്ചപ്പോള്‍ ഒരു മുറിയുടെ തറഭാഗത്ത്​ നിന്ന്​ അസ്​ഥികൂടങ്ങള്‍ കണ്ടെത്തുകയായിരുന്നു​.

വീട്ടുടമയായ സരോജ​ ഉടന്‍ തന്നെ പൊലീസിനി വിവരം അറിയിക്കുകയായിരുന്നു. തുടര്‍ന്ന്​ നടത്തിയ അന്വേഷണത്തിലാണ് കൊലപാതക ത്തിന്റെ യാഥാർഥ്യം പുറത്തറിയുന്നത്. 2017ല്‍ പവന്‍ എന്ന വ്യക്തിയില്‍നിന്നാണ്​ സരോജ വീടുവാങ്ങിയത്.

പഞ്ചസാര മില്‍ തൊഴിലാളിയായ പവനെ കണ്ടെത്തി പൊലീസ്​ ചോദ്യം ചെയ്​തെങ്കിലും യാതൊരു വിവരവും ലഭിച്ചിരുന്നില്ല. പിന്നീട്​ പവന്‍ വീടുവാങ്ങിയ അഹ്​സാന്‍ സെയ്​ഫിയിലേക്ക്​ അന്വേഷണം പോകുകയായിരുന്നു. യു.പിയിലെ ബധോഹി സ്വദേശിയാണ് അഹ്സാൻ.

അഹ്​സാനെ കേന്ദ്രീകരിച്ച്‌​ നടത്തിയ അന്വേഷണത്തിലായിരുന്നു സംഭവത്തിന്റെ ചുരുളഴിഞ്ഞത്. ഇവിടെ താമസിച്ചിരുന്ന പഴയ അയല്‍വാസികള്‍ അയാളുടെ പ്രവൃത്തികളില്‍ ദുരൂഹത പ്രകടിപ്പിച്ചിരുന്നു. തുടര്‍ന്ന്​ യു.പിയിലെത്തി അഹ്​സാന്‍ സെയ്​ഫിയെ പൊലീസ്​ അറസ്റ്റ്​ ചെയ്​തു.

അഹ്​സാന്‍ ​സെയ്​ഫിയെ ചോദ്യം ചെയ്​തതോടെ രണ്ടാംഭാര്യയെയും ​മകനെയും ബന്ധുവിനെയും ദാരുണമായി കൊലപ്പെടുത്തിയ സംഭവം തുറന്നു പറയുകയായിരുന്നു. അഹ്​സാനിന്‍റെ രണ്ടാംഭാര്യ നസ്​നീന്‍, മകന്‍ സൊഹൈല്‍ , 15 വയസായ ബന്ധു ഷാബിര്‍ എന്നിവരാണ്​ കൊല്ല​പെട്ടത്.

സാമൂഹിക മാധ്യമങ്ങളില്‍ സജീവമായിരുന്ന അഹ്​സാന്‍ വിവാഹബന്ധം മറച്ചുവെച്ച്‌​ മാട്രിമോണിയലിലൂടെ നസ്​നീനെ പരിചയപ്പെട്ടു. തുടർന്ന് ഇരുവരും വിവാഹിതരായി. വിവാഹത്തിന്​ ശേഷം ഇരുവരും പാനിപത്തിലേക്ക്​ താമസം മാറുകയായിരുന്നു. ഇയാള്‍ ഇട​ക്കിടെ യു.പി മുസഫര്‍നഗറിലെ ആദ്യഭാര്യയെയും മൂന്ന്​ കുട്ടികളെയും കാണാൻ പോകുമായിരുന്നു.

തന്റെ ഭർത്താവ് വിവാഹിതനാണെന്നും കുട്ടികളുണ്ടെന്നുമുള്ള വിവരം നസ്​നീര്‍ അറിഞ്ഞു. ഇതോടെ മുസഫര്‍നഗറിലേക്ക്​ പോകുന്നതിന്​ അഹ്​സാനെ വിലക്കുകയും ചെയ്തു. ഇതിനെ​ ചൊല്ലി ഇരുവര്‍ക്കുമിടയില്‍ നിരവധി പ്രശ്നങ്ങൾ ഉടലെടുത്തിരുന്നു. തുടര്‍ന്ന്​ 2016 നവംബറില്‍ നസ്​നീനെയും മകനെയും ബന്ധുവിനെയും വിഷം കൊടുത്ത്​ ഇയാൾ കൊലപ്പെടുത്തുകയായിരുന്നു.

കൊലപാതക ശേഷം ഇദ്ദേഹം വീട്ടിലെ തന്നെ ഒരു മുറി കുഴിച്ച്‌​ അവിടെ മൃതദേഹങ്ങള്‍ സംസ്​കരിച്ചു. അതിനുശേഷം പവന്​ വീട്​ വില്‍ക്കുകയായിരുന്നു. തുടര്‍ന്ന്​ ഇയാള്‍ മൂന്നാ​മതൊരു വിവാഹവും കഴിച്ചു. മൂന്നാമത്തെ ഭാര്യക്കൊപ്പം യു.പിയില്‍ താമസിച്ച്‌​ വരികയായിരുന്നു അഹ്​സാന്‍. കൊലപാതക കുറ്റം സമ്മതിച്ച അഹ്​സാനെ കോടതിയില്‍ ഹാജരാക്കി 10 ദിവസത്തെ പൊലീസ്​ കസ്റ്റഡിയില്‍ വിട്ടിരിയ്ക്കുകയാണ്.