മുംബൈ നഗരത്തിലെ ആശുപത്രിയിൽ വൻ തീപിടിത്തം. ഒരു മാളിലെ മൂന്നാം നിലയിലിൽ കൊവിഡ് രോഗികളെ ഉള്‍പ്പെടെ ചികിത്സിക്കുന്ന ആശുപത്രിയിലിലാണ് രാത്രി തീപിടുത്തമുണ്ടായത്. ഡ്രീംസ് മാള്‍ സൺറൈസ് ആശുപത്രിയിൽ രാത്രി 12.30ഓടെയാണ് അപകടമുണ്ടായത്.

സംഭവസമയത്ത് ആശുപത്രിയിൽ എഴുപതോളം കൊവിഡ് രോഗികള്‍ ഉണ്ടായിരുന്നുവെന്നാണ് റിപ്പോര്‍ട്ട്. 22 ഫയര്‍ എൻജിനുകള്‍ സ്ഥലത്തെത്തിയാണ് തീ നിയന്ത്രണവിധേയമാക്കിയത്. തീപിടിത്തത്തിൽ ആരും മരിച്ചിട്ടില്ലെന്നായിരുന്നു ആശുപത്രി ആദ്യം പ്രസ്താവനയിൽ വ്യക്തമാക്കിയത്.

കൊവിഡ് മൂലം മരിച്ച രണ്ട് രോഗികളുടെ മൃതദേഹങ്ങള്‍ സ്ഥലത്തു നിന്നും മാറ്റിയിട്ടുണ്ടെന്നും ആശുപത്രി വ്യക്തമാക്കി. മാളിൻ്റെ ഒന്നാം നിലയിൽ തീപടര്‍ന്നതു മൂലം മുകള്‍നിലയിൽ പ്രവര്‍ത്തിക്കുന്ന ആശുപത്രിയിൽ പുക നിറയുകയായിരുന്നു.

കെട്ടിടത്തിലെ ഫയര്‍ അലാമുകള്‍ മുഴങ്ങിയതോടെ രോഗികളെ ഒഴിപ്പിക്കുകയായിരുന്നുവെന്നും ആശുപത്രി വ്യക്തമാക്കി. എന്നാൽ സംഭവത്തിനു പിന്നാലെ ചില രോഗികളെ കാണാതായതായി പിന്നീട്സ്ഥിരീകരിച്ചു.

ഇവരെ തിരിച്ചറിയാനും കണ്ടെത്താനും ശ്രമം തുടരുകയാണെന്നും റിപ്പോര്‍ട്ടുകള്‍ വന്നു. ഇതിനു പിന്നാലെയാണ് പത്ത് മൃതദേഹങ്ങള്‍ കണ്ടെടുത്തെന്ന റിപ്പോര്‍ട്ട്. രോഗികളെ മുംബൈയിലെ ജംബോ കൊവിഡ് കേന്ദ്രത്തിലേയ്ക്കും ചില സ്വകാര്യ ആശുപത്രികളിലേയ്ക്കുമാണ് മാറ്റിയിരിക്കുന്നത്.

തീപിടിത്തത്തിൻ്റെ കാരണമെന്താണെന്ന് വ്യക്തമല്ല. എഴുപതിലേറെ രോഗികളെ സുരക്ഷിതമായി സ്ഥലത്തു നിന്ന് മാറ്റിയതായി വിവിധ മാധ്യമങ്ങള്‍ റിപ്പോര്‍ട്ട് ചെയ്തു. സ്ഥലത്തു നിന്ന് ഇതുവരെ പത്ത് മൃതദേഹങ്ങള്‍ കണ്ടെത്തിയിട്ടുണ്ടെന്ന് അധികൃതരെ ഉദ്ധരിച്ച് എൻഡിടിവി റിപ്പോര്‍ട്ട് ചെയതു.

മുംബൈ ഉള്‍പ്പെടെയുള്ള നഗരങ്ങളിൽ കൊവിഡ് 19 കേസുകള്‍ ഉയരുന്നതിനിടയാണ് തീപിടുത്തം. ഈ വര്‍ഷം ഇതാദ്യമായി മുംബൈ നഗരത്തിൽ ഒരു ദിവസം സ്ഥിരീകരിക്കുന്ന കൊവിഡ് കേസുകളുടെ എണ്ണം 5500 കവിഞ്ഞു.

അതേസമയം, ആശുപത്രി പ്രവര്‍ത്തിച്ചിരുന്ന രീതി സംബന്ധിച്ചും സംശയങ്ങള്‍ ഉണര്‍ന്നിട്ടുണ്ട്. എല്ലാ വിധ ലൈസൻസുകളോടും കൂടിയാണ് ആശുപത്രി പ്രവര്‍ത്തിച്ചിരുന്നതെന്നാണ് ആശുപത്രി അധികൃതര്‍ പ്രസ്താവനയിൽ വ്യക്തമാക്കിയത്.

എന്നാൽ മാളിനുള്ളിൽ ആശുപത്രി പ്രവര്‍ത്തിക്കുന്നത് ഇതാദ്യമായാണ് കാണുന്നതെന്നായിരുന്നു മുംബൈ മേയര്‍ കിഷോരി പഡ്നേക്കര്‍ എഎൻഐയോടു പ്രതികരിച്ചത്. ഇത് ഗുരുതരമായ സാഹചര്യമാണെന്നും അദ്ദേഹം പറഞ്ഞു. തീപിടിത്തത്തിൻ്റെ കാരണം കണ്ടെത്താൻ അന്വേഷണം നടത്തുമെന്നും അദ്ദേഹം പറഞ്ഞു.